Read Yimchungru Naga Ezk 42 Bible Online

Ezk 42 - Yimchungru Naga bible

Ezk 42

¹Judüki apinü dukulim, aleangbe khikzhakpung I bede wukhiuk tüsho arüngyam mikhuh tüsho dukulim thüyam mikhuh khiungshakbo ching I bedarü.

²Dukulim lakhi thüyam ayunglim ju khahnap 100, tüsho atolim khahnap 50 lakheah.

³Alungbe khikzhakpung khahnap 20 kheanghode, tüsho aleangbe khikzhakpung limtsahpung thrip abinde, khiungshakbo ju rünkih mahsam ching rünhuhkhamde thsü.

⁴Khiungshakbo miki alunglim limtsahpung khülang, atolim khahnap 10 tüsho ashanglim khahnap 100, tüsho ripitbo ju dukulim lakheah.

⁵Kheakü akube khiungshakbo ju mütsümde alakheah, tümüde abobe tüsho thüyam aphulung ching khiungshakbo kheaknü alü thsüde arünhuhkhibonü atobe luabah.

⁶Tümüde jurü ju rünkih mahsam ching lakheah tüsho aleangbe khikzhakpung dungjingbo nangde dungjingbo mülade alakheah; jumonü akube khiungshakbo ju abobe tüsho aphulungbo kheaknü aninibe lakheah.

⁷Akhiungshakbo yeande rhü khülang aleangbe khikzhakpung thrip, akhiungshakbo mikhuh, ayunglim khahnap 50 lakheah.

⁸Tümüde aleangbe khikzhakpung kheak akhiungshakbo khahnap 50 lakheah tüshe arüngyam mikhuhbo a khahnap 100 lakheah.

⁹Harü khiungshakbo jing kheak ju aleangbe khikzhakpung chingnü yüzahpü thsüde aniakhiuklimnü yüzahpü limtsahpung khülang lakheah.

¹⁰Limtsahpung atolim ju khikzhakpung rhünü khiungdoa lakheah. Düjinglim she, arüngyam mikhuh akhiungshakbo

¹¹jurü mikhuh ki limtsahpung khülang lakheah; jurübo ju dukulim khiungshakbo nangde lakheah, ashanglim tüsho atolim rukhüh, ripitbo le akeara tüsho khimdopübo rukhüh lakheah.

¹²Junangde düjinglim khiungshakbo ching yüzahpung ju limtsahpung ku kheak, aniakhiuklimnü, rhü arihkhi hobah ayüzahpungnü yüzah.

¹³Judüki apinü I ki tha, “Dukulim tüsho düjinglim arüngyam mikhuh lakhi khiungshakbo ju amükeamrübonü ATUNGPUH ki yübah khide amüsüh kingaünkhi tsühpü lakhi amüsüh khiungshakbo ah; ju ching arünü khide amüsüh kingaünbo zobah — hi kingaün, neak kingaün, tüsho amülim kingaün, tümüde dangpung ju amüsüh ah.

¹⁴Küyimki amükeamrübonü amüsüh dangpung yüzahbanü, arünü tankihpung khimmih muzoyikia arübo aleangbe khikzhakpung ching muwukhiuk, tümüde harübo amüsüh ah; mihtsürübo thsungkheak lakhi dangpungbo ching müyüyide arünü khimmih püpü yukbah.”

¹⁵Küyimki apinü arüngyam alunglim akekhamkhea, apinü aniakhiuklim abinkhi chipiripit ki I bede wukhiuk tüsho arüngyam alala mükamde ake.

¹⁶Apinü akesangnü akekhi aniakhiuklim thrip khahnap 500.

¹⁷Jushu apinü anguhlo tüsho dukulim akesangnü akekhi khahnap 500.

¹⁸Jushu apinü anguhlo tüsho düjinglim akesangnü akekhi khahnap 500.

¹⁹Jushu apinü aniyüzahlim anguh tüsho akesangnü akekhi khahnap 500.

²⁰Apinü thrip phüyi ake. Ju mükamde amümüsüh chingnü amüsüh chamnakpü lakhi rhü ju ashanglim khahnap 500 tüsho atolim 500 lakheah.