Read Yimchungru Naga Wüh 18 Bible Online

Wüh 18 - Yimchungru Naga bible

Wüh 18

¹ATUNGPUHNÜ Aron ki tha, “Nü, nü tsührübo tüsho nüsa buhtsührünü arüngyam azhihdewusukhi zhipdode hahmülang lubah, tüshe nü le nü tsührübonü lang amükeamrü azhihde-wusukhi hahmülang lubah.

²Kheaküshe nü lung nü keoniorü Levirübo, nü buhtsüh chingnü bebah arang, junangde nü tüsho nü tsührübo tangzüng arüngyam ching tankihchoki arübo nüsa lung bebah.

³Arübonü nü tüsho arüngyam yihnüpü ching rungbah; tüshe arünü küyimkishe arüngyam kukruk tüsho kingaün sadam phünide marü. Jude yungsho arü tüsho nü she ashebah.

⁴Arübonü arüngyam alala ching tankihpü tüsho arüngyam rhimo alala thsungkheak nü lung bebah; tüshe püpürü a nü thüninde marü.

⁵Tüsho Israel mihtsürü kheak bukakhiukkhi mülaloshihpü thsüde nünü arüngyam tüsho kingaün sadam hahmülang rhimo alala thsang.

⁶Kheahang, I küdah thsüde inü nü keoniorü Levirübo Israelrü bolungnü ludo; arübo ashorupung khimyam rhimo rhimoshihpü ATUNGPUHNÜ nü kilim jihkhi thsambah ah.

⁷Jumonü nü lung nü tsührübo bebah kingaün sadam tüsho zhindokhim dunglim amükeam rhimo alala rhimobeah; tüsho nünü tankihbah. Atankihbe thsambah nangde inü nü kilim amükeamrü thsüshihkheah, tüshe püpürü a shepünü phünide arübanü asheshihbah.”

⁸Tüsho ATUNGPUHNÜ Aron ki tha, Ha ching, Israel mihtsürübonü amüsüh arung kingaün jihkhibo inü nü kilim jihdo; inü harübo nü tüsho nü tsührübo shihcham thsüde lünnü rhimode ayüshihpü yakzan jihdo.

⁹Ha mo ching mütakbe khide amüsüh kukruk nü yo thsübah: arünü kingaünkhibo, hi kingaünkhi, neak kingaünkhi tüsho arünü I kilim shuhmülanga jihkhi amülim dün kingaünbo ju nü tüsho nü tsührübo thsungkheaknü khide amüsüh labah.

¹⁰Khide amüsüh dangpung chingnü nüsanü ju tsühbah; athrürü abannü atsühbah. Ha nüsa kilim amüsüh labah.

¹¹Ha she nüsa yo ah: arünü arung kingaünkhi thsambah, ju lung Israel mihtsürübonü müleamde kingaünkhibo, jurübo inü nü tüsho nü tsührü tüsho tsührübo kilim lünnü rhimode ayüshihpü thsüde yakzan jihdo. Nüsa yamkhün ching müsühde alarü abannü ju tsühpü kuklah.

¹²Müdangke bolung atsüdakbe, yukhu aso tüsho ke bolung atsüdakbe arübonü sangaso ATUNGPUH kilim jihkhibo inü nü kilim jihdo.

¹³Arü lo ching sangaso akhuhde amünkhi arünü ATUNGPUH kilim hande arükhi ju nüsa yo thsübah. Nüsa yamkhün ching müsühde alarübonü ju tsühpü kuklah.

¹⁴Israel ching shuhmülanga jihkhi kukruk athrünkhi nüsa yo thsübah.

¹⁵Mihtsürü thsüthsü shiwüh thsüthsü akhuhde angükhi küpü arünü ATUNGPUH kilim handarübanü ju nüsa yo thsübah; tüshe akhuh zübekhi mihtsürü nüsanü rhokhitbah tüsho akhuh anukhi mümüsühkhi shiwühbo she nüsanü rhokhitbah.

