Read Yimchungru Naga Jona 4 Bible Online

Jona 4 - Yimchungru Naga bible

Jona 4

¹Tüshe ha Jona ki khide masühbe lakheah, tüsho api bukakhiukde kam.

²Apinü ATUNGPUH ki tamkhüntamnü tüsho tha, “ O ATUNGPUH ! Ha inü I lomi ching lachoki thakhi yung de? Hamonü inü atankih ching Tarshish lim tsokheah; tümüde nü a amuzho tüsho mihmüthsüm Thrünpuh, arünnü bukakhiukchoh, amuzhodakkhi ching suhdahlah, tüsho thsümüchipü chingnü lümalopü thsakhamlah de inü mükheahlah.

³Tüsho kheakü, O ATUNGPUH , muzhobah I kheaknü I rhangdung luang, tümüde I thsungkheak a alapü kheaknü ashekhi atsübe ah.”

⁴Tüshe ATUNGPUHNÜ tha, “ Nü bukakhiukpü alim la de?”

⁵Judüki Jona nü kiuto chingnü wukhiuk tüsho kiuto aniakhiuklim bin, tüsho anihbuh thsungkheak ju ching yünshim khülang thsü. Kiuto ju tümü kambanü kheahde aleangpü, apinü ju alamme khüp bin.

⁶ATUNGPUH Thrünpuhnü sangrung khülang arüshih, tüsho api phü mushukhi chingnü khümkhitpü thsüde, api ku kumung alamdoshihpü Jona kumung zojih; jumonü sangrung dünkheaknü Jona khide asühde alakheah.

⁷Tüshe küyimki ashidopü yapsu kamkhea, Thrünpuhnü ari arüshihbah sangrung müjakabahshih, junangde ju yiuhabah.

⁸Küyimki ani akhiukkhea, Thrünpuhnü aniakhiuklim pung atak khülang thsakham, tüsho aninü Jona ku kheak thsahkih, junangde Jona lungabah tüsho apinü ashepü kün. Apinü tha, “ I alapü kheaknü ashekhi lang atsübe ah.”

⁹Tüshe Thrünpuhnü Jona ki tha, “Sangrung dünkheaknü nü bukakhiukpü alim la de?” Tüsho apinü alo, “Am, ashepü bukakhiukchoh.”

¹⁰Judüki ATUNGPUHNÜ tha, “ Nünü, ha thsungkheak mürhimokhi tüsho mutoshihkhi sangrung dünkheak lümrhihchoh; ha tsüngrekhüh chingnü arü tüsho tsüngrekhüh chingnü dükheakabah.

¹¹Dale küdükhüh inü ju kiuto ato Nineve kheak amuzho mülapü. Ju ching amülim mülakhi mihtsürübo 120,000, tüsho shiwühbo she ahihdo lah!”