Read Yimchungru Naga Ezk 35 Bible Online

Ezk 35 - Yimchungru Naga bible

Ezk 35

¹ATUNGPUH yu I ki arü:

²Mihtsürü tsührü, Edom müzüng azhihde nü miro abinang, tüsho ju azhihde müchitang,

³tüsho thaang, Atungpuh THRÜNPUHNÜ ha thachoh: Inü nü azhihde lah, Edom müzüng; nü zhikshihpü tüsho abahkhi kamshihpü inü nü azhihde I khah chungkihlah.

⁴Inü I kiutobo athsümünim ching lashihlah; nü azhihkhi khülang kambah tüsho I ATUNGPUH de nünü mükheahbah.

⁵Tümütüsho nü a mutuklode Israel riri lakheah, tüsho arü thsümütsü, arü akheam thsümüchi kim ching Israel mihtsürü nukshang wu kilim jih;

⁶jumonü I lale, Atungpuh THRÜNPUHNÜ thachoh, Inü thiyih thsungkheak nü thsakhambah, tüsho thiyihnü nü müshambah; tümütüsho nünü thiyih bukkhi müthranean, thiyih bukkhinü nü müshambah.

⁷Inü Edom müzüng abahkhi tüsho azhik khülang kamshihbah; tüsho ju ching arüla yüla dürü laksah-a bahbah.

⁸Inü müzüngbo ju alaksahkhinü amishihbah; nü wungbo kheak tüsho nü jindükhün le jindükhünasükbo ching nukshangnü alaksahrü keambah.

⁹Inü nü kiutobo lünnü azhikkhi kamshihbah, tüsho nü yo kiutobo ching küyimkishe mülaloshih. Judüki I ATUNGPUH de nünü mükheahbah.

¹⁰Tümütüsho nünü tha, “Ha trükshih mahne tüsho lomi mahne I yo thsübah, tüsho isanü arü yamalo lubah,” — ATUNGPUH ju ching laa lalashe —

¹¹jumonü I lale, Atungpuh THRÜNPUHNÜ thachoh, nünü arü azhihde thraneankhi dünkheak nü bukakhiukkhi tüsho nünü mükthsükhi yande inü nü kheak rhimobah; tüsho inü nü mahkhapchoki nüsa bolung I mükheahshihbah.

¹²Judüki nünü Israel wungbo bahyukde athakhi alala I ATUNGPUHNÜ sodo de nünü mükheahbah. Nünü tha, “Arübo thsümünima yaplah tüsho amuyushihpü arübo isa kilim jihdo.”

¹³Tüsho nünü I azhihde nü münnü nü küdah thsüde kükheanga lu, tüsho I azhihde nü yubo alü kamshih; inü ju sodo.

¹⁴Atungpuh THRÜNPUHNÜ ha thachoh: Alomi athrünkhi asühachihchoki, inü nü zhikrangkhündo kamshihbah.

¹⁵Tümüde nünü Israel yamkhün yamrüplurüp kurungkheak asühachihdo, tümütüsho ha zhikrangkhündo lakheah, jumonü inü nü ki rhimobah; nü zhikrangkhündo alabah, O Edom müzüng, nü tüsho Edom alala. Judüki I ATUNGPUH de arünü mükheahbah.