¹⁶Azürü khinu khülang bankhitkhi ju arüngyam ching akhukhi shotoyinchi 5 jihbah arhokhitbeah.

¹⁷Tüshe akhuhde anukhi moshibo, namfimihnu tüsho mihnubo a mürhokhitlokhuk; harübo amüsüh ah. Nünü harü thiyih kingaün sadam kheak rhakkihang, tüsho amüdangkebo ju monü taka kingaünde ATUNGPUH kilim arhümthüneashang.

¹⁸Akhüh tüsho tsülim pho müleamde kingaünkhi küpü nü yoanü junangde ashihtsübo nü yo thsübah.

¹⁹Amüsüh kukrukbo Israel mihtsürübonü ATUNGPUH kilim arung kingaün jihkhibo lünnü rhimode ayüpü yakzan thsüde inü nü tüsho nü tsührübo le tsührübebo kilim jihdo; ha ATUNGPUH miki lünnü müthsümünimde alapü nü tüsho nü tsührü tsührübo kilim tangzüngkhi lah.

²⁰Tüsho ATUNGPUHNÜ Aron ki tha, “ Arü lo ching nü yamrüplurüp tümü müla, yungsho arü bolung shihcham müla; Israel mihtsürü bolung I ju nü shihcham tüsho yamrüplurüp ah.”

²¹Kheahang, Levirünü arüngkhimyam ching rhimokhi dün Israel ching hanmukhungkhi thürü shihcham arü kilim yamrüplurüp nangde jihdo.

²²Kheaküa Israelrü mihtsürübonü arüngyam phünide marü, jude yungsho arünü neak yihbeakbah tüsho ashebah.

²³Tüshe Levirünü arüngyam ching arüngakobo rhimobah, tüsho arünü arü münean hanbah; ha lünnü tsührü-tsührü lün khiungde yakzan labah, junangde Israel mihtsürü bolung arü yamrüplurüp müla.

²⁴Tümüde Israel mihtsürübonü thürü shihcham ATUNGPUHNÜ kilim arung kingaün jihkhi inü Levirü kilim yamrüplurüp thsüde jihdo; jumonü inü arü ki tha, “ Israel mihtsürü bolung arü yamrüplurüp müla.”

²⁵ATUNGPUHNÜ Mosa ki tha,

²⁶Ha Levirü bo ki thaang, Nüsa yamrüplurüp thsüde inü ajihkhi thürü shihcham küyimki Israel mihtsürü kheaknü alubanü, ju yo thürü shihcham nünü ATUNGPUH kilim arung kingaün jihang.

²⁷Tüsho nünü arung kingaün jihkhi ju rhimopung ching yo hi tüsho yukhu aso nangde akhebah.

²⁸Hanangde nünü Israel mihtsürübo kheaknü alukhi chingnü thürü shihcham ju ATUNGPUH kilim arung kingaün jihbeah, tüsho nünü ha ATUNGPUH arung kingaün ju amükeambuh Aron kilim jihang.

²⁹Nünü aleangkhikhi atsüdakbe tüsho amüsühkhitkhi chingnü ATUNGPUH kilim jihang.

³⁰Jumonü nünü arü ki thaang, Küyimki nünü atsüdakbe ju ajihbanü aningkhibo ju Levirübo kilim rhimopung ching yo hi tüsho yukhu aso nangde akhebah.

³¹Küpüküpü dangpung chingnü she nü tüsho nü yamkhünnü atsühpü kuklah, tümüde ha nüsanü arüngyam ching rhimokhi dün thsambah ah.

³²Tüsho nüsanü atsüdakbe jihkhi dünkheaknü nüsa neak müla; tüshe nüsanü Israel mihtsürübonü amüsüh thsambahbo jihkhi dümüneanshih, jude yungsho nüsa ashebah.