Read Yimchungru Naga Ezk 6 Bible Online

Ezk 6 - Yimchungru Naga bible

Ezk 6

¹ATUNGPUH yu I ki arü:

²Mihtsürü tsührü, nü miro Israel müzüngbo lim anguhang; arü azhihde müchitang,

³tüsho thaang: O Israel müzüngbo, Wuto ATUNGPUHNÜ müzüngbo tüsho awungbo, alokhün asük tüsho jindükhünbo ki ha thachoh. Inü nukshang khülang nü azhihde handarüpü lah, tüsho nü yo achang dangpungbo inü thsümünimbah.

⁴Nü yo kingaün sadambo thsümünimbah tüsho nü yo rhümthünea kingaün sadambo kingkheambah; tüsho inü nü mihtsürübo nü sangthsübo mikinü alaksahbah.

⁵Inü Israel ashemibo arü sangthsübo miki yapshihbah, tüsho nü robo nü kingaün sadambo mühide hiumüzütbah.

⁶Nü kürü ching labanü, kiutobo thsümünima yapbah tüsho achang dangpungbo thsümünimbah, junangde nü yo kingaün sadambo thsümünima yapbah, nü sangthsübo kingnakbah tüsho thsümünimbah, rhümthünea kingaün sadam kingkheambah, tüsho nü rhimobo dükheakbah.

⁷Nüsa bolung alaksahkhi yapbah, tüsho I ATUNGPUH de nünü mükheahbah.

⁸Tüshe inü khürü aningshihbah, tümüde nüsa lomibo tüsho trükshih bolung müzütchoki nüsa khürü nukshang chingnü atsokhitbah.

⁹Judüki arü ramde ayükhi trükshihbo ching atsokhitrünü I lümkhitbah — künangde arü müzammüram mulongbonü I mulong tukthsüshihkhea, küpü I kheaknü rholode atsokhea, tüsho arü mükjibonü arü sangthsübo kheah-a mürühkhea. Arünü arhimokhi amütsü thsungkheak tüsho arünü athraneanbe rhimokhi alala arünü amukhiukbah.

¹⁰Tüsho I ATUNGPUH de arünü mükheahbah; inü ha thsümütsü arü kheak handarüpü akeangkeang ching müzünkhi yung.

¹¹Wuto ATUNGPUHNÜ ha thachoh: Nü khahbo damang tüsho nü jingbo adande Israel yamkhünnü mihbukmuyuk tüsho athraneanbe rhimokhi alala dünkheaknü “Aha!” de zhiang, tümüde arübo nukshang, khümzung tüsho arümnü akeambah.

¹²Api shepü limshude lanü arümnü ashebah, tüsho shepü phünide lanü nukshangnü akeambah, tüsho shepü rhangdung lanü tüsho aninga lanü khümzungnü ashebah. Junangde I mulong zhipzhip arü kheak labah.

¹³Tüsho awung achang aban tüsho müzüng mujukbo kheak, sangdung düthreang tüsho thülamsang yüniuniu aban khüp arünü arü sangthsübo alala kilim rhümthüneabe jihkhi dangpungbo ching arü laksah-a yapchoki I Thrünpuh ah de arünü mükheahbah.

¹⁴Tüsho inü arü azhihde I khah chungkhitbah tüsho loshelo chingnü Bibla khiungde alomi ju thsümünima zhikrangkhündo kamshihbah. Judüki I ATUNGPUH de arünü mükheahbah.