Read Yimchungru Naga Amos 4 Bible Online

Amos 4 - Yimchungru Naga bible

Amos 4

¹Ha yu aniang, nüsa Samaria müzüng kheak lakhi Bashan moshi dretobo, sherünü zhochihrü junocho, sherünü müthsümülarü zünakcho, sherünü niubuhrü ki thacho, “Tümükhüh ayungpü lubah arang!”

²Atungpuh THRÜNPUHNÜ api müsühkhinü thiyuchihchimdo: Nüsa mihbüm aban thüngüh wuhbe khoyangnü awuhpü kim tsükjide arüchoh.

³Nüsa mihbüm aban rhü abitkhi chingnü mikhuhlim tsobah; tüsho nüsa Harmon lim yana yüshihbah, ATUNGPUHNÜ thachoh.

⁴Bethel lim yüang tüsho neak yihbeakang; Gilgal lim yüang tüsho neak alü kamshang; yapsu aban nüsanü laksah-a kingaünkhibo lubah arang, nimung asampü aban ching thürü shihcham lubah arang;

⁵phaüm yukkhi yikhapnü makshe jihkhi kingaün handarang, mulongkhi kingaün zhiyukang, jurü dünkheak kükheangang; tümüde judürü rhimopü nüsanü muzholah, O Israel mihtsürü! Atungpuh THRÜNPUHNÜ thachoh.

⁶Inü nüsa kiuto alala ching khümzung handarü, tütüshe nüsanü I kilim murholo, ATUNGPUHNÜ thachoh.

⁷Tüsho kheaküshe yimlupü khinu mahsam lachoki inü nüsa kheaknü tsüng tuklo; inü kiuto khülang lungki tsüng arüshih, tüsho püpü kiuto lungki tsüng marüshih; thulu khülang lungki tsüng arüshih, tüsho tsüng marükhi thulu ju mukuhabah;

⁸jumonü kiuto mahne yungsho mahsamnü ke yungpü kiuto khülang ching yüla arüla thsü, tüsho reangmükeamde lakheah; tütüshe nüsanü I kilim murholo, ATUNGPUHNÜ thachoh.

⁹Inü sangrung-tukthsü tüsho mokrinü nüsa shik; inü nüsa wündo tüsho kurungasolubo thsümünimjih; tangkhonü nüsa khubasodung tüsho oliv sangdungbo tsühabah; tütüshe nüsanü I kilim murholo, ATUNGPUHNÜ thachoh.

¹⁰Inü Ijip kiphahde nüsa bolung arüm-tukthsü arüshih; inü nüsa athrününgtsüngbo nukshangnü laksah; inü nüsa khorabo hande tso; tüsho inü nüsa binkheampung shuhrhüm nüsa nupung khün ching wutushih; tütüshe nüsanü I kilim murholo, ATUNGPUHNÜ thachoh.

¹¹Thrünpuhnü Sodom tüsho Gomorra lahyuka bahchoki nangde inü nüsa khürü lahyuka bah, tüsho nüsa ju mo takkhi chingnü adukkhitkhi mozhuh nangde alakheah; tütüshe nüsanü I kilim murholo, ATUNGPUHNÜ thachoh.

¹²Jumonü inü ha nü ki rhimobah, O Israel; tümütüsho inü nü ki ha rhimobah, nü Thrünpuh shorupü thsakhamang, O Israel!

¹³Tümütüsho, shepünü müzüngbo thrünchonü, apung thrünchoh, api lümkhi mihtsürübo ki huhchoh, yapsu ju amiting kamshihchoh tüsho alomi achangbo kheak tsahchoh — ATUNGPUH , Wuto Thrünpuh ju api mung lah!