Read Yimchungru Naga Daniel 5 Bible Online

Daniel 5 - Yimchungru Naga bible

Daniel 5

¹Kiulongthsüpuh Belshazzarnü api putungrübo chithürü thsungkheak anioji ato khülang thsakham, tüsho apinü chithürü miki yukhu yungde alakheah.

²Belshazzarnü yukhu yungakede alachoki, abuh Nebukednezarnü Jirusalem ching arüngyam chingnü ayihkhitkhi suna tüsho shotoyinchi pungphurubo lude azahpü thiyukhüm jih, junangde kiulongthsüpuh, api putungrü, aniubebo, tüsho hanniubebonü jurü chingnü ayungpü lakheah.

³Jumonü Jirusalem ching Thrünpuh yam, arüngyam chingnü ayihkhitkhi suna tüsho shotoyinchi pungphurubo lude azah, tüsho kiulongthsüpuh le api putungrübo, aniubebo, tüsho hanniubebonü jurü chingnü yung.

⁴Arünü yukhu ju yung tüsho suna le shotoyinchi, müwayinchi, yinchi, sang, tüsho lung thrünpuhbo shijih.

⁵Zukleangnü mihtsürü yingkhingbo akhiuk tüsho kiulongthsüpuh yam rhü lüpkhi kheak tsünpung dubopung ki thrütpü tankih. Thrütde alachoki kiulongthsüpuhnü khah ju kheahde alakheah.

⁶Judüki kiulongthsüpuh miro pheakmulukdo kam, tüsho api lümkhilümduhnü anihbuh trede kamshih. Api jingkhahbo shekhiabah, tüsho amukhukbo lakachih.

⁷Kiulongthsüpuhnü wurük-huhrü, thümürü tüsho Kaldearü bede azahpü zhi; tüsho kiulongthsüpuhnü Babilon lümlung larü mihtsürübo ki tha, “Shepünü ha thrütkhi khekhukba tüsho athanakkhi I ki thabanü mürümmüri khim phuyujihbah, suna wuhrünlak ahung ching lakshihbah, tüsho kiulongthsü-binkiu asampü ching labah.”

⁸Judüki kiulongthsüpuh yo lümlung larü mihtsürü alala azah, tüshe arünü athrütkhi ju mükhekhuk yungsho kiulongthsüpuh ki müthanakkhuk.

⁹Judüki kiulongthsüpuh Belshazzar ju khide treabah tüsho amiro pheakmulukdo kam, tüsho api putungrübo ju zhazhaabah.

¹⁰Kiulongthsübenü küyimki kiulongthsüpuh tüsho api putungrübo atsangachihkhi sokheanü, aniojikhi yam ching yüzah. Kiulongthsübenü tha, “ O kiulongthsüpuh, kutsüpde laang! Nü lümkhilümduhbonü nü trede dükamshih yungsho nü miro pheakmulukdo dükam.

¹¹Nü kiulongthsü ching amüsüh Thrünpuh me lakhi mihtsürü khülang lah. Nü buh nimungbo ching api kheak sulüm, anikhitkhi, tüsho thrünpuhbo lümlung nangde alakhi ngükhitdo. Nü buh, kiulongthsüpuh Nebukednezarnü api wurük-huhrü, kuhi-kheahrü, Kaldearü, tüsho müchitrü kurungkheak atobuh kamshih,

¹²tümütüsho, kiulongthsüpuhnü Belteshazzar de ajijihkhi Daniel kheak athukhi me, mükheahmudu, tüsho milim yihthünakpü anikhitkhi, aramyu thanakpü tüsho lümkhilümduh mulong-mülüpü lakheah. Kheakü Daniel jishang, tüsho apinü thanaka jihbah.”

¹³Judüki Daniel ju kiulongthsüpuh miki bede yüzah. Kiulongthsüpuhnü Daniel ki tha, “ Nü Daniel, I buh kiulongthsüpuhnü Juda chingnü bedarükhi, Juda ramtsorü khülang a de?

