Read Yimchungru Naga Hosea 1 Bible Online

Hosea 1 - Yimchungru Naga bible

Hosea 1

¹ATUNGPUH yusheak ha Juda kiulongthsürü Uzzia, Jotham, Ahaz, Hezekia tüsho Israel kiulongthsüpuh Jehoash tsührü Jeroboam nimungbo ching Beeri tsührü Hosea kilim arü.

²Küyimki akhuhde ATUNGPUHNÜ Hosea hode asukkhea, ATUNGPUHNÜ Hosea ki tha, “ Yüang, müzammüramberü nü niube thsüpü luang tüsho müzammüramrü tsührübo lashang, tümüde lominü ATUNGPUH bahyukde müzammüram ato yihbeakdo.”

³Jumonü apinü yü tüsho Diblaim tsührübe Gomer lu, tüsho alibe mübünkeangde kambah api kilim tsührü khülang zübejih.

⁴Tüsho ATUNGPUHNÜ api ki tha, “Api mung Jezreel jiang; tümüde anükhüh labah Jezreel thiyih dünkheaknü Jehu yamkhün thsümüchibah, tüsho inü Israel kiulongthsü akheam thsüshihbah.

⁵Ju nimung inü Jezreel jindükhün ching Israel sanglüh yihshakbah.”

⁶Alibe mübünkeanglode kam tüsho tsührü aliberü khülang zübejih. Judüki ATUNGPUHNÜ api ki tha, “Alibe mung Lo-ruhama de jiang, tümüde kheaküa inü Israel yamkhün mümuzho yungsho arü neak mübahjih.

⁷Tüshe inü Juda yamkhün kheak muzhobah; inü arübo sanglüh, yungsho nukshang, yungsho thirithsü, yungsho khorabo, yungsho khoraberü hode mükhümkhit; tüshe I ATUNGPUH arü Thrünpuh hode arü khümkhitbah.”

⁸Küyimki anihbenü Lo-ruhama niuh chamkhea, alibenü tsührü khülang zübe.

⁹ATUNGPUHNÜ tha, “Api mung Lo-ammi jiang, tümüde nüsa I mihtsürü yung tüsho I nüsa Thrünpuh yung.”

¹⁰Tütüshe Israel mihtsürü khekhi ju madünkhuk yungsho mükhekhukkhi keto loyi nangde alabah; tüsho arü ki, “ Nüsa I mihtsürü yung,” de athakhi müthri arü ki thabah, “Arhang Thrünpuh tsührü.”

¹¹Juda mihtsürü tüsho Israel mihtsürü rukhüh mukhungbah, tüsho arünü arü thsungkheak limberü khülang mokhitbah; tüsho arünü alo müküh-a lubah, tümüde Jezreel nimung ju ato labah.