Read Yimchungru Naga Wüh 15 Bible Online

Wüh 15 - Yimchungru Naga bible

Wüh 15

¹ATUNGPUHNÜ Mosa ki tha,

²Israelrü mihtsürübo ki thaang, küyimki inü ajihkhi lo ching lapü nüsa arübanü;

³tüsho nüsanü ATUNGPUH kilim taka kingaünkhi yungsho shuhmülanga kingaünkhinü thiyuchihchim yungsho amulongkhi kingaün yungsho akhukhitkhi thünio dünjishihde, moshi yungsho mihnu bolungnü ATUNGPUH kilim arhümthüneade ajihpü thsüsho,

⁴shepünü ATUNGPUH kilim kingaün jihbanü apinü ayikangkang khahngak 1 ching oliv müdangke pungdüchi 1 yukbah hi kingaün jihbeah;

⁵tüsho yukhu pungdüchi 1 ju nünü taka kingaünkhi yungsho shuhmülanga kingaünkhi lung yukbah, namfimihnunu abande thsakhamang.

⁶Yungsho mihnupung 1 jihsho ayikangkang khahngak 2 oliv müdangke pungdüchi 1 kheak niukshakkhüh yukbah hi kingaün jihang;

⁷tüsho ayungbe kingaün ching nünü yukhu pungdüchi 1 kheak niukshakkhüh yukbah ATUNGPUH kilim arhümthüneade jihang.

⁸Tüsho nünü taka kingaünpü yungsho thiyuchihchimkhi dünkheak shuhmülanga kingaünkhi yungsho ATUNGPUH kilim mungtsü kingaünpü moshipung nunu lusho,

⁹moshipung nunu lung ju ayikangkang khahngak 3 ching oliv müdangke pungdüchi 2 yukbah ajihbeah;

¹⁰tüsho ayungbe kingaün ching yukhu pungdüchi 2 monü taka kingaünde ATUNGPUH kilim arhümthüneashang.

¹¹Hanangde moshipung nunu, mihnupung, yungsho namfimihnunu yungsho mihnu nunu abande arhimobeah.

¹²Nünü ajihkhi khekhi yande nünü ju abande thsakhamang.

¹³Nihbuh lapung chingnü azüberü abannü ha yande taka kingaün jihkhi hode ATUNGPUH kilim arhümthüneashang.

¹⁴Tüsho khiungkerü khürü nüsa lung larü yungsho nüsa lung lünnü alarünü taka kingaün jihde ATUNGPUH kilim arhümthüneashihpü thsüsho, nüsanü arhimokhi ruk apinü she arhimobah.

¹⁵Nüsa le nüsa lung larü khiungkerübo thsungkheaknü lün thsungkheak yakzan khülang labah; nüsa künangde la, junangde khiungkerü she ATUNGPUH miki rukhüh labah.

¹⁶Yakzan khülang tüsho thiyuzüng khülang nüsa le nüsa lung larü khiungkerü thsungkheak rukhüh labah.

¹⁷Tüsho ATUNGPUHNÜ Mosa ki tha,

¹⁸Israelrü mihtsürübo ki thaang, Inü bede ayükhi lo ching küyimki nüsa yüzahbanü,

¹⁹nüsanü alo chingnü akhiukkhi yikhap tsühchoki, ATUNGPUH kilim arung kingaün jihbeah.

²⁰Nüsanü hi akhuh chukhi chingnü yikhap jihang tüsho ju rhimopung ching yo kingaün jihkhi nangde jihang.

²¹Nüsanü akhuh nungkhi yikhap ATUNGPUH kilim lünnü kingaün jihang.