¹⁴Thrünpuh me tüsho mükheahmudu anikhitkhi tüsho lümlung nü kheak lah de inü sodo.

¹⁵Kheakü lümlung larü mihtsürü wurük-huhrü I ki ha thrütkhi khepü tüsho thanakshihpü bede azah, tüshe arünü ju amütsan müthanakkhuk.

¹⁶Tüshe nünü thanakkhukchoh tüsho lümkhilümduh mulong-mülüchoh de inü sodo. Kheakü nünü athrütkhi khekhuksho tüsho thanakkhuksho, nü kheak mürümmüri khim phuyujihbah, nü hung mükamde suna wuhrünlak khülang jihbah, tüsho kiulongthsü ching asampü ching lashihbah.”

¹⁷Judüki Danielnü kiulongthsüpuh mikinü alo, “ Nü thsambahbo nü thsungkheak zoang, yungsho nü thsambahbo khürü kilim jihang! Judüalalashe inü athrütkhi ju kiulongthsüpuh ki khebah tüsho ju amütsan api ki thabah.

¹⁸O kiulongthsüpuh, Khide Achang Thrünpuhnü nü buh Nebukednezar kilim kiulongthsü, ato, müretah, tüsho mungthu jih.

¹⁹Tüsho apinü anihbuh kilim ato jihkhi hode, mihtsürü alala, trükshihbo, tüsho thiyuthabonü api miki ajan tüsho tre. Apinü sherü laksahnelanü laksah, sherü arhang lashihnelanü lashih, sherü shuhkihpü lümlanü shuhkih, tüsho sherü mükhemükimnelanü mükhemükim thsü.

²⁰Tüshe küyimki api mulong müküpde tüsho kükheangde kamkhea, api kiulongthsü-binkiu kheaknü akishih tüsho api müretahkhi luabahjih.

²¹Api ju mihtsürü boto chingnü yanabah, tüsho api lümkhi ju shiwüh nangde kamshih. Api lapung mütüm donki lung lashih, moshipung nangde rim tsühshih, tüsho Khide Achang Thrünpuhnü mihtsürü kiulongthsü kurungkheak yakzan shuhchoh, tüsho apinü alümkhi kheak zojihchoh de apinü manikhityi khiungde api pang ayinkenü pangshih.

²²Tüsho nü, api tsührü Belshazzar, nünü ha alala mükheahkheah she nü mulong mazhihayih!

²³Nünü yinmi Thrünpuh azhihde nihbuh zangrü shuhkihdo! Api arüngyam pungphurubo nü miki lude azah, tüsho nü putungrübo, nü niubebo tüsho nü hanniubebonü jurü chingnü yukhu yung. Nünü shotoyinchi tüsho suna, müwayinchi, yinchi, sang, tüsho lung thrünpuhbo, küpünü müngü yungsho muso yungsho mümükheahnü ju shijih; tüshe Thrünpuh shepü khah ching nü rhangdung la, tüsho shepü kilim nü limro alala lanü, nünü wüntre müjih.

²⁴“Jumonü api kilimnü ha thrütpü khah arüshih.

²⁵Tüsho athrütkhi ju ha: M E N E, M E N E, T E K E L, tüsho P A R S I N.

²⁶Amütsan thanakkhi ha: M E N E, Thrünpuhnü nü kiulongthsü kheakheahdo tüsho akheam thsüshihdo;

²⁷T E K E L, adünarabe kheak nü adünakheahdo tüsho mukhiukde ngüdo;

²⁸P E R E S, nü kiulongthsü chamnakdo tüsho Midiarü le Persiarü kilim jihdo.”

²⁹Judüki Belshazzarnü thiyukhüm jih, tüsho mürümmüri khim Daniel kheak phuyujih, suna wuhrünlak ahung mükamde yukjih, tüsho kiulongthsü ching api binkiu asampü ching lapü dünkheak zhiyukjih.

³⁰Ju tsüngrenü Kaldea kiulongthsüpuh Belshazzar ju laksah.

³¹Tüsho Midiarü Darius, kam 62 azorünü kiulongthsü leangkhia lu.