Read Yimchungru Naga Ezk 46 Bible Online

Ezk 46 - Yimchungru Naga bible

Ezk 46

¹Atungpuh THRÜNPUHNÜ ha thachoh: Alungbe khikzhakpung ripit aniakhiuklim abinkhi ju rhimopü lakhi nimung thuruk ni rihdoa labah; tüshe amunimung tüsho khinu aso nimung ha khimshuhbah.

²Kiulongthsüpuhnü mükü limro ching aleanglimnü yüzahbah, tüsho ripit dung ki api zhipbah. Amükeamrübonü api yo taka kingaünkhi, mungtsü kingaün jihbah, tüsho apinü düküyukpung kheak khukningbah. Jushu api wukhiukbah, tüshe ripit ju arelim khiungde mürih.

³Lomi mihtsürübonü amuni tüsho khinu asobo nimung ripit limro kheak ATUNGPUH miki khukningbah.

⁴Kiulongthsüpuhnü amuni ATUNGPUH kilim taka kingaün jihpü ju lapha mükihkhi namfimihnunu 6 tüsho namfimihnupung 1 labah;

⁵tüsho namfimihnupung lung hi kingaün jihpü ju epha 1, tüsho namfimihnunubo lung jihpü hi kingaün ju apinü akukkhi thülün, epha aban müdangke pungdüchi 1 labah.

⁶Khinu aso nimung apinü lapha mükihkhi moshipung 1 jihbah, tüsho lapha mükihkhi namfimihnunu 6 tüsho namfimihnupung 1;

⁷apinü moshipung lung hi kingaün epha 1 tüsho namfimihnupung lung epha 1 jihbah, tüsho namfimihnunu lung a apinü akukkhi thülün, epha aban müdangke pungdüchi 1 jihbah.

⁸Küyimki kiulongthsüpuh yüzahbanü, apinü mükü limro chingnü yüzahbah, tüsho apinü ju limronü wukhiukbah.

⁹Küyimki lomi mihtsürübonü akhukhitkhi thünio ching ATUNGPUH miki arübanü, sherü dukulim chipiripit chingnü yüzahbanü düjinglim chipiripit chingnü wukhiukbah; tüsho sherü düjinglim chipiripit chingnü yüzahbanü dukulim chipiripit chingnü wukhiukbah: arünü arü yüzahkhi chipiripit limronü rholode mutso, tüshe langdü lang mikhuhlim yübah.

¹⁰Küyimki arü azahbanü, kiulongthsüpuh ju arü lung azahbah; tüsho küyimki arü wukhiukbanü, api wukhiukbah.

¹¹Thüniobo tüsho akhukhitkhi nimungbo ching moshipung 1 lung hi kingaün epha 1 labah, tüsho namfimihnupung lung epha 1, tüsho namfimihnunubo lung apinü ajihpü kukkhi thülün, epha 1 aban müdangke pungdüchi 1 jihbah.

¹²Küyimki kiulongthsüpuhnü arung kingaün jihpü ATUNGPUH kilim taka kingaün tüsho mungtsü kingaün jihbanü, aniakhiuklim abinkhi chipiripit ju api thsungkheak khimshuhbah; tüsho apinü amuni rhimokhi nangde, taka kingaünkhi yungsho mungtsü kingaün jihbah. Jushu api wukhiukbah, tüsho api wukhiuk dunglim ripit ju arihbah.

¹³Apinü kam khülang bankhi namfimihnunu lapha mükihkhi 1 taka kingaün thsungkheak nimung aban jihbah; yapsu aban apinü ajihbah.

¹⁴Tüsho apinü yapsu aban mutukzhakde hi kingaün, epha 1 shihcham 6 ching 1, tüsho amokhitkhi ayikangkang neampü müdangke pungdüchi 1 shihcham 3 ching 1 ATUNGPUH kilim jihbah; ha kim alala thsungkheak thiyuzüng lah.

¹⁵Hanangde namfimihnunu, hi kingaün tüsho müdangke ju yapsu aban mutukzhakde taka kingaünpü jihbah.

¹⁶Atungpuh THRÜNPUHNÜ ha thachoh: Kiulongthsüpuhnü anihbuh yamrüplurüp chingnü atsührü khürü kilim thsambah khülang thsakhamsho, ju atsührübo yo thsübah, ju arü yamrüplurüp yamalo thsübah.

¹⁷Tüshe apinü anihbuh yamrüplurüp chingnü ayamlarü khürü kilim thsambah khülang thsakhamsho, ju api zuzu lapü kam khiungde api yo thsübah; jushu kiulongthsüpuh kilim jihlobah; api tsührübonü lang anihbuh yamrüplurüp chingnü thsambah khülang zopü kuklah.

¹⁸Kiulongthsüpuhnü mihtsürübo lakhit tümü she lude mutsobeah; apinü anihbuh lakhit chingnü atsührübo kilim yamrüplurüp jihbah, junangde I mihtsürü sheshe arü lakhit chingnü müyankhit.

¹⁹Jushu apinü chipiripit rheang ki lakhi yüzahpung hode dukulim mükeamrü amüsüh khiungshakbo ru ching I bedarü; tüsho ju ching inü aniyüzahlim akheam tsütsü kheak dangpung khülang ngü.

²⁰Apinü I ki tha, “Ha amükeamrübonü amülim kingaün tüsho neak kingaün tüsho hi kingaün dükihpung dangpung lah, junangde jurü aleangbe khikzhakpung ching hande muwukhiuk tüsho mihtsürübo ki amüsühkhitkhi muhuh.”

²¹Jushu apinü I aleangbe khikzhakpung ching bede wukhiuk, tüsho khikzhakpung mühit phüyi I hoshih; tüsho khikzhakpung mühit abande khikzhakpung püpü lakheah —

²²khikzhakpung mühit phüyi ching khikzhakpung anini, ashanglim khahnap 40 tüsho atolim 40 lakheah; phüyi ju rukhüh lakheah.

²³Khikzhakpung aban alunglim lung-rhü mükamde, ajingbo kheak mokinbo lakheah.

²⁴Jushu apinü I ki tha, “Harü ha arüngyam ching tankihrünü mihtsürübo thsungkheak laksah-a kingaünpü dükihpung mokinbo ah.”