Read Yimchungru Naga Amos 8 Bible Online

Amos 8 - Yimchungru Naga bible

Amos 8

¹Atungpuh THRÜNPUHNÜ I ki muzhu sangaso zahkhi muluk khülang huh.

²Apinü tha, “Amos, nünü tümü ngücho?” Tüsho inü alo, “Muzhu sangaso zahkhi muluk khülang.” Jushu ATUNGPUHNÜ I ki tha, “ I mihtsürü Israel kheak akheam arüdo; inü arü thsümüchipü I lümkhi mümüthrilo.

³Arüngyam khünbo ju nimung ching mitripkhi kambah,” Atungpuh THRÜNPUHNÜ thachoh; “ashe mibo ahihdo labah, dangpung aban zhikrangkhündo alabah!”

⁴Ha aniang, nüsa müthsümülarü jungrübo, tüsho lomi ching zhochihrü ki athsümünim hande arürübo,

⁵ha tha, “ Küyimki khinu aso hobaki, junangde isanü hi yinbah; tüsho amuni hobaki, junangde isanü yukyinpü thsungkheak wheat hi jihbah? junangde isanü alü kheangbah, amülim adünara ahoribah, tüsho thülothiyirü ki akeara ching rük thsübah,

⁶shotoyinchinü zhochihrü tüsho jingkhümpü mihbümkhüh mo müthsümülarü thulobah tüsho wheat hi aphüngkhi she ayinbah.”

⁷ATUNGPUHNÜ Jakob mung tamde thiyuchihchimchoh: Tsükjide inü küyimkishe arü rhimobo mümihabah.

⁸Ha dünkheaknü lominü majanba de, tüsho ju ching larü abannü mütüzhoba de, tüsho alala Nile nangde makihba de, tüsho Ijip ching mükeamyukba de?

⁹Atungpuh THRÜNPUHNÜ thachoh, inü animuro ani yüzahshihbah, tüsho animuro alomi mitingde akamshihbah.

¹⁰Inü nüsa aniojikhibo atüzhokhi kamshihbah, tüsho nüsa khün alala atüzhokhi kamshihbah; inü alala chim kheak shungliukhim hande arübah, tüsho mihbüm aban ku hütshihbah; inü ju tsührü khülang lang alakhi thsungkheak tüzhokhi ruk kamshihbah, tüsho akheam ching ju akhüh nimung nangde akamshihbah.

¹¹Tsükjide kim ju arüchoh, Atungpuh THRÜNPUHNÜ thachoh, küyimki inü lomi kheak khümzung khülang arüshihkhi laba; jim khümzung yungsho kethüripü yung tüshe ATUNGPUH yubo sopü khümzung labah.

¹²Arünü keto chingnü keto khiungde, tüsho dukulimnü aniakhiuklim khiungde arümbah; arünü yüla arüla de ATUNGPUH yu yimde ashanbah, tüshe arünü ju müngü.

¹³Ju nimung ching jak tsükhi anünürü tüsho athrününgtsüngbo kethürikhinü alungbah.

¹⁴Sherünü Samaria, Dan tüsho Beersheba sangthsübo kingaünbanü arübo alungbah, tüsho küyimkishe masürülo.