Read Yimchungru Naga Ezk 7 Bible Online

Ezk 7 - Yimchungru Naga bible

Ezk 7

¹ATUNGPUH yu I ki arü:

²Mihtsürü tsührü, ha Wuto ATUNGPUHNÜ Israel lomi ki thachoh: Akheam! Lomi thrip phüyi ching akheam arüdo.

³Kheakü nü kheak akheam lah tüsho nü azhihde I bukakhiukkhi trünkhibah. Inü nü rhimorhiyi ayannü nü mahkhapbah tüsho nünü athraneanbe rhimokhi alala jihlobah.

⁴Inü nü kheak mihmuzhode mükheah yungsho nü maningshih; inü tsükjide nü rhimorhiyi tüsho nüsa bolung nünü athraneanbe rhimokhi ayannü ajihlobah. Judüki I ATUNGPUH de nünü amükheahbah.

⁵Wuto ATUNGPUHNÜ ha thachoh: Thsümütsü! Amusokhi thsümütsü arüchoh.

⁶Akheam arüdo! Akheam arüdo! Hanü nü azhihde aküdahnü wusudo. Ha arüdo!

⁷Thsümüchi nüsa kheak arüdo — nüsa sherü lomi ching la. Kim arüdo, nimung phünide lah; müzüngbo kheak thsünükhi lah, asühpü yung.

⁸Inü nüsa kheak I mulong zhipzhip yükihshihpü tüsho I bukakhiukpü lah; inü nü rhimorhiyi ayannü mahkhapbah tüsho athraneanbe rhimokhi alala ayannü ajihlobah.

⁹Inü nü kheak mihmuzhode mükheah yungsho nü maningshih; inü nü rhimorhiyi tüsho nüsa bolung athraneanbe rhimokhi ayannü ajihlobah; judüki adambuh ju I ATUNGPUH de nünü mükheahbah.

¹⁰Israel thsungkheak thsümütsü nimung arüchoh. Laksahachihkhi alü kamchoh, kükheangküyang kumung lim lah.

¹¹Athsümünimnü mihbukmuyuk alü kamshihchoh; arü sheshe, lakhit amo-achak tümü maning.

¹²Kim arüdo, nimung khiungdo. Athulorü dasühachihshih yungsho ayinrü dülungrishih, tümüde mulong zhipzhip ju alomi athrünkhi kheak lah.

¹³Ane chido la khiungdüa ayinrünü ayinkhi lo müngülo, tümüde boto athrünkhi dünkheak michih ju lah. Arü neakbo dünkheaknü arü khülang lang she nihbuh rhangdung mülade alabah.

¹⁴Arünü hulipungpung mütmüt she tüsho lüpdükhi tsanglunglung she, sheshe keochih ching müyüzah, tümüde I mulong zhipzhip boto athrünkhi kheak lah.

¹⁵Wungdo ching nukshang lah, alunglim arüm tüsho khümzung lah; mükeak ching larübo nukshangnü ashebah, tüsho kiuto ching larübo khümzung tüsho arümnü amuyubah.

¹⁶Rhangdung larü tüsho atsokhitrü alala müzüngbo ching labah, mihbüm aban nihbuh neak dünkheaknü jindükhün müthrithrümpübo nangde ashearabah.

¹⁷Mihbüm aban khah keakeade akambah, tüsho mukhukbo niukbah.

¹⁸Arünü shungliukhim phuyubah tüsho atrebe khümbah. Arü mirobo kheak achihkhi labah tüsho arü kubo hütbah.

¹⁹Arünü arü shotoyinchi kiudunglimrobo ching bahbah, tüsho arü suna mümüsühkhi kukruk labah. Arü shotoyinchi tüsho sunanü ATUNGPUH mulong zhipzhip nimung ching arü mükhümkhit. Junü arü khümkhi reangmükeamshih yungsho bukmüthsüshih, tümüde hanü arü neak ching jing mükheshihdo.

²⁰Arünü arü mürezhingzhing kheahtsübo hode kükheang tüsho ju athraneanbe sangthsübo le maphapkhi mejakbo thsüpü lu. Jumonü inü harü arü thsungkheak mümüsühkhi kukruk kamshihbah.

²¹Inü harü lakhit khiungkerübo tüsho lomi mihbukmuyuknü yankhia lushihbah tüsho arünü ju müneanjihbah.

²²Inü arü kheaknü I miro rholode atsobah, tüsho arünü I rahpung zopung müneanjihbah; jangkhijangrarünü ju ching yüzahbah tüsho ju müneanjihbah.

²³Yinchiliubo tsanglungang, tümütüsho alomi ju thiyih bukkhinü milah tüsho kiuto athsümünimnü milah.

²⁴Inü arü yambo lushihpü amütsü trükshihbo bedarübah; tode kükheangrü inü akheamshihbah, tüsho arü arüngyambo müneanabahbah.

²⁵Küyimki atrebe arübanü, arünü mungtsü yimbah, tüshe arünü tümü müngü.

²⁶Thsümütsünü thsümütsü kheak yankihbah, tüsho alanajinü alanaji labah. Arünü wukihrü kheaknü michih ngüpü mürangbah; amükeamrünü yakzan thsangyukhi, azothsürübonü lümthiyan jihpü dükheakbah.

²⁷Kiulongthsüpuhnü mitripbah, yakzanshuhrünü lümlung dükheakde khim phuyubah, tüsho lomi mihtsürü khahbo ajanbah. Inü arü rhimorhiyi yande tsangshubah, tüsho arü nihbuh lalimlako yande mahkhapbah. Judüki I ATUNGPUH de arünü mükheahbah.