Read Yimchungru Naga Ezk 47 Bible Online

Ezk 47 - Yimchungru Naga bible

Ezk 47

¹Jushu apinü I arüngyam ripit ki belodarü; arüngyam ching düküyukpung khüpnü ke bukde aniakhiuklim yüde alakheah (tümüde arüngyam ju aniakhiuklim abin); ke ju kingaün sadam düjinglim, arüngyam düjinglim thrip khüpnü bukde aki.

²Jushu apinü I dukulim chipiripit limronü bede wukhiuk, tüsho aniakhiuklim abinkhi aleangbe chipiripit aleanglim mükamde be; tüsho ke ju düjinglim bukkhitde alakheah.

³Api khah ching akesang shuhbah aniakhiuklim yüchoki, mihtsürü junü khahnap 1000 ake, tüsho I ju ke hode bede yü; tüsho ju lahzhi lokhüh sükde alakheah.

⁴Kheaküshe apinü 1000 ake, tüsho I ke hode bede yü; tüsho ju mukhuk lokhüh sükde alakheah. Kheaküshe apinü 1000 ake, tüsho I ke hode bede yü; tüsho ju chim khiungde akih.

⁵Kheaküshe apinü 1000 ake, tüsho ju inü müdükihhokhukpü thsüde ayung khülang lakheah, tümüde ke ju yükih; ha aphungpü khide sükde, müdükihhokhukpü thsüde ayung khülang lakheah.

⁶Apinü I ki tha, “Mihtsürü tsührü, nünü ha ngüdü shi?” Jushu apinü I ayung münküp yeande belodarü.

⁷I alode arüchoki, ayung khülang münküp kheak thripkhüh tüsho püpü thrip sangdung ahihdo inü ngü.

⁸Apinü I ki tha, “Ha ke aniakhiuklim bukde yüchoh tüsho Araba lim yükichoh; tüsho küyimki ha amubukkhi keto ching yüzahbanü, ke ju aso kambah.

⁹Ayung kürü ching yübanü, abükhi lorilokobo rhangdung labah, tüsho ju ching ha kebo khiungsho thüngüh hihde alabah. Ha aso kambah; tüsho ayung kürü ching yübanü, lüpdükhi rhangdung labah.

¹⁰Mihtsürübonü keto yean Engedi kheaknü Engelaim khiungde thüngüh ramde azhipbah; ju keang jippü dangpung khülang labah; thüngüh ju Keto Ato ngüh nangde atoto aphuaphu ahihdo labah.

¹¹Tüshe alomukmukbo tüsho akhimniuhniuhbo aso kamde mütsangkhit; jurübo thimi thsungkheak aninga labah.

¹²Ayung münküp thrip abande, tsühyungpü thsungkheak sangdung aphuaphu mukhuhbah. Ayübo muyiuh yungsho asobo mayo, tüshe khinu abande aphüyak asobah, tümütüsho arü thsungkheak arüngakopung chingnü ke bukchoh. Sangasobo ju tsühyungpü thsungkheak labah, tüsho ayübo ju moli labah.”

¹³Atungpuh THRÜNPUHNÜ ha thachoh: Harü ha Israel trük thürükheak mahne bolung nünü lomi yamrüplurüp champü aredungbo lah. Josep a dangpung mahne labah.

¹⁴Nünü ju arihkhühnü achambah; inü ha nüsa jipürü kilim jihpü thiyuchihchim, tüsho ha lomi ju nü yamrüplurüp thsübah.

¹⁵Ha lomi aredung labah: Dukulim Ato Keto chingnü Hethlon limro yande Lebo-hamath, tüsho Zedad khiungde,

¹⁶Berotha, Sibraim (küpü Damaska tüsho Hamath aredungyean la), Hauran aredungyean kheak lakhi Hazar-hattikon khiungde.

¹⁷Junangde aredung ju keto chingnü Hazar-enon khiungbah; ha dukulim Damaska aredungyean, Hamath lah. Ha dukulim thrip labah.

¹⁸Aniakhiuklim ju Hauran tüsho Damaska dükeak labah; Gilead tüsho Israel lomi dükeak Jordan yeande alabah; aniakhiuklim keto tüsho Tamar khiungbah. Ha aniakhiuklim thrip labah.

¹⁹Düjinglim thrip Tamar chingnü Meribath-kadesh kebo khiungbah, ju chingnü Ijip ayung yeande Ato Keto khiungbah. Ha düjinglim thrip labah.

²⁰Aniyüzahlim thrip, Lebo-hamath mikhuh kheak Ato Keto ju aredung labah. Ha aniyüzahlim thrip labah.

²¹Jumonü nünü nüsa bolung Israel trükbo yande ha lomi chamnakbah.

²²Nünü ha nüsa thsungkheak tüsho nüsa lung larü khiungkerü nüsa bolung tsührü larü thsungkheak yamrüplurüp khülang nangde chama jihbah. Arünü nü lung Israel mihkhung nangde alabah, nü lung arübo kilim Israel trük bolung yamrüplurüp jihbah.

²³Sherü trük ching khiungkerü lanü, ju ching nünü arü kilim arü yamrüplurüp jihbah, Atungpuh THRÜNPUHNÜ thachoh.