Read Yimchungru Naga Wüh 11 Bible Online

Wüh 11 - Yimchungru Naga bible

Wüh 11

¹Tüsho mihtsürübonü arü küpkhukkhi dünkheak ATUNGPUHNÜ sode dapdapneangneang; tüsho küyimki ATUNGPUHNÜ asokhea, api bukakhiuk tüsho arü bolung ATUNGPUH mo takshih, tüsho binkheampung mühi mühit khürü takabah.

²Tüsho mihtsürübonü Mosa ki zhi; tüsho küyimki Mosanü ATUNGPUH ki tamkhüntamnükheanü mo ju mütabah.

³Jumonü ju dangpung ki Tabera de ji, tümüde ATUNGPUH mo arü bolung ching aniu.

⁴Judüki Israelrü bolung khiungkerü khürü hantsah ching bea lakheah. Arübonü shih khide künde kam, tüsho Israelrünü she tripde tha, “Shepünü isa kilim shih jih-a tsühshihba?

⁵Ijip ching thüngüh adün mülade isa künkhi tsühkhi, liuheak, ke-liuheak rhiptsüh, sangpung, tüsho thono lümkhitchoh;

⁶tüshe kheaküa isa sühmüh kungabahdo; isa miki manna lakhi kheak hode püpü tümü müla.”

⁷Manna ju khiungün ji nangde tüsho akheahpü müyemuchude kelülü lakheah.

⁸Mihtsürübonü yübahle handarünü azübe yungsho thsam chingnü chuthünakbah phüh chingnü khiung, tüsho junü yikhap dam; tüsho akekhi ju oliv müdangke yukbah adamkhi yikhap nangde alakheah.

⁹Küyimki azhing ching ayinke khimyam kheak keambanü, ju lung manna aki.

¹⁰Mosanü mihtsürübo yamkhün abande, nihbuh khimyam ripit ki tripkhi so; tüsho ATUNGPUHNÜ khide bukakhiuk, tüsho Mosa masühde kam.

¹¹Mosanü ATUNGPUH ki tha, “Nünü tümüde nü yamlarü kheak masühde rhimocho? Tümüde I nü mük ki tsüde müngücho, tüsho harü mihtsürü hahmülang I kheak akihshihcho?

¹²Harü mihtsürü ha inü alashihkhea de? Inü zübekhea de, junangde arübo khungarü buhrünü abuhkhi nangde I khüh kheaknü shuhbah arü jipürü ki thiyuchihchimkhi lo ching hanbah yüang de nünü küde I ki thacho?

¹³Inü hadükhüh mihtsürü kippü shih küchingnü angüba? Tümüde arübonü I ki tripde thachoh, ‘ Isa kilim shih tsühpü jihang!’

¹⁴I zangrünü mihtsürü hadükhüh hahmülang mühankhuk, tümüde ha I thsungkheaknü khide mülanglah.

¹⁵Nünü I kheak ha ruk rhimobasho, muzhobah kheakü ha chingnü I laksahang, jude athsükhi hode I küpkhukkhi inü müngülonü.”

¹⁶ATUNGPUHNÜ Mosa ki tha, “ Israel mihtsürü bolung arü kurungkheak azothsürü thsüpü tüsho atorü thsüpü nünü akheahkhitkhi mihtsürü nerü I kilim bemukhungang; arübo arüngyam ki bedarang, tüsho arübo ju ching nü lung zhipshang.

¹⁷Tüsho I akibahle ju ching inü nü kheak asukachihbah, tüsho nü kheak lakhi me khürü inü lubah arü kheak yukjihbah; tüsho arünü mihtsürü hahmülang nü lung hanrungbah, junangde nü zangrünü lang mühan.

¹⁸Tüsho mihtsürübo ki thaang, ‘Nüsa nihbuh zangrü shido thsungkheak müsühkhitang, tüsho nüsanü shih tsühbah;’ tümüde nüsanü ATUNGPUHNÜ sode tripde thado, ‘Shepünü isa kilim shih jihba? Tümüde isa Ijip ching reangkeamde alakheah.’ Jumonü ATUNGPUHNÜ nüsa kilim shih jihbah, tüsho nüsanü atsühbah.

