Read Yimchungru Naga Amos 2 Bible Online

Amos 2 - Yimchungru Naga bible

Amos 2

¹ATUNGPUHNÜ ha thachoh: Moabnü alochode neak yihbeakkhi dünkheak, inü thsümüchi mululo; tümütüsho apinü Edom kiulongthsüpuh robo mobün kamde takdo.

²Jumonü inü Moab kheak mo khülang yüshihbah, tüsho junü Kerioth chipibo aniubah, tüsho ahode hulipungpung mütkhi düsheak ching Moab shebah;

³inü ju lungnü yakzanshuhbuh dükheakshihbah, tüsho api lung atorü alala laksahbah, ATUNGPUHNÜ thachoh.

⁴ATUNGPUHNÜ ha thachoh: Judanü alochode neak yihbeakkhi dünkheak, inü thsümüchi mululo; tümütüsho arünü ATUNGPUH yakzan bahyuk, tüsho api yukhüm muzo.

⁵Jumonü inü Juda kheak mo khülang yüshihbah, tüsho junü Jirusalem chipi aniubah.

⁶ATUNGPUHNÜ ha thachoh: Israelnü alochode neak yihbeakkhi dünkheak, inü thsümüchi mululo; tümütüsho arünü shotoyinchi mo thiyuro-lungkirü tüsho jingkhümpü mihbümkhüh mo müthsümülarü yinabah —

⁷arünü zhochihrü ku asungthulung ching juyuk, tüsho juyuka larü limro chingnü nimkhita bah; abuh tüsho tsührünü rukhüh aliberü ahorichoh, junangde I mung amüsüh müneanjih;

⁸arünü kingaün sadam aban ki thiyuchihchimde alukhi khimmih kheak zuhyuka yapchoh; tüsho arünü azhekhi shonü yukhu thuloa arü thrünpuh yam ching yungchoh.

⁹Tütüshe inü arü müngühnü cedar sang nangde achang tüsho thülamsang nangde amüküp lakhi Amorrü dükheakshih; inü api kumung aso, tüsho alunglim ayingbo thsümünimjih.

¹⁰Kheaküshe inü nü Ijip lomi chingnü bekhit, tüsho Amorrü lo müküh-a lushihpü kam yirü sunglo ching be.

¹¹Tüsho inü nüsa tsührü khürü wukihrübo akhiukshih tüsho athunurü khürü Nazirit kamshih. Ha atsütsü yung de, O Israel mihtsürü? ATUNGPUHNÜ thachoh.

¹²Tüshe nüsanü Nazirit ki yukhu yungshih, tüsho wukihrübo ki thiyukhüm jihde tha, “ Nüsanü dümüchit.”

¹³Jumonü lolungbenü hi mide hanbah azünakkhi nangde inü nüsa zünakbah.

¹⁴Athride ashanrü she mütsokhi, tüsho sühmüh larü sühmüh mülade akambah, yungsho wutonü arü rhangdung mükhümkhit;

¹⁵sherü sanglüh shuhchonü müzhip, tüsho sherü jing athrilanü mükhümkhit, yungsho khoraberünü arü rhangdung mükhümkhit;

¹⁶mulong torü thirithsürü she ju nimung bünkeang alihde atsobah, ATUNGPUHNÜ thachoh.