Read Yimchungru Naga Wüh 19 Bible Online

Wüh 19 - Yimchungru Naga bible

Wüh 19

¹ATUNGPUHNÜ Mosa tüsho Aron ki tha,

²Ha ATUNGPUHNÜ thiyukhüm jihkhi yakzan; Israelrübo ki moshi nunu amürüm areak yungsho lapha mükihkhi tüsho küyimkishe hah mühankhi nüke kilim lubah arang de thaang.

³Nükenü ju amükeambuh Eleazar kilim jihbah, junangde apinü binkheampung aleanglim bede wukhiukbah tüsho ju api mikinü alaksahbah;

⁴amükeambuh Eleazarnü athiyih khürü ayingkhing kheaknü alubah, tüsho arüngyam müngüh thüne ki khuhlangde arheakbah.

⁵Jushu moshi ju api mikinü atakbah: ju lung aküp, ayin, athiyih, tüsho bukningbo takbah.

⁶Tüsho amükeambuhnü cedar sang, monam tüsho amürüm liu lubah moshi takkhi mo phulung jipyukbah.

⁷Jushu amükeambuhnü nihbuh khimmih müsühbah tüsho kemüyihbah, tüsho anükhüh labah api binkheampung ching arübah; amükeambuh ju arelim khiungde mümüsühkhi labah.

⁸Tüsho shepünü ju takbanü nihbuh khimmih müsühbah tüsho kemüyihbah, tüsho arelim khiungde mümüsühkhi labah.

⁹Jushu mihtsürü amüsüh khülangnü moshi takkhi wah ju wumukhungbah binkheampung aleanglim amüsüh dangpung ching zobah; tüsho ju Israel boto thsungkheak kenü müsühkhitpü rhimo ching lupü thsüde azobah; ha neak chingnü müsühkhitkhi lah.

¹⁰Tüsho shepünü moshi takkhi wah ju awubanü nihbuh khimmih müsühbah tüsho arelim khiungde mümüsühkhi labah. Ha Israel mihtsürü tüsho arü lung larü khiungkerü thsungkheak lünnü yakzan labah.

¹¹Shepünü ashemi kheak qiubanü api nimung thüne mümüsühkhi labah.

¹²Api küdah thsüde nimung mahsam ni tüsho thüne nipü kemüyihde müsühkhitbah, tüsho api amüsüh labah; tüsho apinü nimung mahsam tüsho nimung thüne nipü ching mümüsühkhitsho, api mümüsüh.

¹³Sherünü ashemi qiubahle mümüsühkhitbanü, ATUNGPUH arüngyam müneanjihchoh. Ju buh mihtsürü Israelrü bolungnü khekhita bahbah. Api mümüsühkhi labah, tümütüsho amüsühkhitbe ke api kheak mürhakkih; api mümüsühkhi judü lang api kheak lah.

¹⁴Ha mihtsürü khimyam chingnü ashechoki yakzan: khimyam ching arürü alala tüsho khimyam ching larü alala nimung thüne mümüsühkhi labah;

¹⁵tüsho mühüpdokhi phühlungbo alala mümüsüh.

¹⁶Sherübonü thulu ching thsühnuknü alaksahkhi khürü yungsho mihtsürü ro, yungsho kiuyuk qiubanü nimung thüne mümüsühkhi labah.

¹⁷Tüsho müneana lakhi mihtsürü thsungkheaknü arünü neak chingnü amüsühkhitpü thsungkheaknü moshi takkhi wah khürü lubah tüsho bukde alakhi ke lubah phüh ching yukbah.

¹⁸Amüsüh mihtsürü khülangnü monam lubah ke ching thsambah, khimyam, phühbo, ju kheak larü mihtsürü yungsho aro, alaksahkhi, ashekhi yungsho kiuyuk qiurü kheak rhakkihbah.

¹⁹Amüsüh mihtsürü junü amüneankhi kheak nimung mahsam tüsho nimung thüne nipü ching rhakkihbah; tüsho nimung thüne nipü ching api müsühkhitbah, khimmih müsühbah tüsho kemüyihbah, tüsho arelim api amüsüh labah.

²⁰Tüshe mihtsürü shepü müneanbahle mümüsühkhitbanü, ju buh mihtsürü ju boto chingnü khekhita bahbah, tümütüsho apinü ATUNGPUH arüngyam müneanjihdo. Amüsühkhitbe ke api kheak mürhakkih; api müneana lah.

²¹Ha arü thsungkheak lün yo yakzan lah. Shepünü amüsühkhitbe ke rhakbanü khimmih müsühbah; tüsho shepünü amüsühkhitbe ke qiubanü arelim khiungde müneana labah.

²²Tümüpürü amüneankhi mihtsürünü aqiubanü müneana labah; tüsho mihtsürü shepünü ju qiubanü arelim khiungde müneana labah.