Read Yimchungru Naga Amos 1 Bible Online

Amos 1 - Yimchungru Naga bible

Amos 1

¹Tekoa namfimihnu neakrü bolung lakhi Amos yubo, ju apinü Juda kiulongthsüpuh Uzzia tüsho Israel kiulongthsüpuh Jehoash tsührü Jeroboam nimungbo ching Israel dünkheak muliuyuk arüpü kam mahne müngüh lakheah.

²Tüsho apinü tha: ATUNGPUHNÜ Zion chingnü arungchoh, tüsho Jirusalem chingnü adüsheak tsüngmukchoh; namfimihnu neakrü rimbo yiuhabahchoh, tüsho Karmel mujuk kungabahchoh.

³ATUNGPUHNÜ ha thachoh: Damaska mihtsürübonü alochode neak yihbeakkhi dünkheak inü thsümüchi mululo; tümütüsho arünü hi-nitbe yinchinü Gilead nitdo.

⁴Jumonü inü Hazael yam kheak mo khülang yüshihbah, tüsho hanü Ben-hadad chipi aniuabahbah.

⁵Inü Damaska chipiripit khrihbebo yihshakbah, tüsho Aven Jindükhün ching larü tüsho Beth-eden ching kiulongthsü-tso shuhbuh mülade akamshihbah; tüsho Siria mihtsürü Kir ching ramde ayübah, ATUNGPUHNÜ thachoh.

⁶ATUNGPUHNÜ ha thachoh: Gazanü alochode neak yihbeakkhi dünkheak, inü thsümüchi mululo; tümütüsho arünü trükshih abümnü Edom kilim jihpü ramtso ching hande yü.

⁷Jumonü inü Gaza chipibo aniuabahshihpü mo yüshihbah.

⁸Ashdod ching larü tüsho Ashkelon ching kiulongthsü-tso shuhbuh inü mülade akamshihbah; I khahnü Ekron azhihbah, tüsho Filistiarü aningkhi dükheakbah, ATUNGPUHNÜ thachoh.

⁹ATUNGPUHNÜ ha thachoh: Tairnü alochode neak yihbeakkhi dünkheak, inü thsümüchi mululo; tümütüsho arünü trükshih abümnü Edom kilim jih, tüsho keoniorü tangzüng mülümkhit.

¹⁰Jumonü inü Tair chipibo aniuabahshihpü mo yüshihbah.

¹¹ATUNGPUHNÜ ha thachoh: Edomnü alochode neak yihbeakkhi dünkheak, inü thsümüchi mululo; tümütüsho apinü nukshang shuhbah nihbuh keoniorü müsham tüsho mihmuzho muhuh; apinü mutukzhakde bukakhiuk tüsho lünnü mulong zhipzhipdo.

¹²Jumonü inü Teman kheak mo khülang yüshihbah tüsho junü Bozra chipibo aniuabahbah.

¹³ATUNGPUHNÜ ha thachoh: Amonrünü alochode neak yihbeakkhi dünkheak, inü thsümüchi mululo; tümütüsho arünü arü lomi mükahshihpü Gilead ching mübünkeangrübo kiuashungjih.

¹⁴Jumonü inü keochih nimung ahode, chinthrüm apung nimung Rabba chipi aniuabahshihpü mo yüshihbah;

¹⁵judüki kiulongthsüpuh ju api le api torübo rukhühnü ramtso ching yübah, ATUNGPUHNÜ thachoh.