Read Yimchungru Naga Wüh 21 Bible Online

Wüh 21 - Yimchungru Naga bible

Wüh 21

¹Küyimki Kananrü, Negeb ching larü Arad kiulongthsüpuhnü Israelrü Atharim limro chingnü arüchoh de asokhea, apinü Israelrü bebah keochih, tüsho khürü rama lu.

²Tüsho Israelrünü thiyuchihchimde ATUNGPUH ki tha, “Nünü harü mihtsürü isa khah ching jihsho, isanü arü kiutobo shahde thsümünimjihbah.”

³Tüsho ATUNGPUHNÜ Israelrü yu anide Kananrübo arü khah ching jih tüsho arünü kiutobo shahde thsümünimjih. Jumonü ju dangpung ki ju Horma de ji.

⁴Jushu arü Edom lo mühide ayüpü, Hor wung chingnü tsahmusubah Amürüm Keto limro yande yü, tüsho limro ching mihtsürübo marümkheamkhukde kam.

⁵Tüsho mihtsürübonü Thrünpuh tüsho Mosa azhihde tha, “ Tümüde nünü isa sunglo ching sheshihpü Ijip chingnü bede atukhea? Tümüde ju ching jim tüsho ke müla, tüsho yikhap yancho hanü isa mukhiuka lah.”

⁶Jumonü ATUNGPUHNÜ müzüm phuruto Israelrü bolung arüshihbah mihtsürübo nguh; tüsho Israel mihtsürübo ahihkhüh sheabah.

⁷Jumonü mihtsürübonü Mosa kilim arübah tha, “ Isanü ATUNGPUH tüsho nü azhihde athakhi hode neak yihbeakdo; isa kheaknü phuruto tsoabahshihpü ATUNGPUH ki tamkhüntamnüjang.” Jumonü Mosa nü mihtsürübo thsungkheak tamkhüntamnü.

⁸Tüsho ATUNGPUHNÜ Mosa ki tha, “ Müwayinchi phuruto khülang thsüang, tüsho sangkhrih kheak yihkihang; tüsho sherübo nguhbanü ju kheak kheahsho rhangdung labah.”

⁹Jumonü Mosanü müwayinchi phuruto thsübah sangkhrih kheak yihkih; junangde phurutonü khürü nguhbah ju kheak kheahsho rhangdung la.

¹⁰Kheakü Israel mihtsürü tsahmusude yübahle Oboth ching binkheam.

¹¹Tüsho arü Oboth chingnü tsahmusubah Moab aniakhiuklim sunglo, Iye-abarim ching binkheam.

¹²Ju chingnü arü tsahmusubah Zered dükhün ching binkheam.

¹³Ju chingnü tsahmusubah Amorrü lo aredung yean sunglo Arnon thripkhüh limpeang binkheam; tümüde Arnon ju Moab tüsho Amor dükeak aredung ah.

¹⁴Jumonü ATUNGPUH thirithsü hüm ching thaa lah, “Waheb ju Supha ching, Arnon ayungbo,

¹⁵tüsho jindükhün düpheaknü Ar kiuto ching Moab aredung khiunglah.”

¹⁶Tüsho ju chingnü arü Beer ching yü, küpü kekhip ching ATUNGPUHNÜ Mosa ki tha, “ Mihtsürübo bemukhungang, tüsho inü arü kilim ke duhbah.”

¹⁷Judüki Israelrünü ha khün thsü: “O kekhipbo, ke bukkhitang; Tüsho isanü khün thsübah —

¹⁸Limberübonü akiukhi kekhip,lomi ching mükheahmudurübonü akiukhi, yakzan thsürübonü akiukhi, kiulongthsü tsonü akiukhi.” Arübo sunglo chingnü Mattana ching yü,

¹⁹tüsho Mattana chingnü Nahaliel, Nahaliel chingnü Bamoth,

²⁰tüsho Bamoth chingnü Moab, Pisga wung kheak sunglo chinzhinpung Moab jindükhün khiung.

²¹Judüki Israelrünü Amor kiulongthsüpuh Sihon kilim yunithsürü yüshihde tha,

²²“ Isa nü lomi hode yüanü. Isanü thulubo yungsho kurungasolu ching müyü; isanü kekhipbo chingnü ke muyung; tüshe isanü nü lomi hode müyüyikia kiulongthsüpuh limro yande ayübah.”

²³Tüshe Sihonnü Israelrü api lomi hode müyüshih, jumonü Sihonnü api mihtsürü alala bemukhungbah Israelrü azhihde sunglo ching wutu, tüsho api Jahaz khiungbah Israelrü bede keochih.

²⁴Israelrünü nukshangnü api laksah, tüsho api lo Arnon kheaknü Jabok khiungde lu; tüshe Amonrü lang khiungde lu; tümüde Amonrü aredung ju chipi düküngde thsüa lakheah.

²⁵Jumonü Israelrünü harü kiutobo lukham, tüsho Israelrünü Amorrü kiutobo, Heshbon tüsho ju mühi alala ching la.

²⁶Tümüde Heshbon ju Amorrü kiulongthsüpuh Sihon kiuto lakheah, api hode akhuhlim Moab kiulongthsüpuh kheak keochih, tüsho api lomi Arnon khiungde lukham.

²⁷Jumonü müchitmuduyu tharünü tha, “ Heshbon ching arang, ju thsüshang; Sihon kiuto thsüloshang.

²⁸Tümüde Heshbon chingnü mo, motru khülang Sihon kiuto chingnü akhiuk; junü Moab ching lakhi Ar thsümünim tüsho Arnon mujukbo muliuabah.

²⁹Moabrübo nüsa ayokhe! Nüsa Kemosh kingaünrübo dükheakabahdo! Nüsa Thrünpuhnü athrürübo tsotsahrümtsahrü kamshih, tüsho aliberübo Amor kiulongthsüpuh khah ching aramrü kamshih.

³⁰Tüshe kheakü arü tsühsoniusobo dükheakdo, Heshbon chingnü Dibon khiungde, Nashim chingnü Nopha khiungde, ju Medeba phünide.”

³¹Hanangde Israelrü ju Amorrü lo ching la.

³²Tüsho Mosanü Jazer züta kheahshihpü thiyi; tüsho arünü ju kiulongbo lukhambahle ju ching larü Amorrü yankhitabah.

³³Tüsho arünü rholobahle Bashan limro yande wutu. Jumonü Bashan kiulongthsüpuh Ognü mihtsürü alala bebah arü bede keochihpü Edrei ching wutu.

³⁴ATUNGPUHNÜ Mosa ki tha, “Dütre, tümüde inü api lung mihtsürübo tüsho alomi nüsa khah ching jihdo; tüsho Heshbon ching lakhi, Amor kiulongthsüpuh Sihon kheak rhimochoki nangde nüsanü api kheak rhimobah.”

³⁵Jumonü arünü api, atsührübo, api mihtsürübo sheshe maningshihde laksah; tüsho arünü api lomi lu.