Read Yimchungru Naga Ezk 38 Bible Online

Ezk 38 - Yimchungru Naga bible

Ezk 38

¹ATUNGPUH yu I ki arü:

²Mihtsürü tsührü, Magog lomi ching Meshek tüsho Tubal yo akubeato yakzanshuhbuh Gog kilim nü miro abinang. Api azhihde müchitang

³tüsho thaang: Atungpuh THRÜNPUHNÜ ha thachoh: Inü nü azhihde lah, O Gog, Meshek tüsho Tubal akubeato yakzanshuhbuh;

⁴inü nü bephülapbah tüsho nü mün ching khoyangbo yukjihbah, tüsho inü nü bonungrü alala, khorabo tüsho khoraberübo, arü alala thirithsü zülu khiukchimde yihshihbah boto ato arü alala tsung tüsho tsungnini, nukshangbo shuhbah mükamde nü bebah.

⁵Persia, Ethiopia, tüsho Libya arü lung bebah, arü alala tsungnini tüsho yinchi kuthran labah;

⁶Gomer tüsho thirithsürü alala; Beth-togarma thirithsürübo bebah limshukhi dukulimnü mihtsürü ahihdo nü lung lah.

⁷Thsakhamang; nü tüsho nü mükamde alakhi thirithsürübo tsanglungang, tüsho arü ki thiyukhüm jihang.

⁸Nimung ahihkhüh dunglim nüsa mukhungbah; ashulim kambo ching nüsanü, ashangkhüh thsümünima lakhi, thirithsü kheamkhi lomi khülang, trükshih ahihdo chingnü mukhungde arüpung Israel müzüng azhihde ayübah; ha mihtsürübo trükshihbo chingnü bekhit tüsho kheakü arü alala akhümkhitkhi ching lah.

⁹Nü mikhuh ching, tsüngpungtsüngpung khülang nangde arübah; nü ju alomi shodokhi amo khülang nangde, nü tüsho nü yo thirithsürü alala, tüsho nü lung mihtsürü ahihkhüh labah.

¹⁰Atungpuh THRÜNPUHNÜ ha thachoh: Ju nimung lümkhibo nü lüm ching arübah, tüsho nünü amütsü asah khülang thsübah.

¹¹Nünü athabah, “Chipi ayünkhi kiulongbo azhihde inü wutubah; chipibo, akhrihbebo yungsho chipiripitbo mülakhi, mungtsü mihtsürü sühakhim ching larü kheak inü akeambah”;

¹²ajangkhikhi lupü tüsho ayankhikhi hanpü, thsümünima labah kheakü mihtsürü lakhi dangpungbo yanpü, tüsho trükshihbo chingnü amukhungkhi mihtsürübo, moshi tüsho kukrukbo larü, lomi phulung ching larü rampü labah.

¹³Sheba tüsho Dedan tüsho Tarshish shothsümolorü tüsho athunu thirithsürübo alalanü nü ki thabah, “Ajangkhikhi lupü nü arükhea de? Ayankhikhi hanpü, shotoyinchi tüsho suna hande atsopü, moshi tüsho kukrukbo hande atsopü, ahüh-a lukhi atokhüh lupü nünü mihbo bemukhungkhea de?”

¹⁴Jumonü, mihtsürü tsührü, Gog ki müchitang tüsho thaang: Atungpuh THRÜNPUHNÜ ha thachoh: I mihtsürü Israel khümkhita lakhi nimung, nü asürübah

¹⁵tüsho dukulim limshu chingnü nü lapung chingnü arübah, nü tüsho nü lung mihtsürü ahihdo, arü alala khorabo kheak binbah, mihbo ato, wuto bonungrü;

¹⁶amonü alomi liudokhi nangde nünü I mihtsürü Israel azhihde atubah. Ashube nimungbo ching I lomi azhihde inü nü bedarübah, O Gog, nü hode arü mükbo ki I amüsühkhitkhi huhchoki, trükshihbonü I mükheahbah.

¹⁷Atungpuh THRÜNPUHNÜ ha thachoh: Adüso nimungbo ching I yamlarü Israel wukihrübonü arübe nimungbo ching arü azhihde inü bedarüpü kambo müchitkhi ju nü a de?

¹⁸Ju nimung, küyimki Gognü Israel lomi azhihde arübanü, Atungpuh THRÜNPUHNÜ thachoh, I mulong zhipzhipbah.

¹⁹Tümüde I mükthsükhi ching tüsho I mulong zhipzhipkhi ching inü khipkhitchoh: Ju nimung Israel lomi ching muliuyuk züngkhi ato labah;

²⁰keto ngüh, thüning wuhnubo, mütüm shiwühbo, alo kheak abüde atsahbe lorilokobo alala, tüsho alomi kheak lakhi mihtsürü alala I miki ajanbah, tüsho müzüngbo le awung mujukbo keamkhibah, tüsho chipi alala alo kheak keama yapbah.

²¹Inü I wungbo alala kheak Gog azhihde nukshang jihbah, Atungpuh THRÜNPUHNÜ thachoh; mihbüm aban thsühnuknü khülangnü khülang azhihbah.

²²Arüm-tukthsü tüsho thiyih bukde inü api kheak mahkhappü ching yüzahbah; tüsho inü api le api lung lakhi mihtsürü ahihdo kheak düchi tsüng tüsho arubo, mo tüsho motsüng akishihbah.

²³Junangde inü I tokhi tüsho I müsühkhitkhi huhbah tüsho trükshih ahihdo miki I mükheahshihbah. Judüki I ATUNGPUH de arünü mükheahbah.