Read Yimchungru Naga Ezk 40 Bible Online

Ezk 40 - Yimchungru Naga bible

Ezk 40

¹Isa ramtsokhi kam mukukheak phüngüpü ching, kam atankih, nimung thürü nipü, kiuto thsümünimbah kam thürükheak phüyipü dunglim ju nimung tsütsü, ATUNGPUH khah I kheak lakheah, tüsho apinü I ju ching bedarü.

²Apinü I Thrünpuh michihbo ching Israel lomi lim bedarü tüsho müzüng khide achang kheak binshih; ju kheak düjinglim ju kiuto khülang thrünkhi nangde alakheah.

³Küyimki apinü ju ching I bedarükhea, ju ching mihtsürü khülang ashihphü müwayinchi nangde, api khah ching khimthünak liu tüsho akesang khülang lakheah; tüsho api ju chipiripit limro zhipde alakheah.

⁴Mihtsürünü I ki tha, “Mihtsürü tsührü, kheahkihde kheahang tüsho tsüde aniang, tüsho inü nü ki huhkhi alala kheak nü lümkhi zoang, tümüde inü ha nü ki huhpü thsüde nü ha ching bedarükheah; nünü angükhi alala Israel yamkhün ki thaang.”

⁵Kheakü arüngyam wungdo alala mükamde rhü khülang lakheah. Mihtsürü khah ching lakhi akesang ju ashanglim khahnap 6 lakheah; jumonü apinü rhü akheahlim ju akesang 1 ake tüsho achanglim akesang 1 ake.

⁶Jushu apinü aniakhiuklim abinkhi chipiripit limro ching yüzahbah, jingdükübo ching wutu, tüsho chipiripit limro ju asüklim akesang 1 ake.

⁷Chipiripit khiungshakbo aban ashanglim akesang 1 tüsho atolim akesang 1 lakheah; chipiripit khiungshakbo dükeak ju khahnap 5 lakheah; tüsho alungbe chipiripit mükü ki chipiripit limro asüklim akesang 1 lakheah.

⁸Jushu apinü chipiripit limro mükü alungbe khahnap 1 ake.

⁹Jushu apinü chipiripit limro khahnap 8 ake; tüsho chipiripit dungtobo akheahlim khahnap 2 lakheah; tüsho chipiripit mükü ju alunglim akheam kheak lakheah.

¹⁰Aniakhiuklim chipiripit ching thripkhüh chipiripit khiungshak khülang tüsho püpü thrip mahsam lakheah; mahsam chido akekhi rukhüh lakheah; tüsho thrip abande chipiripit ashungdungbo akekhi rukhüh lakheah.

¹¹Jushu apinü chipiripit limro alahashungbe atolim khahnap 10 ake; tüsho chipiripit limro ayunglim khahnap 13 ake.

¹²Akhiungshakbo miki rhü khülang thrip aban khahnap 1 lakheah; tüsho akhiungshakbo ju thrip aban khahnap 6 lakheah.

¹³Jushu apinü chipiripit khiungshak khülang kheaknü püpü khiungde ayi-lüpkhi kheaknü chipiripit ju ake; khimdopünü khimdopü kheahachihde, atolim khahnap 25 lakheah.

¹⁴Apinü chipiripit dungjingbo khahnap 60 ake; tüsho chipiripit limro alala mükamkhi khikzhakpung ju chipiripit dungbo khiungde alakheah.

¹⁵Ayüzahpung chipiripit mikhuh kheaknü alungbe chipiripit mükü akheam khiungde khahnap 50 lakheah.

¹⁶Akhiungshakbo tüsho chipiripit dungbo ching, chipiripit limro alungbe alala mükamde arihdobe bebah ayinripitbo lakheah, tüsho alunglim alala mükamde mükübo she ayinripitbo lakheah; tüsho chipiripit ashungdungbo kheak ashidungbo dokih-a lakheah.

¹⁷Jushu apinü khikzhakpung aleangbe lim I bedarü; ju ching akhiungshakbo tüsho limtsahpung khülang khikzhakpung alala mükamde alakheah; limtsahpung yeande akhiungshak samrü lakheah.

¹⁸Limtsahpung ju chipiripitbo mükamde ashanglim nangde mülihde alakheah; ha limtsahpung abobe lakheah.

¹⁹Jushu apinü alunglim abobe chipiripit limro kheaknü alungbe khikzhakpung wungdo khiungde ake; aniakhiuklim tüsho dukulim akekhi ju khahnap 100 lakheah.

²⁰Jushu apinü dukulim abinkhi aleangbe khikzhakpung chipiripit, asüklim tüsho atolim ake.

²¹Thrip aban khiungshak mahsam, chipiripit dungbo tüsho mükü ju akhuhbe chipiripit nangde akekhi rukhüh lakheah; ayunglim khahnap 50 tüsho atolim khahnap 25 lakheah.

²²Ayinripitbo, mükü, tüsho ashidungbo ju aniakhiuklim abinkhi chipiripit akekhi rukhüh lakheah. Ju ching jingdükü 7 yükih; tüsho mükü ju alunglim lakheah.

²³Aniakhiuklim nangde dukulim chipiripit mikhuh kheak alungbe khikzhakpung chipiripit khülang lakheah; apinü chipiripit mahne dükeak akekhi ju khahnap 100 lakheah.

²⁴Jushu apinü I düjinglim bede yü, tüsho düjinglim chipiripit khülang lakheah; tüsho apinü chipiripit dungbo tüsho mükübo ake; püpübo nangde jurü akekhi rukhüh lakheah.

