Read Yimchungru Naga Amos 6 Bible Online

Amos 6 - Yimchungru Naga bible

Amos 6

¹Sherü zuzu thsüde Zion ching la, tüsho sherü Samaria müzüng kheak kuramde la, akhuh trükshih ching mungkhung mihtsürübo, sherü kheak Israel yamkhünnü arung luchonü ayokhe!

²Kalne hode yüang, tüsho kheahang; ju chingnü Hamath ato ching yüang; jushu Filistia ching Gath lim yükiang. Nüsa kiulongthsü mahne kheaknü arü atsübea de? Yungsho arü lomi nüsa kheaknü atobea de?

³Thsümütsü arüpü nimung nüsanü reanglo, tüshe nüsa rhimonü ju nimung phünide hande arüchoh.

⁴Sherü thsotorü yapkiu kheak yapcho, tüsho dükhümbinkiubo kheak zuh-a bincho, tüsho mihnu bolungnü namfimihnunu tüsho moshi bolungnü moshi nunu tsühchonü ayokhe;

⁵shepünü khün müjimpü küncho, tüsho David nangde khün-khungbe kingcho;

⁶shepünü phurusük chingnü yukhu yungcho, tüsho atsüdak müdangkenü nihbuh mujucho, tüshe Josep thsümünimkhi dünkheak mulong mutukthsü!

⁷Jumonü arü akhuhde ramtso ching yübah, tüsho adanasün tüsho aniojikhi akheam thsübah.

⁸Atungpuh THRÜNPUHNÜ aküdah thsüde thiyuchihchim, ATUNGPUH Wuto Thrünpuhnü thachoh: Inü Jakob kükheangkhi mükheahne tüsho api chipibo thraneanlah; tüsho inü kiuto tüsho ju ching lakhi lüpdükhi jihabahbah.

⁹Thüyam khülang ching mihtsürü 10 aninga lasho, arü ashebah.

¹⁰Tüsho betsührü khülang mitakrünü mi ju thüyam chingnü hankhitbah thüyam alunglim labuh ki, “ Nü lung khürü la shi?” de keosho, apinü alobah, “ Yung.” Judüki betsührünü athabah, “Dalan! Isanü ATUNGPUH mung mütambeah.”

¹¹Kheahang, ATUNGPUHNÜ thiyuchihchim jihchoh, tüsho thüyam ato ju ajipbo kambah tüsho thüyam anini ju adütre kambah.

¹²Khorabonü lungbo kheak alihcho de? Khürünü moshipungbo bebah keto mülapcho de? Tüshe nüsanü thiyuro ju müzüm kamshihdo thiyuro-lungki sangaso ju akhüh kamshihdo.

¹³Nüsa sherü Lodebar kukkhi ching asühachihcho, sherünü tha, “ Isanü isa sühmühnü Karnaim lukhi yung de?”

¹⁴Atsütsü, inü nüsa azhihde trükshih khülang bemusuchoh, O Israel, ATUNGPUH , Wuto Thrünpuhnü thachoh, tüsho arünü Lebo-hamath chingnü Araba ayung khiungde nüsa junobah.