Read Yimchungru Naga Hosea 10 Bible Online

Hosea 10 - Yimchungru Naga bible

Hosea 10

¹Israel a aso hihkhi kurungaso nangde lah. Api aso hih yande, apinü kingaün sadam alü thsü; api lomi lakhit yande, api dungjingbo alü thsü.

²Arü mulong amülim lah; kheakü arünü mülimkhi hanbeah. ATUNGPUHNÜ arü kingaün sadambo lukkheambah, tüsho arü dungjingbo thsümünimbah.

³Tümüde kheakü arünü athabah: “ Isa kiulongthsürü müla, tümütüsho isanü ATUNGPUH mütre. Tüshe kiulongthsüpuhnü isa thsungkheak tümü thsükhukba?”

⁴Arünü yancho yubo thachoh; akeangkeang thiyuchihchimnü arünü tangzüngbo thsüchoh; jumonü thiyuro mülakhi ju thulu wochakkhi ching müzümrim nangde mukhuhchoh.

⁵Samaria ching larü ju Beth-aven moshi nunu dünkheaknü ajanchoh. Mihtsürübonü ha dünkheak tüzhobah, tüsho ha kheaknü müretah tsokhi dünkheak ju kingaünrü amükeamrübonü mitripbah.

⁶Kukruk ju Asiria lim ato kiulongthsüpuh ki ruk nangde hande ayübah. Ephraim achih ngübah, tüsho Israelnü anihbuh sangthsü dünkheak achihbah.

⁷Samaria kiulongthsüpuh ju kemi kheak sangjip nangde adükheakbah.

⁸Israel neak Aven achang dangpungbo thsümünimbah. Ayang tüsho khingphubo arü kingaün sadambo kheak mukhuhbah. Arünü müzüngbo ki, Isa lüpdoang, tüsho awungbo ki, Isa kheak keamkihang, de athabah.

⁹Gibea nimungbo chingnü nünü neak yihbeakdo, O Israel; ju ching arünü mutuklode la. Gibea ching amütsü-rhimorü thirithsünü akukkhi yung de?

¹⁰Inü amulongkhi ching arü thsümüchibah; arü neak alü dün thsümüchichoki trükshihbonü arü azhihde mukhungbah.

¹¹Ephraim a thsangyukhi moshi nunu, anitpü muzhokhi lakheah, tüsho inü anihbe hung atsü kheak sangkap müyihkih; tüshe inü Ephraim alo yihnakshihbah, Judanü wochakbah, tüsho Jakobnü alo phünnakbah.

¹²Nü thsungkheak thiyuro-lungki yangang, düküngde muzhokhi sangaso rhoang; muwochakkhi lo phünnakang, tümüde ha ATUNGPUH yimpü kim ah, junangde apinü arübah nü kheak müngühmühi dungkihjihbah.

¹³Nünü mihbukmuyuk khimdo, nünü amütsü yimludo, nünü akeangyu sangaso tsühdo. Tümütüsho nünü nü wu tüsho thirithsü hihkhi ching kindo,

¹⁴jumonü nü mihtsürü azhihde thirithsü düsheak labah, tüsho nü chipi alala thsümünimbah, Shalman nü thirithsü nimung Beth-arbel thsümünimde, berübo lung tsührübo bebah adütre kamde zünakkhi nangde alabah.

¹⁵Hanangde nü mihbukmuyuk dünkheak nü ki rhimobah, O Bethel. Yapsu mükikde Israel kiulongthsüpuh ju shahde adükheakbah.