Read Yimchungru Naga Wüh 10 Bible Online

Wüh 10 - Yimchungru Naga bible

Wüh 10

¹ATUNGPUHNÜ Mosa ki tha,

²“Shotoyinchi hulipungpung mahne thsüang; nünü jurü ayümnü yümde thsüang; tüsho nünü ju mihtsürübo jimukhungpü ching tüsho binkheampung lukakhinchoki ahoriang.

³Küyimki ane chido mütbanü boto alala nü kilim arüngyam ripit ki mukhungde arübah,

⁴tüshe arünü khülang lang mütsho, limberübo, Israel trükbo ching akubo lang nü ki mukhungbah.

⁵Küyimki nünü niuknimde amütbanü, aniakhiuklim binkhibo tsahmusubah;

⁶tüsho küyimki nünü mahne kipü niuknimde amütlobanü düjinglim binkhibo tsahmusubah. Küyimki arübo tsahmusubanü niuknimde amütkhi labeah.

⁷Tüshe küyimki boto ju amukhungpü lanü nünü mütang, tüshe nünü niuknimde mümütbeah.

⁸Tüsho Aron tsührü amükeamrübonü hulipungpungbo ju amütbah, harübo nüsa lünbo amuyung ching thiyuzüng khülang labah.

⁹Tüsho küyimki nüsa lo chingnü thiriri kheak keochihpü yübanü nüsanü hulipungpung niuknimde mütang, ju ruk ATUNGPUH nüsa Thrünpuh miki nüsa lümkhitbah tüsho nüsa riri khah chingnü nüsa khümkhitbah.

¹⁰Nüsa asüh nimung she, thünio akhukhitkhi tüsho nüsa khinu aso ching, nüsa taka kingaünkhi tüsho mungtsü kingaün shuhmülanga jihkhi kheak nüsanü hulipungpung mütang; jurübo nüsanü Thrünpuh miki nüsa thsungkheak mümihbe labah; I ATUNGPUH nüsa Thrünpuh.”

¹¹Mahnepü kam, khinu mahne, nimung mukupü ching arüngyam kumungnü amo akhinabah,

¹²tüsho Israelrübonü Sinai sunglo chingnü tsahmusu; tüsho amo ju Paran sunglo ching keam.

¹³ATUNGPUHNÜ Mosa ki thiyukhüm jihkhi yande arünü akhuhbe thsüde tsahmusu.

¹⁴Akhuhde Judarünü arü kim ching bonungrü ayannü tsahmusu; tüsho arü limbebuh ju Amminadab tsührü Nashon.

¹⁵Tüsho Issakar trük bonungrü limbebuh ju Zuar tsührü Nethanel;

¹⁶tüsho Zebulun trük bonungrü limbebuh ju Helon tsührü Eliab.

¹⁷Judüki arüngyam ju luk tüsho Gershon tüsho Merari tsührübonü arüngkhimyam ju hanbahle tsahmusu.

¹⁸Tüsho anihbuh kim ching Reubenrü binkheampung bonungrü ayannü tsahmusu; tüsho arü limbebuh ju Shedeur tsührü Elizur.

¹⁹Simeon trük bonungrü limbebuh ju Zurishaddai tsührü Shelumiel,

²⁰tüsho Gad trük bonungrü limbebuh ju Deuel tsührü Elisaph.

²¹Jushu Kohathrü amüsüh kukrukbo hanbah tsahmusu, tüsho arü mukhiungyide arüngyam ju thsükhia lakheah.

²²Ju khin Ephraimrü bonungrü ayannü tsahmusu, tüsho arü trük bonungrü limbebuh ju Ammihud tsührü Elishama.

²³Manase trük bonungrü limbebuh ju Pedazur tsührü Gamaliel,

²⁴tüsho Benjamin trük bonungrü limbebuh ju Gideoni tsührü Abidan.

²⁵Akheam thsüde Dan trüknü boto alala aheangde bonungrü ayannü tsahmusu; tüsho arü limbebuh ju Ammishaddai tsührü Ahiezer.

²⁶Asher trük bonungrü limbebuh ju Okran tsührü Pagiel,

²⁷tüsho Naphtali trük bonungrü limbebuh ju Enan tsührü Ahira.

²⁸Ha Israel trük bonungrü ayannü tsahmusukhi, akhinashu ah.

²⁹Mosanü Midiarü Reuel tsührü akü Hobab ki tha, “ATUNGPUHNÜ , ‘ Inü ha nüsa kilim jihbah’ de thakhi dangpung ching yüpü isa tsahmusuchoh; isa lung arang, tüsho isanü nüsa tsüde amütrübah, tümüde ATUNGPUHNÜ Israel ki atsü alokhido.”

³⁰Hobabnü alo, “ I a müyü; tüshe I lomi tüsho I mihtsürü kilim alode ayübah.”

³¹Mosanü tha, “ Muzhobahle isa bahbah dütso, tümüde sunglo ching isa kükheak binkheambanü nünü mükheahlah; tüsho nü ju isa mükkheahdung labah.

³²Nünü isa lung arüsho ATUNGPUHNÜ isa kheak tümüpürü atsü rhimobanü, isanü nü kheak ju ruk rhimobah.”

³³Jumonü ATUNGPUH wung kheaknü arü nimung mahsam hantsah tsahmusu; tüsho arü binkheampung yimde ATUNGPUH sangdan arü müngühnü yüshih,

³⁴tüsho arü binkheampung chingnü tsahmusuchoki animung ATUNGPUH amo arü kumung lakheah.

³⁵Tüsho tangzüng sangdan shuhakhinchoki Mosanü tha, “O ATUNGPUH , asürang tüsho nü riribo hiumüzütshang, tüsho nü mükheahnerü nü müngüh tsoshang.”

³⁶Tüsho abinkheamchoki apinü tha, “O ATUNGPUH Israelrü chithürü amükhebin kilim rholoang.”