Read Yimchungru Naga Ezk 43 Bible Online

Ezk 43 - Yimchungru Naga bible

Ezk 43

¹Jushu apinü I aniakhiuklim abinkhi chipiripit lim bedarü.

²Tüsho ju ching Israel Thrünpuh müretahkhi ju aniakhiuklimnü arüde alakheah; düsheak ju keto ato düsheak nangde alakheah; tüsho api müretahkhinü alomi tah.

³Inü angükhi michih ju apinü kiuto thsümünimpü arüchoki inü Kebar Ayung ki ngükhi michih nangde alakheah; tüsho inü I miro mükhüm.

⁴Aniakhiuklim abinkhi chipiripit chingnü ATUNGPUH müretahkhi arüngyam ching azahshu,

⁵menü I shuhkih, tüsho alungbe khikzhakpung ching I bede yüzah; tüsho ATUNGPUH müretahkhinü arüngyam mide kam.

⁶Mihtsürü ju I rheang ki zhipde lachoki, ATUNGPUHNÜ arüngyam chingnü I ki asukkhi inü so.

⁷Apinü I ki tha: Mihtsürü tsührü, ha I Israel bolung lünnü alapü lakhi I kiulongthsü-binkiu zopung tüsho I jinglung dubopung. Israel yamkhünnü kheaküa arünü yungsho arü kiulongthsürübonü, arü yüliyürakhinü, tüsho arü kiulongthsürübo shechoki asheminü I mung amüsüh mümüneanjih.

⁸Küyimki arünü arü düküyukpung ju I düküyukpung ki zokhea tüsho arü ripitbo I ripit dung ki I le arü dükeak rhü khülangnü lang arebahle azokhea, arünü ayihbeakkhi athraneanbenü arünü I mung amüsüh müneanjihde alakheah; jumonü I bukakhiukkhi ching inü arü muyukheah.

⁹Kheakü arünü arü sangthsü kingaünkhibo tüsho arü kiulongthsürü ashemibo I kheaknü limshude bahshang, tüsho inü arü bolung lünnü alabah.

¹⁰Mihtsürü tsührü, nünü Israelrü ki arüngyam dünkheak thaang, tüsho arünü ha lümshang; tüsho arünü arü mülimkhibo dünkheak achih ngüshang.

¹¹Küyimki arünü arhimokhi alala dünkheak arü achih ngübanü, arüngyam lümkhi tsangshukhi, ripitbo tüsho düküyukpung, tüsho kilüm alala — thiyuzüng alala, lümkhi athrünkhi tüsho yakzan alala arü ki mükheahshang; tüsho ju arü mük ki thrütang, junangde arünü angükhitbah tüsho lümkhi athrünkhi tüsho thiyuzüng alala arünü ayanbah.

¹²Ha arüngyam yakzan ah. Müzüng mujuk kheak lomi athrünkhi mükamphülapde khide amüsüh labah. Ha arüngyam yakzan ah.

¹³Khahnapnü akekhi kingaün sadam ju harü lakheah: ajingbo lim achangkhi khahnap 1, tüsho atolim khahnap 1, amünkheam mükamde müyikhüh tokhi phuhpho khülang. Kingaün sadam achanglim ha labah:

¹⁴Alo kheak ajingbo kheaknü abobe kipdam khiungde khahnap 2; kipdam atolim khahnap 1; kipdam aninibe kheaknü kipdam atobe khiungde khahnap 4; tüsho kipdam atolim khahnap 1;

¹⁵tüsho kingaün sadam mokin khahnap 4; tüsho kingaün sadam mokin kheaknü akulim duhkihkhi ajuh phüyi.

¹⁶Kingaün sadam mokin thrip phüyi arihkhühnü, ashanglim khahnap 12 tüsho atolim khahnap 12 labah.

¹⁷Kipdam she arihkhühnü ashanglim khahnap 14 tüsho atolim khahnap 14 labah, ju mükamde phuhpho khahnap chamkhüh, tüsho ajingbo lim mükamde khahnap 1. Leak-dukkhibo ju aniakhiuklim abin.

¹⁸Judüki apinü I ki tha: Mihtsürü tsührü, Atungpuh THRÜNPUHNÜ ha thachoh: Harü ha kingaün sadam thsungkheak thiyuzüngbo lah: Ju kheaknü taka kingaünpü tüsho ju kheak thiyih rhakkihpü ha lahmusu nimung,

¹⁹Zadok yamkhün Levirü amükeamrübo I tankihpü I phünide arürü kilim neak kingaünpü thsungkheak moshipung khülang nünü jihang, Atungpuh THRÜNPUHNÜ thachoh.

²⁰Tüsho nünü athiyih khürü lubah, tüsho kingaün sadam juh phüyi kheak kipdam mühit phüyi kheak, tüsho phuhpho alala mükamde ayihkihbah; hanangde nünü ju müsühkhitbah tüsho ju thsungkheak dünthsükhibah.

²¹Kheaküshe neak kingaün thsungkheak nünü moshi 1 lubah, tüsho ju arüngyam akhukhitkhi dangpung, amüsüh dangpung wungdonü atakbah.

²²Mahnepü nimung nünü neak kingaün thsungkheak lapha mükihkhi mihnu pung 1 jihang; tüsho moshipungnü müsühkhitkhi nangde, kingaün sadam müsühkhitbah.

²³Küyimki nünü ju müsühkhitkhi banbanü, nünü lapha mükihkhi moshipung 1 tüsho mihnu bolungnü lapha mükihkhi namfimihnupung 1 jihbah.

²⁴Nünü jurü ATUNGPUH miki jihbah, tüsho amükeamrübonü jurü kheak thimi sukbah tüsho ATUNGPUH kilim taka kingaünbah.

²⁵Neak kingaün thsungkheak nimung thüne nünü nimung abande mihnu khülang jihbah; kheaküshe moshipung khülang tüsho mihnu bolungnü namfimihnupung khülang lapha mükihkhi jihbeah.

²⁶Arünü nimung thüne kingaün sadam thsungkheak dünthsükhibah tüsho ju tsangkhitde müsühkhitbah.

²⁷Küyimki harü nimungbo hobanü, nimung tizheah ninü rünbah amükeamrübonü nü yo taka kingaünbo tüsho mungtsü kingaün sadam kheak jihbah; tüsho inü nü leangkhibah, Atungpuh THRÜNPUHNÜ thachoh.