¹⁹Nüsanü nimung khülang, yungsho nimung mahne, yungsho nimung phüngü yungsho nimung thürü, yungsho nimung muku lang mütsüh,

²⁰tüshe khinu khülang amuyung, nüsa mulongmüngüm arüde tüsho mumukhiukyi khiungde atsühbah, tümütüsho nüsa bolung lakhi ATUNGPUH nüsanü bahyukdo tüsho api ki tripde tha, ‘ Isa tümü thsüpü Ijip chingnü akhiukkheaki?’ ”

²¹Tüshe Mosanü tha, “ I ha ching mihtsürü 600,000 bebah tsahchoh, tüsho nünü arü kilim khinu khülang tsühpü shih jihbah de thachoh!

²²Arünü reangkeamshihpü thsüde moshibo tüsho mihnubo laksahba shi? Yungsho keto ching lakhi thüngühbo hanmukhungbah arü reangkeamshihba shi?”

²³ATUNGPUHNÜ alo, “ATUNGPUH khah thamalah düpü? Kheakü nü thsungkheaknü I yu dünjinahnü nünü angübah!”

²⁴Jumonü Mosanü wukhiukbahle ATUNGPUHNÜ athakhibo mihtsürübo ki tha; tüsho apinü azothsürübo mihtsürü nerü bemukhung tüsho khimyam mühide zhipshih.

²⁵Tüsho ATUNGPUHNÜ amo ching akibahle api ki asukachih, tüsho api kheak lakhi me khürü lubah azothsürü nerü kheak yukjih; tüsho küyimki me ju arü kheak keamkhea, arünü müchitmudupü tankih. Tüshe kim ashang thsungkheaknü yung.

²⁶Kheakü azothsürü nerü bolung ane mahne Eldad tüsho Medad khimyam ching müyüde binkheampung ching bin. Ju binkheampung ching me ane kheak arü tüsho ane she müchitmudupü tankih.

²⁷Eldad tüsho Medad anenü müchitmudukhi dünkheak thapü athrününgtsüng khülang Mosa kilim alihde yü.

²⁸Tüsho Nun tsührü Jihusua athunu kim chingnü Mosa rungrü, apinü amokhitkhi mihtsürünü tha, “ I tungpuh Mosa, arübo zhipdoang.”

²⁹Tüshe Mosanü alo, “Nünü I dünkheak mükthsücho shi? ATUNGPUHNÜ amihtsürü alala kheak ame yükihshihbah wukihrübo nangde zhishang shi de inü lümlah!”

³⁰Tüsho Mosa le Israelrü azothsürü nerünü binkheampung lim alode yü.

³¹Judüki ATUNGPUH kilimnü apung yünde yü tüsho keto chingnü wuhkhibo alo kheaknü khahnap mahsam bande yükihbah phindarü keam. Arübo binkheampungbo kheak tüsho khülim khülim nimung khülang khüh limtsah dükeak ching keam.

³²Jumonü mihtsürübonü nimungroro, tsüngreroro tüsho ashidopü khiungde wuhkhibo rammukhung; shenü she khahngak 1000 bukkhüp müram. Arünü jurübo binkheampung mükamde zo.

³³Arübonü shih mütsühkhamyide, mihtsürübo azhihde ATUNGPUH bukakhiuk, tüsho ATUNGPUHNÜ arüm tukthsü ato khülangnü mihtsürübo kheak shik.

³⁴Jumonü ju dangpung ki ju Kibroth Hattaava de ji (amütsan shihmürhükrü kiuyukbo), tümütüsho arübonü ju ching shihmürhük mihtsürübo kiuyukabah.

³⁵Mihtsürübonü Kibroth Hattaava chingnü Hazeroth ching akhin; tüsho arübo Hazeroth ching binkheam.