Read Yimchungru Naga Wüh 22 Bible Online

Wüh 22 - Yimchungru Naga bible

Wüh 22

¹Tüsho Israel mihtsürü tsahmusubahle Jirikho hobah Jordan thripkhüh lim Moab dükhün ching binkheam.

²Kheakü Zippor tsührü Balaknü Amorrü kheak Israelrünü arhimokhibo ngü.

³Tüsho mihtsürü hihmonü Moabrü khide trede kam, tüsho Israelrü dünkheaknü Moabrübo atrekhinü tukthsüde kam.

⁴Jumonü Moabrünü Midia azothsürübo ki tha, “Kheakü moshipungnü thulu ching rim müleaka tsühkhi nangde harü botonü isa mühide alakhi alala müleaka tsühpü thsüchoh.” Tüsho Zippor tsührü Balak ju kim ching Moab kiulongthsüpuh lakheah.

⁵Jumonü apinü Beor tsührü Balaam kilim api mihtsürü tsührübo lomi ching keto phünide Pethor ching api jide thiyusheak yüshih, tüsho tha, “Kheahang, mihtsürübo Ijip chingnü arüa lah. Kheahang arünü alomi michoh, tüsho arübo thüninde lah!

⁶Jumonü khülang ki arübah harü mihtsürübo athruang, tümüde arübo I thsungkheak khide wu-sühmüh lah. Judüalalashe inü arü kukbah tüsho lomi chingnü yankhita bahbah, tümüde nünü shepü kheak müngühjihbanü müngühjihchoh, tüsho shepü kheak nünü athruchonü muthrumüneanchoh de inü mükheahlah.”

⁷Jumonü Moab tüsho Midia azothsürübonü arü khah ching mebelopü shuhbah Balaam kilim arü tüsho Balaknü athakhi yubo api ki tha,

⁸tüsho apinü arü ki tha, “Khihre ha ching binang tüsho ATUNGPUHNÜ I ki thakhi nüsa kilim thiyusheak lubah arüanü.” Jumonü Moab kiulongthsürü tsührübonü Balaam lung bin.

⁹Tüsho Thrünpuhnü Balaam kilim arübahle tha, “Nü lung larü mihtsürübo ha sherü a?”

¹⁰Apinü alo, “Zippor tsührü Balak, Moab kiulongthsüpuhnü I kilim ha thashihpü arü arüshih-a lah.

¹¹Kheahang, Ijip chingnü mihtsürü akhiuka lah, tüsho arünü lomi mia lah. Kheakü arübah I thsungkheaknü arü athrujang, jude thsüsho inü arü kheak keochihkhukbah tüsho yankhita bahbah.”

¹²Tüshe Thrünpuhnü Balaam ki tha, “Nü arü lung müyü, nünü mihtsürübo mathruaji, tümüde arübo inü müngühjihdo.”

¹³Jumonü Balaamnü yapsu asürübahle Balak yunithsürübo ki tha, “Nüsa lomi lim alode yüang, tümüde I nüsa lung yüpü ATUNGPUHNÜ thsunglodo.”

¹⁴Jumonü arünü Balak kilim alode yübahle tha, “Balaamnü isa lung arüpü thsunglochoh.”

¹⁵Tüsho Balaknü kiulongthsürü tsührübo akhuhlim kheaknü ahihbe tüsho khide adungtobo yüshih.

¹⁶Arünü Balaam kilim arübah api ki tha, “Zippor tsührü Balaknü ha thachoh: Muzhobah nü I kilim arüpü tümünü she düzhipdoshih;

¹⁷tümüde tsükjide inü nü wüntrebah, tüsho nünü I ki tümüpürü thabanü ju rhimobah. Jumonü muzhobahle arübah harü mihtsürü I thsungkheaknü athrujang.”

¹⁸Tüshe Balaamnü alo, “Balaknü I kilim api yam, shotoyinchi tüsho sunanü mide jihjih she, nükde yungsho hihde arhimopü, ATUNGPUH I Thrünpuh yu ayiuhde müyü.

¹⁹Jumonü muzhobah nüsa she khihre ha ching binang, junangde ATUNGPUHNÜ I ki tümü thalobanü inü amükheahbah.”

²⁰Tüsho ju tsüngre Thrünpuhnü Balaam kilim arübah api ki tha, “ Mihtsürübo arübah nü jisho asürübah arü lung yüang; tüshe inü nü ki küpü yu thachonü nünü ju lang arhimobah.”

