Read Yimchungru Naga Ezk 45 Bible Online

Ezk 45 - Yimchungru Naga bible

Ezk 45

¹Küyimki nüsanü yamrüplurüp khülang nangde alo chambanü, nüsanü ATUNGPUH thsungkheaknü amüsüh lomi shihcham ashanglim khahnap 25,000 tüsho atolim khahnap 20,000 chamkhita zoang; ha mükeak alala amüsüh labah.

²Ha chingnü athrip aban khahnap 500 ju arüngakopung thsungkheak labah, ju lung mühide wungdo thsungkheak khahnap 50.

³Lomi chamnak amüsüh ching nüsanü dangkhüh ju ashanglim khahnap 25,000 tüsho atolim 10,000 akeang. Ha ching arüngakopung, khide Amüsüh Dangpung labah.

⁴Ha arüngakopung ching tankihrü tüsho ATUNGPUH miki tankihpü thüninde arürü amükeamrübo thsungkheak lomi shihcham amüsüh labah. Ha arü yampungbo tüsho arüngakopung thsungkheak amüsüh dangpung labah.

⁵Mükeak ashanglim khahnap 25,000 tüsho atolim khahnap 10,000 ju arüngyam ching tankihrü Levirü lapung kiutobo thsübah.

⁶Amüsüh lomi chamnak shihcham zokhi yean nüsanü kiuto lopung thsüpü atolim khahnap 5000, tüsho ashanglim khahnap 25,000 zoang; ha Israel yamkhün athrünkhi yo thsübah.

⁷Amüsüh lomi chamnak tüsho kiuto lopungnü thrip aban arekhi lo ju kiulongthsüpuh yo thsübah. Ha aniakhiuklimnü aniyüzahlim khiungde, ayunglim ju aniyüzahlimnü trükbo kilim jihkhi shihcham arihde aniakhiuklim aredung khiungde ajihbah.

⁸Ha Israel ching api lakhit-kukruk thsübah. Tüsho I yo kiulongthsürübonü küyimkishe I mihtsürü mujuno; tüshe arünü Israel yamkhün kilim arü trük yande alo lushihbah.

⁹Atungpuh THRÜNPUHNÜ ha thachoh: Suhdo, O Israel kiulongthsürübo! Athsümünim tüsho junokhi bahyukang, tüsho tümü thiyuro tüsho alungkianü rhimoang. Nüsanü I mihtsürü yankhitkhi arün thsang, Atungpuh THRÜNPUHNÜ thachoh.

¹⁰Nüsanü adünara tüsho akeara thiyuro labeah.

¹¹Epha tüsho bath ane ju rukhüh labeah, bath ching ju homer 10 ching shihchamkhüh zahlah, tüsho epha ching homer 10 ching shihchamkhüh zahlah; ane chido thsungkheaknü homer ju amünchi akekhi labeah.

¹²Shekel ju gera 20 labah. Nüsa thsungkheaknü shekel 20, shekel 25, tüsho shekel 15 ju mina khülang labah.

¹³Nüsanü kingaün jihpü ju ha labah: wheat hi homer aban chingnü epha 6 ching shihchamkhüh, tüsho barli hi homer aban chingnü epha 6 ching shihchamkhüh labah,

¹⁴tüsho müdangke bathnü adünkhi ju, kor aban chingnü bath 10 chingnü shihchamkhüh labah (kor ju homer nangde, bath 10 zahlah);

¹⁵tüsho Israel rimlopung chingnü, namfimihnu 200 aban chingnü namfimihnu 1 labah. Ha kingaünbo ju arü dünthsükhipü hi kingaün, taka kingaün, tüsho mungtsü kingaün labah, Atungpuh THRÜNPUHNÜ thachoh.

¹⁶Lomi mihtsürü alalanü ha kingaün Israel ching kiulongthsüpuh jihbah.

¹⁷Tüshe taka kingaün, hi kingaün, tüsho ayungbe kingaün, thüniobo, khinu aso, amunibo, Israel yamkhün yo akhukhitkhi thünio alala ching thsungkheaknü kiulongthsüpuh rhimo ha labah: apinü neak kingaün, hi kingaün, taka kingaün tüsho mungtsü kingaünbo Israel dünthsükhipü jihbah.

¹⁸Atungpuh THRÜNPUHNÜ ha thachoh: Akhuhbe khinu, atan ni, nüsanü lapha mükihkhi moshipung 1 lubah tüsho arüngakopung müsühkhitbah.

¹⁹Amükeambuhnü neak kingaünkhi thiyih khürü lubah tüsho arüngyam ripit dungbo kheak, kingaün sadam düthrün mühit phüyi ching, tüsho alungbe khikzhakpung ripit dungbo kheak yihkihbah.

²⁰Nüsanü ju ruk khinu ching nimung thüne ni müreanglimnü alakmihkhi yungsho makhakhi hode neak yihbeakrü thsungkheak rhimobah; junangde nüsanü arüngyam thsungkheak dünthsükhibah.

²¹Akhuhbe khinu ching, thürükheak phüyi ni, nüsanü phunghothünio arüngbah, tüsho nimung thüne phaüm muyukkhi yikhap tsühbah.

²²Ju nimung kiulongthsüpuhnü anihbuh tüsho lomi mihtsürü alala thsungkheak neak kingaünpü moshipung 1 jihbah.

²³Tüsho nimung thüne thünio lachoki apinü ATUNGPUH kilim taka kingaünpü lapha mükihkhi moshipung 7 tüsho namfimihnupung 7, nimung thüne thüne aban ni jihbah; tüsho nimung aban neak kingaünpü mihnu pung 1.

²⁴Apinü moshipung aban epha 1, namfimihnupung aban epha 1 tüsho epha aban müdangke pungdüchi 3 hi kingaün jihbah.

²⁵Khinu thüne ching nimung thürükheak phüngü ni tüsho nimung thüne thünio thsungkheak apinü neak kingaün, taka kingaün, hi kingaün, tüsho müdangke rukhüh lang ajihbah.