Read Yimchungru Naga Ezk 8 Bible Online

Ezk 8 - Yimchungru Naga bible

Ezk 8

¹Kam thuruk, khinu thuruk nimung phüngü nipü, küyimki I yam ching I binde lakhea tüsho Juda azothsürübo I miki binde lakhea, Wuto ATUNGPUH khah I kheak arü.

²Inü kheah, tüsho inü mihtsürü jakphü nangde ngü. Api chim abolim ju mo nangde la, tüsho junü akulim ju müwayinchi phezhingzhingkhi nangde la.

³Apinü khah nangde chungkhit tüsho I kuyü kheaknü zünga lu. Menü I alomi le yinmi dükeak shuhkih tüsho Thrünpuh michih ching apinü I Jirusalem lim, alungbe khikzhakpung dukulim ripit yüzahpung, sangthsünü Thrünpuh bukakhiukshihpung bebah yüzah.

⁴Tüsho inü adükhün ching michih ngükhi nangde, I miki Israel Thrünpuh müretahkhi lakheah.

⁵Judüki apinü I ki tha, “Mihtsürü tsührü, dukulim kheahang.” Jumonü inü kheah, tüsho kingaün sadam ripit dukulim yüzah lim inü ha mükthsüshihkhi sangthsü ngü.

⁶Apinü I ki tha, “Mihtsürü tsührü, Israel yamkhünnü I arüngyam chingnü limshude yanabahde athraneanbe ato rhimokhi nünü ngüchonah? Tütüshe nünü kheaküshe athraneanbebo atobe ngübah.”

⁷Jushu apinü I khikzhakpung limro bebah arü. Inü kheah, tüsho inü rhü ching akhün khülang ngü.

⁸Apinü I ki tha, “Mihtsürü tsührü, kheakü rhü yeahshungang.” Jumonü inü rhü yeahshung tüsho ju ching ripit-limro khülang ngü.

⁹Tüsho apinü I ki tha, “ Yüzahang tüsho ha ching arünü arhimokhi mihbukmuyuk tüsho athraneanbebo kheahang.”

¹⁰Jumonü inü yüzah tüsho kheah, tüsho rhübo kheak chinde atsahbe, athraneanbe shiwühbo thrünkihkhi tüsho Israel yamkhün sangthsübo alala ngü.

¹¹Jurü mikhuh ching Israel yamkhün azothsürübo 70 zhip tüsho Shaphan tsührü Jaazania arü bolung zhipde alakheah. Mihbüm aban khah ching mophüh lakheah, tüsho rhümthünea mokhüh liukihde alakheah.

¹²Apinü I ki tha, “Mihtsürü tsührü, Israel yamkhün azothsürübonü nihbuh sangthsü kingaünpung ching ramde tümü rhimochonü ngünah? Arünü tha, ‘ATUNGPUHNÜ isa müngü; ATUNGPUHNÜ alomi bahyukdo.’”

¹³Kheaküshe apinü tha, “Arünü alü athraneanbe rhimokhi nünü angübah.”

¹⁴Jushu apinü I ATUNGPUH yam ripit dukulim limro kheak bedarü, tüsho ju ching aliberübo Tammuz mitripde abinkhi I ki huh.

¹⁵Apinü I ki tha, “Mihtsürü tsührü, nünü ha ngüchonah? Ha kheaknü alü athraneanbebo nünü angübah.”

¹⁶Jushu apinü I ATUNGPUH yam khikzhakpung alungbe ching bede yüzah tüsho arüngyam limro kheak mükü le kingaün sadam dükeak mihtsürü 25 lakheah. Arü düthsün ATUNGPUH arüngyam lim thsü tüsho arü miro aniakhiuklim abinbah ani ki khukningde alakheah.

¹⁷Apinü I ki tha, “Mihtsürü tsührü, nünü ha ngünah? Juda yamkhünnü ha ching athraneanbe rhimokhi ha anikhüh-a de? Arünü athsümünimnü lomi she amishihba de tüsho mutuklode I bukakhiukshihba de? Arünü khide mükhemükimde arhimokhi kheahang!

¹⁸Jumonü inü bukakhiukde arü ki rhimobah; inü arü ki muzhode mükheah yungsho arü maningshih. Arünü I nükhün ching zhizhi she, inü arü ki mani.”