Read Yimchungru Naga Amos 7 Bible Online

Amos 7 - Yimchungru Naga bible

Amos 7

¹Atungpuh THRÜNPUHNÜ I ki ha huh: Kiulongthsüpuh shihcham yimlubah mahnepü hi akhiukchoki apinü tangkhobo thründe alakheah.

²Küyimki arünü alo rimbo tsühkhamkhea, inü tha, “ O A TU N GPU H T H RÜ NPU H , neak bahjang, inü nü ki mushuchoh! Küde thsah Jakob zhipkhukpü? Api khide ninilah!”

³ATUNGPUHNÜ ha dünkheak lümalo; “Ha jude müthsü,” ATUNGPUHNÜ tha.

⁴Atungpuh THRÜNPUHNÜ I ki ha huh: Atungpuh THRÜNPUHNÜ mo mahkhappü arüpü jide alakheah, tüsho hanü asük ato aniuabah tüsho alo aniuabah.

⁵Judüki inü tha, “ O Atungpuh T H RÜ NPU H , ju lang thsang, inü nü ki mushuchoh! Küde thsah Jakob zhipkhukpü? Api khide ninilah!”

⁶Ha dünkheak ATUNGPUHNÜ lümalo; “Ha she jude müthsü,” Atungpuh THRÜNPUHNÜ tha.

⁷Apinü I ki ha huh: ATUNGPUH ju akhah ching akeara-liu khülang shuhbah, akeara-liunü akede athsükhi rhü ki zhipde alakheah.

⁸Tüsho ATUNGPUHNÜ I ki tha, “Amos, nünü tümü ngücho?” Tüsho inü alo, “Akeara-liu khülang.” Jushu ATUNGPUHNÜ tha, “ Kheahang, inü akeara-liu khülang I mihtsürü Israel bolung zochoh: inü arü thsümüchipü I lümkhi mümüthrilo;

⁹Isak achang dangpungbo zhikabahshihbah, tüsho Israel arüngakopungbo thsümünima yapshihbah, tüsho inü Jeroboam yamkhün azhihde nukshang shuhkihbah.”

¹⁰Judüki Bethel ching amükeambuh Amazia nü Israel kiulongthsüpuh Jeroboam kilim thiyu yüshih, “Amosnü Israel bolung nü azhihde thachoh; alominü api yu alala marümkhuk.

¹¹Tümüde Amosnü ha tha, ‘ Jeroboam nukshangnü ashebah, tüsho Israel ju api lomi chingnü ramtso ching tsükjide ayübah.’ ”

¹²Tüsho Amazianü Amos ki tha, “ O angürü, tsoang, Juda lomi ching shande tsoang, ju ching nü yikhap muloang, tüsho ju ching müchitang;

¹³tüshe küyimkishe Bethel ching dümüchitlo, tümüde ha kiulongthsüpuh arüngakopung ah, tüsho ha kiulongthsü arüngyam khülang ah.”

¹⁴Judüki Amosnü Amazia ki alo, “ I wukihrü yung, yungsho wukihrü tsührü khülang yung; tüshe I a namfimihnu neakrü khülang, tüsho khubasodungbo kümrü ah,

¹⁵tüsho ATUNGPUHNÜ I mihnu boto kümkhi chingnü bea lu, tüsho ATUNGPUHNÜ I ki tha, ‘ Yüang, I mihtsürü Israel ki müchitang.’

¹⁶Kheakü jumonü ATUNGPUH yu aniang. Nünü thachoh, ‘ Israel azhihde dümüchit, tüsho Isak yamkhün azhihde düthsangyuthsangra.’

¹⁷Jumonü ATUNGPUHNÜ ha thachoh: ‘ Nü niube a kiuto ching müzammüramrü kambah, tüsho nü tsührübo le tsührübebo nukshangnü akeambah, tüsho nü lomi ju akea chamabahbah; nü a amüneanrü lomi ching shebah, tüsho tsükjide Israel nihbuh lomi chingnü ramtso ching yübah.’ ”