Read Yimchungru Naga Amos 9 Bible Online

Amos 9 - Yimchungru Naga bible

Amos 9

¹Inü ATUNGPUH ju kingaün sadam ki zhipde ngü, tüsho apinü tha: Akhimtan muniukniukyi khiungde dungjing ku kheak lakang, tüsho jurübo mihtsürü alala ku kheak aniukkhiang; tüsho sherü aninga lanü inü nukshangnü alaksahbah; arü she lang she shande mutso, arü she lang she mutsokhi.

²Arünü Ashe-lomi ching kiude yüzahzah she, ju chingnü I khahnü arü lubah; arünü thüning kheak künkihkih she ju chingnü inü arü bekhibah;

³arünü Karmel mujuk kheak jikjik she, ju chingnü inü arü yimkhitbah; tüsho arünü I mikinü keto alunglim jikjik she, ju ching inü ke-phuruto ki thiyukhüm jihbah, tüsho junü arü nguhbah.

⁴Tüsho arünü ramtso ching arü riri miki yüyü she, ju ching inü nukshang ki thiyukhüm jihbah, tüsho junü arü laksahbah; tüsho inü arü kheak athsümünim thsungkheaknü I mükbo kheahkihbah tüsho atsü thsungkheak yung.

⁵ATUNGPUH , Wuto T H RÜ NPU H , shepünü alomi qiucho tüsho ju niucho, tüsho ju ching larü alala tüzhocho, tüsho ju alala Nile nangde akihcho, tüsho Ijip ching Nile nangde keamyuklocho;

⁶shepünü yinmi ching nihbuh akube khiungshakbo thsücho, tüsho alomi kheak khimtanbo thsücho; shepünü keto kebo jicho tüsho alomi kheak dungkhitcho — ATUNGPUH ju api mung lah.

⁷Nüsabo I kilim Ethiopiarü ruk yung de, O Israel mihtsürü? ATUNGPUHNÜ thachoh. Inü Israelrü Ijip chingnü, tüsho Filistiarü Kaphtor chingnü tüsho Siriarü Kir chingnü mübekhit de?

⁸Atungpuh T H RÜ NPU H mükbo ju neak lakhi kiulongthsü kheak lah, tüsho inü ju alomi kheaknü adükheakshihbah; inü Jakob yamkhün lang shahde müdükheakshih, ATUNGPUHNÜ thachoh.

⁹Tümüde kheahang, inü thiyukhüm jihbah tüsho khürünü ayikeangnü ayikhi nangde trükshih alala bolung müthülünkhi yihkhita bahpü inü Israel yamkhün ayibah.

¹⁰I mihtsürü aneakrü alala nukshangnü ashebah, sherünü tha, “Amütsünü isa müyanphuh yungsho mushoru.”

¹¹Ju nimung David khimyam keama lakhi inü alahmusubah, tüsho azhakkhibo thsülobah, tüsho athsümünimkhibo lahmusubah, tüsho awün nimungbo nangde athsülobah;

¹²junangde arünü Edom aningkhi tüsho I mung tamde ajikhi trükshihbo alala kuka lubah, ha rhimobuh ATUNGPUHNÜ thachoh.

¹³Nimungbo arümuroh, ATUNGPUHNÜ thachoh, küyimki wochakrünü yimlurü alihhoba tüsho kurungaso-nitrünü müjih yangrü alihhoba; müzüngbonü yukhu aniung atsamkhibah tüsho junü awungbo alala bukbah.

¹⁴Inü I mihtsürü Israel kuhi jihlobah, tüsho arünü athsümünim kiutobo thsülobah tüsho jurü ching labah; arünü kurungasobo yangbah tüsho jurü yukhu yungbah, tüsho arünü awündobo thsübah tüsho sangaso tsühbah.

¹⁵Inü I mihtsürübo lomi kheak khimbah, tüsho inü arü kilim jihkhi lo chingnü küyimkishe arübo mürukkhitlo, ATUNGPUH nüsa Thrünpuhnü thachoh.