Read Yimchungru Naga Obadia 1 Bible Online

Obadia 1 - Yimchungru Naga bible

Obadia 1

¹Obadia michih. Atungpuh THRÜNPUHNÜ Edom dünkheak ha thachoh: Isanü ATUNGPUH kilimnü thiyusheak khülang sodo, tüsho yunithsürü khülang trükshih bolung thiyido: “Asürang! Isanü Edom bede keochihpü yüanü!”

²Tsükjide inü trükshih bolung nü aninibe kamshihbah; nü kakde mükhemükimbah.

³Nü mulong kükheangkhinü nü mülapyukdo, nü lungku ching larü, shepü lapung achang ching la. Nünü nü mulong ching tha, “Shenü I alo kheak bekhipü?”

⁴Nünü müleang nangde phinkihkih she, nü sap chining bolung lalashe, inü nü ju chingnü thokhibah, ATUNGPUHNÜ thachoh.

⁵Küyimki azhing ching ahührü arübanü, arünü arü künkhi lang luchoh. Küyimki mihtsürünü kurungaso rhobanü, arünü kamruhroro anükhüh aningshihchoh. Tüshe nü riribonü nü shahde phüta bahdo.

⁶Esau tsühsoniusobo, nüsa rahpungbo yankhia ludo.

⁷Nü müshiprü alalanü nü mülapyukdo, arünü nü aredungyean yana yüshihdo; nü kheak arihde alarübonü nü azhihde kukdo; nü yikhap tsührübonü nü thsungkheak azheang zojihlah — ju shenü she mümükheah.

⁸ATUNGPUHNÜ thachoh, ju nimung inü Edom ching lümlung larü, tüsho Esau müzüng chingnü anikhitkhi dükheakshihbah.

⁹Nü rithsürübo ajanbah, O Teman, junangde Esau müzüng ching bonungrübo laksahbah.

¹⁰Nü niurü Jakob laksahkhi tüsho thiyih bukkhi dünkheak achihnü nü zhidobah, tüsho nü lünnü lipkhia bahbah.

¹¹Nü jukmuwuh-a zhip nimung, jaksorünü api lakhit hana lukhi nimung, tüsho khiungkerünü api chipiripitbo ching yüzahchoki, nü she arü nangde alakheah.

¹²Tüshe nünü api kuhi mütsükhi nimung nü keoniorü mükhenopü lado; nünü Juda mihtsürü thsümünim nimung masühachihpü lado; lümthsünü nimung nünü mükükheangpü lado.

¹³Nünü arü thsümütsü nimung I mihtsürü chipiripit ching müyüzahpü lado; nünü arü thsümütsü nimung Juda lümthsünü khenokhi ching mübepü lado; nünü arü thsümütsü nimung arü kukruk yankhia mulupü lado.

¹⁴Nünü atsokhirü tholopü thsüde limdübeak kheak müzhippü lado; nünü lümthsünü nimung thiriri kilim arü müjihpü lado.

¹⁵Tümüde trükshih alala azhihde ATUNGPUH nimung thüninde lah. Nünü arhimokhi nangde, nü ki rhimobah; nü rhimobo nü ku kheak alodarübah.

¹⁶Tümüde nünü I yo amüsüh müzüng kheak yungkhi nangde, nü mühirü trükshih alalanü ayungbah; arünü ayungbah tüsho ayingyingbah, tüsho arünü küyimkishe müthsüa kheahkhi ruk labah.

¹⁷Tüshe Zion Müzüng kheak atsokhitrü labah tüsho ju amüsüh labah; tüsho Jakob yamkhünnü arü yankhita bahrü yamalo lubah.

¹⁸Jakob yamkhün ju mo nangde, Josep yamkhün ju motru nangde alabah, tüsho Esau yamkhün a hitsüt nangde alabah; arünü jurü takbah tüsho aniuabahbah, tüsho Esau yamkhün chingnü she mülade alabah; tümüde ATUNGPUHNÜ asukdo.

¹⁹Negebnü Esau wungbo lubah tüsho Shephelanü Filistiarü lo lubah; arünü Ephraim tüsho Samaria lo lubah, tüsho Benjaminnü Gilead lubah.

²⁰Hala ching lakhi Israel ramtsorünü Zarephat khiungde Phoenikia lubah; tüsho Sepharad ching lakhi Jirusalem ramtsorünü Negeb kiuto lubah.

²¹Sherü khümkhita lanü Zion Müzüng ching Esau wungbo yakzan shuhpü wutubah; tüsho kiulongthsü ju ATUNGPUH yo labah.