Read Yimchungru Naga Daniel 1 Bible Online

Daniel 1 - Yimchungru Naga bible

Daniel 1

¹Juda kiulongthsüpuh Jehoiakim kiulongthsü kam asampü ching Babilon kiulongthsüpuh Nebukednezarnü Jirusalem ching arü tüsho ju yanabah.

²ATUNGPUHNÜ Juda kiulongthsüpuh Jehoiakim tüsho Thrünpuh yam ching yo pungphuru khürü api khah ching jih. Apinü harü Shinar lomi ching handarü, tüsho pungphurubo ju api thrünpuhbo rahpung-yam ching zo.

³Judüki kiulongthsüpuhnü api yam putungrü Ashpenaz ki Israelrü khürü kiulongthsü yamkhün tüsho mükheahmudurü chingnü bedarüpü thiyukhüm jih —

⁴athrününgtsüng mihtsürü shihphü ching areak mülarü tüsho trungdung atsü, lümlung ching thsambah larü, mükheahmudu lakhi tüsho nahde anikhitrü, kiulongthsüpuh yam ching tankihpü athülün; arü ki Kaldearü yuthrüt tüsho yutha thsangyupü lakheah.

⁵Kiulongthsüpuhnü arü kilim kiulongthsürü jim tüsho yukhu nimung aban shihcham jih. Arü ju kam mahsam mükheahmudushihbah, junangde ju kim akheam ching kiulongthsüpuh miki tankihpü lakheah.

⁶Arü bolung ju Juda trük chingnü Daniel, Hanania, Mishael, tüsho Azaria lakheah.

⁷Akubeatobuhnü arü kilim püpü mung asobo jijih: apinü Daniel ki Belteshazzar de ji, Hanania ki Shadrak, Mishael ki Meshak, tüsho Azaria ki Abednego de ji.

⁸Tüsho Danielnü kiulongthsü jim tüsho yukhu hode anihbuh mümüneanpü lümalo; jumonü apinü anihbuh mümüneanshihpü akubeatobuh ki keokhi.

⁹Kheakü Thrünpuhnü akubeatobuh ki Daniel lümrhihshihpü jih.

¹⁰Akubeatobuhnü Daniel ki tha, “ Inü I tungpuh kiulongthsüpuh trelah; kiulongthsüpuhnü nü kilim atsühpü tüsho ayungpü akhua jihdo, tüsho nü thülünrü püpürü athrününgtsüng kheaknü nü müthülünde apinü ngüsho, apinü I laksahbah.”

¹¹Judüki Daniel, Hanania, Mishael, tüsho Azaria kurungkheak akubeatobuhnü mokhitkhi aheangbuh ki Danielnü tha:

¹²“Muzhobah nü yamlarübo nimung thürü rükakiang. Isa kilim atsühpü awophüyak tüsho ayungpü ke jihang.

¹³Jushu nünü kiulongthsü jim tsührü püpürü athrününgtsüng shihphü ki isa shihphü akeakheahang, tüsho nünü akheahkhitkhi yande nü yamlarübo ki rhimoang.”

¹⁴Jumonü apinü ha lümkhi mulongkhit tüsho nimung thürü thsungkheak arübo rükaki.

¹⁵Nimung thürü akheam ching arübo ju kiulongthsü jim tsührü athrününgtsüngbo alala kheaknü shihphü atsü tüsho shihkihde kheahkhit.

¹⁶Jumonü aheangbuhnü arünü atsühyungbe kiulongthsü jim tüsho yukhu lulo, tüsho arü kilim wokephüyakbo jih.

¹⁷Harü athrününgtsüng phüyi kilim Thrünpuhnü mükheahmudu tüsho yuthrüt alala ching ayeanzam tüsho lümlung jih; Daniel she michihbo tüsho milimbo alala ching anikhitkhi lakheah.

¹⁸Nimung akheam ching küyimki kiulongthsüpuhnü arü bede azahpü thakhea, akubeatobuhnü Nebukednezar miki arü bede yüzah.

¹⁹Judüki kiulongthsüpuhnü arü ki asuk tüsho arü alala bolung Daniel, Hanania, Mishael, tüsho Azaria kheak akede sheshe müngükhit; jumonü arübo ju kiulongthsüpuh miki tankih.

²⁰Lümlungbo tüsho anikhitkhi ching kiulongthsüpuhnü arü ki keokhikhi lüpdükhi ching apinü arübo api kiulongthsü athrünkhi ching kuhikheahrü tüsho wurük-huhrü alala kheaknü thürü kinü atsübe kheahkhit.

²¹Tüsho Sairus kiulongthsüpuh akhuhbe kam khiungde Daniel ju ching lakheah.