Read Yimchungru Naga Hosea 9 Bible Online

Hosea 9 - Yimchungru Naga bible

Hosea 9

¹Dasühachih, O Israel! Püpürü trükshihbo nangde dasühako; tümüde nünü nü Thrünpuh kheaknü chamkhide yüliyürado. Nünü hinitpung alala kheak müzammüram mulomüthsüpü muzhodo.

²Hinitpung tüsho yukhu nitpungnü arü mükipduh, tüsho yukhu aso mülade akambah.

³Arübo ATUNGPUH lomi ching aninga müla; tüshe Ephraim a Ijip lim alode ayübah, tüsho Asiria ching arünü mümüsühkhi tsühyungpü tsühbah.

⁴Arünü yukhu kingaün ATUNGPUH ki mubuk tüsho arünü laksah-a kingaünkhinü api masühshih. Hadürü kingaünbo ju mitriprü jimpung nangde alabah; ha tsührü alala müneanbah; tümüde arü yikhap ju arü khümkhi thsungkheak lang alabah; ha ATUNGPUH yam ching lude marü.

⁵Akhukhitkhi thünio nimung, tüsho ATUNGPUH thünio nimung nünü tümü rhimoba?

⁶Arünü athsümünim chingnü tsokhikhi she, Ijipnü arü bemukhungbah; Memphisnü arü kiuyuka bahbah. Khingphunü arü shotoyinchi kukrukbo mükühbah; ayangbo arü khimyambo ching labah.

⁷Thsümüchi nimungbo arüdo, royimpü nimungbo arüdo; Israelnü zhichoh, “ Wukihrü amülim ah, me lakhi mihtsürü makharü ah!” Tümütüsho nü mülimkhi tokhinü, nü mükthsü tode lah.

⁸Wukihrü ju Ephraim aheangrü I Thrünpuh lung lah, tütüshe wukihrü limrobo alala ching qimürip lah, tüsho api Thrünpuh yam ching mükthsü lah.

⁹Arünü Gibea nimungbo ching nangde arü zangrü sükde thsümünimdo; apinü arü amülim-rhimobo lümkhitbah, apinü arü neakbo dün thsümüchibah.

¹⁰Sunglo ching kurungasobo nangde, inü Israel ngüdo. Akheahmünchi ching khubaso akhuh asokhi nangde, inü nüsa jipürübo ngüdo. Tüshe arünü Baal-peor ching arü, tüsho achihbe kukruk ki arü nihbuh müsühkhit, tüsho arünü muzhokhi kukruk nangde arübo athraneanbe kam.

¹¹Ephraim müretah ju wuhnu nangde phinde atsobah — müzübe, mihmüla, khungarü müla!

¹²Arünü tsührübo mütrümususu she, sheshe maningyi khiungde inü arü tüzhoshihbah. I arü kheaknü chamachihchoki atsütsü arü are!

¹³Inü Ephraim ju Tair nangde, dangpung atsü ching khima ngü. Tüshe Ephraimnü arü tsührübo alaksahrü ki hande akhiukbah.

¹⁴Arü ki jihang, O ATUNGPUHNÜ nü tümü jihba? Arü kilim nuyam mütsüpü tüsho niuhke kungpü jihang.

¹⁵Arü amütsü alala Gilgal ching tankih; ju ching inü arü thraneande kam. Tümütüsho arü mihbukmuyuk rhimobo hode inü arübo I yam chingnü ayankhitbah. Inü kheaküa arü mümuzho; arü torübo alala azhihrü ah.

¹⁶Ephraim a tsühsah-a lah, ayingbo kunga lah, arünü aso maso. Arünü zübebe she, arü amuzhodakkhi tsührübo inü alaksahbah.

¹⁷Tümütüsho arünü api ki mani; I Thrünpuhnü arü bahyukbah; trükshih bolung arübo tsotsahrü kambah.