Read Yimchungru Naga Ezk 9 Bible Online

Ezk 9 - Yimchungru Naga bible

Ezk 9

¹Judüki apinü düsheak achangnü ajikhi inü so, “Mihbüm aban khah ching thsühnuk shuhbah ha kiuto aheangrübo bebah arang.”

²Tüsho inü mihtsürü 6 achangbe chipiripit dukulim abinkhi limnü mihbüm aban nihbuh khah ching ashebe thsühnuk shuhbah arükhi ngü. Arü lung mihtsürü khülang khim zhingzhing phuyubah api rheang ki athrütbe lade ngü. Arünü azah tüsho müwayinchi kingaün sadam yean zhip.

³Kheakü Israel Thrünpuh müretahkhi ju alapung cherubim kheaknü arüngyam ripit ki wutu. Judüki athrütrü arheang ki labuh khim zhingzhing yihbuh ki ATUNGPUHNÜ ji;

⁴tüsho api ki tha, “Jirusalem hode yüang tüsho arünü athsükhi athraneanbe alala kurungkheak lungrirü tüsho tüzhorü kingkangbo kheak amütsan yihkihang.”

⁵Inü anichoki, apinü püpürü ki tha, “ Kiuto hode api yande yüang tüsho mihmuzho yungsho lümrhihkhi mülade laksahang.

⁶Ashinbuhrü mihtsürü, athrününgtsüng tüsho anünürü, azoberü tüsho azürü laksahang, tüshe amütsan kihrü sheshe düqiu. I arüngyam kinü tankihang.” Jumonü arünü arüngyam miki larü azothsürü kheaknü tankih.

⁷Judüki apinü arü ki tha, “Arüngyam müneanjang tüsho khikzhakpung ju ashemibonü mishang. Yüang!” Jumonü arünü wukhiuk tüsho kiuto lüpdükhi ching laksah.

⁸Küyimki arünü laksahde alakhea tüsho I langzü lakhea, I miro mükhümbah zhi, “Ah, Wuto A TU N GPU H ! Jirusalem kheak nü bukakhiuk dungkihkhi ching Israel aningkhi abümnü nünü alaksahkhamba de?”

⁹Apinü I ki alo, “ Israel tüsho Juda yamkhün neak khide tolah; alomi ju thiyih bukkhinü milah tüsho kiuto thiyuro mülakhinü milah. Arünü thachoh, ‘ATUNGPUHNÜ alomi bahyukdo; ATUNGPUHNÜ mükheah.’

¹⁰Jumonü inü arü kheak muzhode mükheah yungsho arü maningshih, tüshe arünü arhimokhi inü arü nihbuh kubo kheak handarübah.”

¹¹Judüki api rheang ki athrütbe labuh khim zhingzhing yihbuh mihtsürünü thiyu hanlodarüde tha, “ Nünü thiyukhüm jihkhi nangde inü rhimodo.”