²²Tüshe nüsanü müreanglimnü ATUNGPUHNÜ Mosa ki thakhi yukhümbo khürü manide lakmihsho —

²³ATUNGPUHNÜ Mosa hode nüsa kilim jihkhi thiyukhüm alala, ATUNGPUHNÜ thiyukhüm jihkhi nimungnü tüsho nüsa arübe lün khiungde,

²⁴tüsho ju botonü mümükheahde yihbeaka lasho, boto alalanü moshipung nunu 1 taka kingaün jihde, ATUNGPUH kilim arhümthüneashihbah, juju yakzan yande hi kingaün tüsho ayungbe kingaün tüsho neak kingaün thsungkheak mihnupung 1 jurü bolungnü ajihbeah.

²⁵Jumonü amükeambuhnü Israelrü tsührü boto dünthsükhide neak bahjihbah tümüde ju müreanglimnü yihbeak; arübonü taka kingaünkhi tüsho müreanglimnü ayihbeakkhi neak kingaün ATUNGPUH miki handarübah.

²⁶Israel mihtsürü boto alala tüsho arü bolung lakhi khiungkerü alala kilim neak bahjihbah, tümütüsho mihtsürü athrünkhinü müreanglimnü rhimodo.

²⁷Tüsho mihtsürü khülangnü müreanglimnü neak yihbeaksho, apinü mihnu dre kam khülang bankhi neak kingaün jihbah.

²⁸Jumonü küyimki mihtsürü khülangnü ATUNGPUH miki müreanglimnü neak yihbeakbanü api müsühkhitde amükeambuhnü dünthsükhibah; tüsho api neak bahjihbah.

²⁹Nihbuh lo ching Israel mihtsürü lung zübekhi thsüala tüsho arü bolung lakhi khiungkerü thsüala, müreanglimnü ayihbeakkhi neak dünkheak yakzan khülang lang alabah.

³⁰Tüshe mihtsürü shepünü mede neak yihbeakbanü, nihbuh lo ching züberü yungsho khiungkerü thsüthsü, shepü ATUNGPUH miki amülim handarübanü, api nihbuh mihtsürü bolungnü khekhita bahbah.

³¹Tümütüsho apinü ATUNGPUH yu bahyukdo, tüsho api yukhüm thsümünim, ju buh mihtsürü ju tsükjide khekhita bahbah; anihbuh neak api kheak labah.

³²Kheakü Israelrübo sunglo ching lachoki, arünü mihtsürü khülang amunimung sang yihde ngü.

³³Tüsho api sang yihde angürübonü api ju Mosa le Aron tüsho boto kilim bebah arü.

³⁴Arünü api rihyam ching zo, tümütüsho api dünkheaknü tümü rhimobeanü müthayide alakheah.

³⁵Tüsho ATUNGPUHNÜ Mosa ki tha, “ Mihtsürü ju tsükjide asheshihbeah; boto alalanü api binkheampung aleanglimnü rusahabah.”

³⁶Jumonü ATUNGPUHNÜ Mosa ki thiyukhüm jihkhi nangde, boto alalanü api binkheampung aleanglim bede wukhiuk tüsho lungnü rusahabah.

³⁷Kheaküshe ATUNGPUHNÜ Mosa ki tha,

³⁸“ Israelrü mihtsürübo ki thaang, Arü tsührü-tsührü lün ching khim münkheam kheak amüngam müchepü thaang, tüsho amünkheam lim amüchekhi ching biyi hing yukshang.

³⁹Tüsho nüsa kheak hingmüngam müchekhi ju alabah, tüsho ju kheak kheahbahle ATUNGPUH yukhümbo lümkhitbah, tüsho jurübo rhimobah, tüsho jude athsükhinü nüsa mulong tüsho nüsa müknü abekhi lim müzammüramde nüsanü müyü,

⁴⁰tüsho I yukhümbo lümkhitde arhimobah, tüsho nüsa Thrünpuh kilim müsühde alabah,

⁴¹I ATUNGPUH nüsa Thrünpuhnü, nüsa Thrünpuh thsüpü nüsa Ijip lo chingnü bekhit; I ATUNGPUH nüsa Thrünpuh.”