Read Yimchungru Naga Amos 3 Bible Online

Amos 3 - Yimchungru Naga bible

Amos 3

¹O Israel mihtsürü, ATUNGPUHNÜ Ijip lomi chingnü bekhitkhi yamkhün alala azhihde asukkhi yu ha aniang:

²Alomi ching yamkhün alala lung inü nü lang mükheahlah; jumonü nü neak alala dünkheak inü nü thsümüchibah.

³Mümüyüpachihde mahne rukhüh tsahcho de?

⁴Shih mülachoki kekhüzünü murung ching arungcho de? Kekhüzü nununü tümü mutholode ayam ching khungcho de?

⁵Qimürip thsüa muzode wuhnu ju qimürip ching phuhcho de? Tümü muphuhde qimürip ju keamcho de?

⁶Kiuto ching hulipungpung mütbah mihtsürübonü mütrecho de? ATUNGPUHNÜ mürhimode kiuto ching thsümütsü dünjicho de?

⁷Tsükjide Atungpuh THRÜNPUHNÜ api yamlarü wukihrübo ki rama lakhi alümkhi muhuhdüa tümü she müthsü.

⁸Kekhüzünü arungchoki, shenü mütrepü? Atungpuh THRÜNPUHNÜ asukchoki, shenü mümüchitpü?

⁹Ashdod tüsho Ijip chipibo ching zhiyukang, “ Nüsabo Samaria wungbo kheak mukhungang, tüsho ju ching tümü neamneamruru la, tüsho tümü ajunokhi lanü kheahang.”

¹⁰ATUNGPUHNÜ ha thachoh, Sherünü thiyih bukde tüsho ahüh-a arü lapung ching zochonü, arünü alim rhimopü mümükheah.

¹¹Jumonü Atungpuh THRÜNPUHNÜ ha thachoh: Thiririnü lomi mükamdobah, tüsho nüsa tsunglobebo bahjihbah; tüsho nüsa lapungbo yankhia lubah.

¹²ATUNGPUHNÜ ha thachoh: Namfimihnu neakrü jing mahne yungsho nuku khülang kekhüzü mün chingnü ayankhikhi nangde, Samaria ching lakhi Israel mihtsürü dükhüm-binkiu mungkhüh tüsho yapkiu shihchamkhüh kheak binrü khümkhitbah.

¹³Aniang, tüsho Jakob yamkhün azhihde thiyumütsan jihang, Atungpuh THRÜNPUH , Wuto Thrünpuhnü thachoh:

¹⁴Inü Israelnü alakmihkhi dün thsümüchi nimung, inü Bethel kingaün sadambo thsümünimbah, tüsho kingaün sadam juhbo lipkhibah tüsho alo ching keambah.

¹⁵Inü tsüngkam yam tüsho muzhu yam lukkheambah; tüsho thsotorünü züt thsükhi yambo dükheakbah, tüsho thüyam atotobo akheam thsübah, ATUNGPUHNÜ thachoh.