Read Yimchungru Naga Wüh 24 Bible Online

Wüh 24 - Yimchungru Naga bible

Wüh 24

¹Küyimki Israel müngühjihpü Thrünpuhnü mulongkhi Balaamnü angükhea, püpüki kim ching nangde apinü rük huhpü limro müyim, tüsho api miro sunglo thrip abinabah.

²Tüsho Balaamnü amük züngkihbah kheahshe Israelrübo trük binkheamde ngü. Tüsho Thrünpuh memüsüh api kheak arü,

³tüsho apinü müchitpü tankih: “Beor tsührü Balaamnü müchitkhi, mük khimshuh-a lakhi mihtsürünü müchitkhi,

⁴Thrünpuh yu sobuhnü müchitkhi, shepünü Wuto lümkhi ngücho, shepü mük rheakde akicho:

⁵O Jakob, nü khimyambo küdükhüh atsü, O Israel, nü lapung küdükhüh atsü!

⁶Jindükhünbo yapkihde limshu ching yükhi nangde, ayung yean shahwünbo nangde, ATUNGPUHNÜ akhimkhi molisang nangde, ke mungyean lakhi cedar sang nangde.

⁷Arü tsüng suhdahde arübah, tüsho arü müjih kepheang lubo ching yangbah.

⁸Thrünpuhnü arü Ijip chingnü bekhit; arü kheak mütüm moshipung sühmüh kihlah. Arünü arü riri trükshihbo tsühabahchoh, tüsho arü ro shimshim yihthünakchoh; arü hühzonü arü kipashungchoh.

⁹Kekhüzü nangde arünü khukningchoh, tüsho zuh-a yapchoh, kekhüzü dreto nangde shepünü arü yihmusukhukpü? Shepünü nü müngühjihbanü müngühmühi, tüsho shepünü athrubanü athrubah.”

¹⁰Judüki Balaknü Balaam azhihde bukakhiuk; tüsho api khah mahne damde Balaam ki tha, “ I riri athrushihpü inü nü jikheah, tüshe kheahang, nünü arü kilim mahsam ki suhdahde müngühjihdo!

¹¹Jumonü kheakü nü lapung lim tsoang. Inü nü tode akin jihbah de thado, tüshe ATUNGPUHNÜ akin jihshihpü chingnü tholoabahdo.”

¹²Jumonü Balaamnü Balak ki tha, “Nünü I kilim arüshihkhi nü yunirübo ki she ha ruk mütha de,

¹³Balaknü api yam shotoyinchi tüsho sunanü mide jihjih she I lümkhi atsü yungsho amütsü thsüthsü inü ATUNGPUH kheak hode mujukhokhuk; tüshe ATUNGPUHNÜ tümü thabanü, inü ju thabeah?”

¹⁴Balaamnü Balak ki tha, “ I kheakü I mihtsürü kilim yüchoh, arang, arübe nimung ching harü mihtsürünü nü mihtsürübo kheak tümü rhimopü lanü nü ki huhanü.”

¹⁵Tüsho apinü müchityu tha: “Beor tsührü Balaamnü müchitkhi, düshihde angübuhnü müchitkhi,

¹⁶Thrünpuh yu sobuhnü müchitkhi, shepünü Khide Achangbuh mükheahmudu mükheah la, shepünü Wuto tüsho api mük tode khimshuhbah akibuh lüm ngücho:

¹⁷Inü api ngüchoh, tüshe kheakü yung; inü api kheahchoh, tüshe müphüni — Jakob kheaknü chining khülang akhiukbah; shoto tso khülang Israel bolungnü asürübah; apinü Moab aredungbo zünakbah tüsho Seth tsührübo alala keamshihbah.

¹⁸Edom kheak kukbah; api riri Seir kukbah, tüshe Israel a düküngde alabah.

¹⁹Jakob kheaknü yakzanshuhrü khülang akhiukbah, tüsho kiuto ching aninga larübo thsümünimjihbah.”

²⁰Judüki Balaamnü Amalekrü kheahbah müchit: “ Amalek ju trükshih bolung akhuhbuh lakheah, tüshe akheam ju a lünnü adükheakbah.”

²¹Tüsho apinü Kenrü kheahbah müchit: “Nüsa lapung dükünglah, nüsa sap lungto ching thsülah;

²²tütüshe Asshurrünü ramde atsochoki nüsa Kenrü thsümünimabahbah.”

²³Tüsho apinü müchit: “ Aha, Thrünpuhnü ha ruk rhimochoki shepünü alakhukba?

²⁴Sangkungbo Kittim chingnü arübah; arünü Asshurrü tüsho Eber junobah tüshe arü she adükheakbah.”

²⁵Judüki Balaamnü asürübah api lapung lim yü tüsho Balak a nihbuh limro tsoabah.