Read Yimchungru Naga Jona 1 Bible Online

Jona 1 - Yimchungru Naga bible

Jona 1

¹Kheakü Amittai tsührü Jona kilim ATUNGPUH yu arü,

²“ Kiuto ato Nineve lim yüang, tüsho ju azhihde zhiang; tümütüsho arü mihbukmuyukbo I miki akihdo.”

³Tüshe Jonanü ATUNGPUH mikinü Tarshish lim tsopü tsahmusu. Apinü Joppa ching yüki tüsho Tarshish lim yükhi sangkung khülang ngü; jumonü apinü hantsah-trün ju jih tüsho ATUNGPUH mikinü tsokhide Tarshish lim yüpü sangkung kheak yükih.

⁴Tüshe ATUNGPUHNÜ apung ato khülang keto kheak arüshih, tüsho sangkung ju athsümünimpü thsüde chinthrüm ato keto kheak arü.

⁵Judüki sangkung berübo müyinnimde kam, tüsho mihbüm abannü nihbuh thrünpuh ki zhi. Arünü sangkung ching lakhi kukrukbo arü thsungkheaknü hiphipde akamshihpü keto ching bah. Judüchoki, Jona a sangkung damkhi kheak yüzahnü yapsherakraka lakheah.

⁶Wühkenobuhnü arü tüsho api ki tha, “Tümü thsüde nü a yapshea la le? Asürang, nü thrünpuh ki jiang! Khükia thrünpuhnü isa thsungkheak lümrhihbah, junangde isa müdükheak.”

⁷Sangkung berübonü khülangnü khülang ki thaachih, “Arang, isanü azan thsanü, junangde she dünkheaknü ha thsümütsü isa kheak arüa lanü isanü amükheahbah.” Jumonü arünü azan thsü, tüsho azan ju Jona kheak akhiuk.

⁸Judüki arünü api ki tha, “Tümü thsükhi ha thsümütsü isa kheak arükheanü isa ki thaang? Nü tümü rhimorü a? Nü küchingnü arükhea? Nü lomi tümü a? Tüsho nü tümü mihtsürü a?”

⁹Apinü alo, “ I Ibrirü ah. Inü yinmi Thrünpuh, keto tüsho akung lomi thrünrü ATUNGPUH kingaünchoh.”

¹⁰Judüki mihtsürübonü alü trede kam, tüsho api ki tha, “Tümü thsükhi nünü ha rhimokhea!” Tümüde api ju ATUNGPUH mikinü tsokhichoh de mihtsürübonü mükheah, tümütüsho apinü arü ki thaa lakheah.

¹¹Judüki arünü api ki tha, “ Isa thsungkheaknü keto keamlopü thsüde isanü nü kheak tümü rhimoba?” Tümüde keto ju alübe alübe müküpde alakheah.

¹²Apinü arü ki tha, “ I shuhkihang tüsho keto ching jipyukang; jushunü nüsa thsungkheak keto keamlobah; tümüde I dünkheaknü ha chinthrüm ato nüsa kheak arüdo de inü mükheahlah.”

¹³Judüalalashe mihtsürübonü sangkung ju alo lim belodarüpü müküpde be, tüshe arünü mukuk, tümüde keto ju arü azhihde alübe alübe tode kam.

¹⁴Judüki arünü ATUNGPUH ki zhi, “ O ATUNGPUH , muzhobah ha mihtsürü rhangdung dünkheak isa düsheshih. Amülim mülarü mihtsürü laksahkhi thsungkheak isa ki mah dükhap, tümüde O ATUNGPUH , nünü amulongkhi nangde nünü rhimodo.”

¹⁵Jumonü arünü Jona shuhkih tüsho keto ching api jipyuk; tüsho keto müküpkhi ju keamlo.

¹⁶Judüki mihtsürübonü alü ATUNGPUH trede kam, tüsho arünü ATUNGPUH kilim laksah-a kingaünkhi jih tüsho thiyuchihchimbo thsü.

¹⁷Tüshe ATUNGPUHNÜ Jona muyushihpü thüngüh ato khülang thsakham; tüsho Jona ju thüngüh buk ching nimung mahsam tüsho tsüngre mahsam lakheah.