²¹Jumonü Balaamnü yapsu asürübahle anihbuh donki kheak bin tüsho Moab torü bolung yü.

²²Judüki Thrünpuh bukakhiuk tümütüsho Balaam yüde alakheah, tüsho ATUNGPUH yunirünü api azhihde limro ching zhip. Balaamnü anihbuh donki kheak binbah be tüsho api yamlarü mahne api lung lakheah.

²³Kheakü donkinü A TUN GPU H yunirü akhah ching nukshang shuhbah limro ching zhipde ngü, tüsho donkinü limro ching rholobahle thulu limpeang yü. Jumonü Balaamnü donki ju limro lim rholode arüshihpü rhap.

²⁴Judüki A TUN GPU H yunirünü kurungasolu düpheak thripkhüh thripkhüh rhü lakhi amütsüm limro ching zhip.

²⁵Tüsho küyimki donkinü ATUNGPUH yunirü zhipde angükhea, apinü rhü kheak nimkih tüsho Balaam jing rhü kheak zükih; jumonü apinü donki kheak rhaplo.

²⁶Jushu ATUNGPUH yunirünü limshude yü tüsho tsülim yungsho huzulim anguhpü limro mülakhi amütsüm dangpung kheak zhip.

²⁷Tüsho küyimki donkinü ATUNGPUH yunirü ngükhea, api Balaam khüp mühüpa yap; jumonü Balaam buk alü akhiuk, tüsho donki kheak api tsonü rhap.

²⁸Judüki ATUNGPUHNÜ donki mün khimshuhjih, tüsho donkinü Balaam ki tha, “ Inü nü ki tümü rhimokhi, nünü I kheak mahsam ki rhapkhea?”

²⁹Tüsho Balaamnü donki ki tha, “ Tümütüsho nünü I ki keangrümünedo. I khah ching nukshang shuhkhülaa inü nü laksah-a labah.”

³⁰Jumonü donkinü alo, “ I ha nü rhangdung amuyung khihni khiungde nü binkhi yungde? Püpüki inü ha ruk rhimodo de?” Apinü tha, “Yung.”

³¹Judüki ATUNGPUHNÜ Balaam mük khimshuhjih, tüsho apinü ATUNGPUH yunirü akhah ching nukshang limro ching shuhbah zhipde ngü; tüsho apinü amiro koyubah khukninga yap.

³²Tüsho ATUNGPUH yunirünü api ki tha, “ Tümüde nünü nü yo donki kheak mahsam ki rhapkhea? kheahang, nü azhihde azhippü I akhiukdo, tümütüsho I miki nü limro khudolah.

³³Donkinü ngübah I kheaknü mahsam ki rholobah tsodo. Apinü I kheaknü rholobah mütsokhülaa tsükjide inü nü laksah-a labah tüsho api arhang lashihbah.”

³⁴Tüsho Balaamnü ATUNGPUH yunirü ki tha, “ Inü neak yihbeakdo, tümüde I azhihde nü limro ching zhipkhi inü mümükheah. Jumonü nü miki amülim thsüa lasho, I alode ayübah.”

³⁵Tüshe ATUNGPUH yunirünü Balaam ki tha, “ Mihtsürü bolung yüang, tüshe inü nü ki thakhi yu lang nünü athabah.” Jumonü Balaamnü yunithsürü lung yü.

³⁶Küyimki Balaam arüchoh de Balaknü asokhea, apinü anihbuh shorupü Moab kiuto ching yü, ju api lomi akheam lim Arnon aredung ching lakheah.

³⁷Tüsho Balaknü Balaam ki tha, “ Inü nü jishihpü nü kilim mushude thiyia marüshih de? Tümüde nü I kilim marükhea? Inü nü ki wüntre müjihkhukba de?”

³⁸Tüsho Balaamnü Balak ki tha, “Kheahang, I nü kilim arüdo! Kheakü inü tümükhüh thapü kukla shi? Thrünpuhnü I mün ching yukjihkhi yu lang inü athabeah.”

³⁹Jumonü Balaamnü Balak lung yü, tüsho ane Kiriath-huzoth ching arü.

⁴⁰Tüsho Balaknü moshipung le namfimihnu laksah-a kingaün, tüsho shih khürü Balaam tüsho api lung arürü kilim jih-a yüshih.

⁴¹Jumonü ashidopü, Balaknü Balaam bebah Bamoth Baal ching wutu, tüsho ju chingnü apinü Israel mihtsürü chamkhüh ngü.