Read Yimchungru Naga Hosea 11 Bible Online

Hosea 11 - Yimchungru Naga bible

Hosea 11

¹Küyimki Israel azürü lakhea, inü api muzhokheah, tüsho I tsührü nangde Ijip chingnü jikhit.

²Inü küdükhüh api jikheanü judükhüh api I kheaknü tso; arünü Baalbo kilim laksah-a kingaün, tüsho rhümthüneabe sangthsübo kilim jih.

³Tütüshe Ephraim thsangyua tsahshihkhi ju I ah, inü arübo I bin kheak shuhkih-a lu; tüshe inü arü thsüngudo de arünü mümükheah.

⁴Inü arü mihtsürü mihmuzho tüsho amuzho liunü bea lu. Inü arü hung kheaknü sangkap shuhkhijih tüsho arü yimkippü mükhüm.

⁵Arübo Ijip lomi lim alode ayübah, tüsho Asiria ju arü kiulongthsürü thsübah, tümütüsho arünü I ki arülopü thsunglo.

⁶Nukshangbo arü kiutobo ching phürapbah, arü chipiripit rihbebo thsümünimbah tüsho arü lümkhi akheam thsüshihbah.

⁷I mihtsürü ju I kheaknü rholode atsopü lümkihlah. Arünü Khide Achangbuh ki jiji she apinü arü mushuhmusu.

⁸Küde thsah inü nü dükhepü, Ephraim? Küde thsah inü nü bahyukpü O Israel? Küde thsah inü nü Adma nangde kamshihpü? Küde thsah inü nü Zeboiim kheak nangde arhimopü? I mulong alunglim müthrido; nü thsungkheaknü I muzho todaklah.

⁹Inü I bukakhiukkhi mürhimo; inü Ephraim müthsümünimlo; tümüde I a Thrünpuh ah tüsho mihtsürü yung, nüsa bolung Amüsüh Khülang lah tüsho inü I bukakhiukde marü.

¹⁰Arünü kekhüzü nangde arungkhi ATUNGPUH dunglim yübah; küyimki apinü arungbanü, api tsührübo aniyüzahlimnü ajande arübah.

¹¹Arübo wuhnubo nangde ajande Ijip chingnü, tüsho müthrithrümpü nangde Asiria chingnü arübah; tüsho inü arübo arü yam lim yüloshihbah, ATUNGPUHNÜ thachoh.

¹²Ephraimnü akeangyu thade tüsho Israelnü mülapmüjinü I mükamdolah; tüshe Juda a Thrünpuhnü mükheahdü lang lah, tüsho Amüsühbuh Khülang ki thiyuro lah.