Read Yimchungru Naga Joel 3 Bible Online

Joel 3 - Yimchungru Naga bible

Joel 3

¹Tümüde, ju nimungbo tüsho ju kim ching, küyimki inü Juda tüsho Jirusalem kuhi jihlobanü,

²inü trükshih alala bemukhungbah tüsho arübo Jehoshaphat Jindükhün ching bede akibah, tüsho I mihtsürü Israel tüsho I yamrüplurüp dünkheaknü inü ju ching arü mahkhapbah, tümütüsho arünü arübo trükshih bolung hiumüzütshih. Arünü I lomi chamnakdo,

³tüsho I mihtsürübo thsungkheak azan thsüdo, tüsho athrürübo müzammürampü ching ahori, tüsho anünürübo yukhu mo yin tüsho ju yung.

⁴O Tair tüsho Sidon, tüsho Filistia kewungbo alala, nüsa ju I ki tümü a? Tümükhüh thsungkheak nüsanü I kilim jihlocho de? Nüsanü I kilim jihlosho, inü nüsa ku kheak nüsa rhimobo nahde tüsho niokheamde ajihlobah.

⁵Tümüde nüsanü I yo shotoyinchi tüsho suna ludo, tüsho I lakhit rahpungbo nüsa arüngyam ching hanyukdo.

⁶Nüsanü Juda tüsho Jirusalem mihtsürü arü aredungyean chingnü limshude yankhita Greekrü ki yindo.

⁷Kheahang, inü arübo nüsanü ayinpung chingnü abekhitbah, tüsho inü nüsa rhimobo nüsa ku kheak jihlobah.

⁸Inü nüsa tsührübo tüsho tsührübebo Juda mihtsürü ki yinbah, tüsho arünü arübo ju limshude alakhi trükshih khülang, Sabeanrü ki yinbah; tümüde ATUNGPUHNÜ asukdo.

⁹Ha trükshih bolung zhiyukang: Thirithsüpü thsakhamang, thirithsürü thurumusuang. Bonungrü alala phünide bedarang, arü atushang.

¹⁰Nüsa wuhbonü nukshangbo kingang, tüsho nüsa wuhyakbonü thsühbo kingang; aliuhrünü thashang, “ I thirithsürü ah.”

¹¹Nahnahde, mühi alala chingnü nüsa trükshihbo alala arang, nüsabo ju ching mukhungang. Nü rithsürübo bekhiang, O ATUNGPUH .

¹²Trükshihbonü asürüshang, tüsho Jehoshaphat Jindükhün ching atushang; tümüde ju ching inü mühirü trükshih alala mahkhapbah.

¹³Hirhüpbe yukang, tümüde yimlupü khiunga lah. Yüzahang, nitang, tümüde yukhu nitpung milah. Pangjiphühbo zhikhiuklah, tümüde arü mihbukmuyuk tolah.

¹⁴Mahkhappü jindükhün ching mihhihlah, mihhihlah! Tümüde mahkhappü jindükhün ching ATUNGPUH nimung thüninde lah.

¹⁵Ani tüsho khinu mitinga lah, tüsho chiningbonü ayin mütah.

¹⁶ATUNGPUHNÜ Zion chingnü arungchoh, tüsho Jirusalem chingnü api düsheak thsüchoh, tüsho thüningbo le alomi niukchoh. Tüshe ATUNGPUH ju api mihtsürü tsoyukpung, Israel mihtsürü thsungkheak amüküp chipi lah.

¹⁷Junangde I ATUNGPUH nüsa Thrünpuh, I yo müzüng amüsüh, Zion ching lah de nüsanü mükheahbah. Tüsho Jirusalem amüsüh labah, tüsho hanrünü küyimkishe hanü mütsahholo.

¹⁸Ju nimung ching müzüngbonü amühdo yukhu atsamkhibah, awungbo ching niuhke bukbah, tüsho Juda yungzü alala ching ke bukbah; kenü khülang ATUNGPUH yam chingnü abukkhitbah tüsho Akasia Jindükhün dütsütbah.

¹⁹Juda mihtsürü ki arü lomi ching arünü amülim-mülarü thiyih bukde amütsü rhimokhi hode Ijip ju azhikkhi kambah tüsho Edom a abahkhi sunglo kambah.

²⁰Tüshe Juda a lünnü alabah, tüsho Jirusalem a lün alala ching labah.

²¹Inü arü thiyih royimbah tüsho mülimkhi mümüsühjih, tümüde ATUNGPUH Zion ching lah.