²⁵Ju alala mükamde mükü ching püpürü nangde ayinripitbo lakheah; ayunglim khahnap 50, tüsho atolim khahnap 25 lakheah.

²⁶Ju kheak yükihpü ju jingdükü 7 lakheah; mükü ju alunglim lakheah. Chipiripit dung thrip aban kheak ashidung lakheah.

²⁷Düjinglim alungbe khikzhakpung yo chipiripit khülang lakheah; tüsho apinü düjinglim chipiripit mahne dükeak akekhi ju khahnap 100 lakheah.

²⁸Jushu apinü I düjinglim chipiripit ki alungbe khikzhakpung ching bedarü, tüsho apinü düjinglim chipiripit ju ake; püpürü nangde akekhi rukhüh lakheah.

²⁹Akhiungshakbo chipiripit dungbo, tüsho mükü püpürü nangde akekhi rukhüh lakheah; tüsho ju alala ching mükamde tüsho mükü ching püpürü nangde ayinripitbo lakheah; ashanglim khahnap 50, tüsho atolim khahnap 25 lakheah.

³⁰Alala mükamde mükübo lakheah, ashanglim khahnap 25 tüsho atolim khahnap 5.

³¹Mükünü aleangbe limkhuh lim abin, tüsho chipiripit dungbo kheak ashidungbo lakheah, tüsho limro kheangkihkhi ju jingdükü 8 lakheah.

³²Jushu apinü I aniakhiuklim alungbe khikzhakpung lim bedarü, tüsho apinü chipiripit ju ake; püpürü nangde akekhi rukhüh lakheah.

³³Akhiungshakbo, chipiripit dungbo, tüsho mükü ju püpürü nangde rukhüh lakheah; tüsho alala mükamde tüsho mükü ching ayinripitbo lakheah; ashanglim khahnap 50, tüsho atolim khahnap 25 lakheah.

³⁴Mükü ju aleanglim khikzhakpung lim abin, tüsho chipiripit dungbo kheak ashidungbo thrip abande lakheah; tüsho limro kheangkihkhi ju jingdükü 8 lakheah.

³⁵Jushu apinü I dukulim chipiripit lim bedarü, tüsho apinü ju akeakheah; püpürü nangde ha rukhüh lakheah.

³⁶Akhiungshakbo, chipiripit dungbo, tüsho mükü ju püpürü nangde rukhüh lakheah; tüsho alala mükamde ayinripitbo lakheah. Ayunglim khahnap 50, tüsho atolim khahnap 25 lakheah.

³⁷Mükü ju wungdo limkhuh lim abin, tüsho thrip abande chipiripit dungbo kheak ashidungbo lakheah; tüsho limro kheangkihkhi ju jingdükü 8 lakheah.

³⁸Chipiripit mükü ching khimdopü bede akhiungshak khülang, taka kingaünbe müsühpung lakheah.

³⁹Tüsho chipiripit mükü ching thrip abande dükhüm mahnene lakheah, ju taka kingaün, neak kingaün tüsho laksah-a kingaünpü laksahpung lakheah.

⁴⁰Mükü aleanglim dukulim chipiripit ki dükhüm mahne lakheah; tüsho chipiripit mükü püpü thrip kheak dükhüm mahne lakheah.

⁴¹Alunglim dükhüm phüyi, tüsho aleanglim chipiripit ki dükhüm phüyi, laksah-a kingaünbe laksahpungbo ju dükhüm tizheah lakheah.

⁴²Kheaküshe ju ching taka kingaünpü thsungkheak akheankhi lung dükhüm phüyi lakheah, ashanglim khahnap 1 kheak thripkhüh, tüsho atolim khahnap 1 kheak thripkhüh, tüsho achanglim khahnap 1, ju kheak laksah-a kingaünpü laksahbe kukrukbo zode alakheah.

⁴³Alunglim ju awuhpungbo atolim müyikhühnü alala mükamde rhükkih; tüsho shuhmülanga kingaünbe shih ju dükhümbo kheak lakheah.

⁴⁴Alungbe chipiripit aleanglim alungbe khikzhakpung ching khün thsürü thsungkheak khiungshakbo lakheah, khülang ju düjinglim abinkhi dukulim chipiripit thrip lakheah, püpü ju dukulim abinkhi düjinglim chipiripit thrip lakheah.

⁴⁵Apinü I ki tha, “Düjinglim abinkhi khiungshak ha arüngyam ching tankihrü amükeamrübo thsungkheak ah,

⁴⁶tüsho dukulim abinkhi khiungshak ha kingaün sadam kheak tankihrü amükeamrübo thsungkheak ah; harü ha Levi trük Zadok tsühsoniuso bolungnü lang api tankihpü ATUNGPUH thüninde arüpü kuklah.”

⁴⁷Apinü khikzhakpung ju ake, ashanglim khahnap 100, tüsho atolim khahnap 100, shahrihkhüh lakheah; tüsho kingaün sadam ju arüngyam limkhuh kheak lakheah.

⁴⁸Jushu apinü I arüngyam mükü lim bedarü tüsho mükü ripit dungbo thripkhüh thripkhüh khahnap 5 ake; tüsho chipiripit athriplim rhübo ju thrip aban khahnap 3 lakheah.

⁴⁹Mükü ayunglim khahnap 20 tüsho atolim khahnap 12; ayükihkhi ju jingdükü 10; tüsho thrip aban ripit dung yean dungjingbo lakheah.