Read Yimchungru Naga Hosea 12 Bible Online

Hosea 12 - Yimchungru Naga bible

Hosea 12

¹Ephraimnü apung yimtsühchoh, tüsho nimung amuyung aniakhiuklim pung müshamchoh; arünü akeangyu tüsho athsümünim alü kamshihchoh; arünü Asiria kheak binthrüm thsüchoh, tüsho Ijip lim müdangke hande yüchoh.

²ATUNGPUHNÜ Juda azhihde mahkhapyu lah, tüsho api limrobo yande Jakob thsümüchibah, tüsho api rhimobo yande api kilim jihlobah.

³Nuyam ching apinü akhiung bede shochih, tüsho azoshu Thrünpuh bede shochih.

⁴Apinü yunirü bede shochih tüsho kuk; apinü trip tüsho api amuzho yim; apinü Bethel ching Thrünpuh shoru, tüsho ju ching apinü anihbuh ki asuk.

⁵ATUNGPUH Wuto Thrünpuh, ATUNGPUH ju api mung!

⁶Nüsanü nüsa Thrünpuh kilim rholoang, amuzho tüsho thiyuro kheak düngde ramrihang, tüsho arümde nüsa Thrünpuhnü arhimopü aleangang.

⁷Yinzüyindorü khah ching müdükkhi adünarabe shuhlah; apinü junopü muzhochoh.

⁸Ephraimnü tha, “Ah, I alarü ah, I alarü kamdo; I lakhit alala ching arünü amülim neak müyimkhit.”

⁹I Ijip chingnü nü bekhitbuh ATUNGPUH nü Thrünpuh; akhukhitkhi thünio nimungbo ching nangde, inü nü khimyambo ching laloshihbah.

¹⁰Inü wukihrübo ki asuk; inü michihbo hihde kamshih, tüsho wukihrübo hode inü athsümünim hande arübah.

¹¹Gilead ching mülimkhi lah, arübo tsükjide akeangkeang kambah, Gilgal ching arünü moshipungbonü kingaün, jumonü arü kingaün sadambo ju thulu wochakkhi ching lungrhung nangde alabah.

¹²Jakob nü Aram lomi ching tsode yü, ju ching Israelnü niuberü thsungkheak tankih, tüsho niuberü thsungkheak apinü namfimihnu neakde la.

¹³Wukihrü hode ATUNGPUHNÜ Israel Ijip chingnü bede atu, tüsho wukihrünü api aheang.

¹⁴Ephraimnü khühde bukakhiukshihdo; jumonü api TU N GPU H NÜ amülim thiyih api kheak zojihbah, tüsho api mükhemükimkhi jihlobah.