Read Yimchungru Naga Wüh 27 Bible Online

Wüh 27 - Yimchungru Naga bible

Wüh 27

¹Judüki Josep tsührü Manase yamkhün chingnü api tsührü Makir kheak yo Gilead tsührü Hepher tüsho api tsührü Zelophehad kheak yo aliberübo mikhuhlim arü; tüsho api tsührübo mung: Mahla, Noa, Hogla, Milka, tüsho Tirza.

²Tüsho arünü arüngyam ripit ki Mosa le amükeambuh Eleazar, tüsho limberü le boto alala miki zhipbahle tha,

³“ Isa abuh sunglo ching sheabahdo; tüshe apinü Kora borü lung arihde ATUNGPUH mazhih, tahle nihbuh neak chingnü api shedo; tüsho api tsührü athrürü müla.

⁴Api tsührü athrürü mülale de, isa abuh mung nihbuh guk chingnü yihkhita bahpü? Jumonü isa abuh keoniorü lung isa kilim she yamrüplurüp jihang.”

⁵Jumonü Mosanü arü dünkheak ATUNGPUH miki lubah arü,

⁶tüsho ATUNGPUHNÜ Mosa ki tha,

⁷“Zelophehad tsührübebonü küpü thachonü dükdü ah; atsütsü nünü arü kilim arü abuh keoniorü lung yamrüplurüp jihang; tüsho arü abuh yamrüplurüp ju arü kheak yüshang.

⁸Tüsho nünü Israel mihtsürübo ki thaang, ‘ Mihtsürü khülang sheabahshu tsührü athrürü mülasho, nüsanü api yamrüplurüp anihbuh tsührübe kilim jihang.

⁹Api tsührü aliberü mülasho, nüsanü api yamrüplurüp ju anihbuh keoniorü kilim jihang.

¹⁰Api keoniorü mülasho nüsanü api yamrüplurüp ju anihbuh abuh keoniorü kilim jihang.

¹¹Tüsho anihbuh abuh keoniorü mülasho, nüsanü api yamrüplurüp ju api thüninde alarü buhtsührü khürü kilim jihang, tüsho apinü ju lubah. Tüsho ATUNGPUHNÜ Mosa ki thiyukhüm jihkhi nangde Israelrü mihtsürü thsungkheaknü yakzan thsükhi thiyuzüngbo labah.’ ”

¹²ATUNGPUHNÜ Mosa ki tha, “ Abarim wung ching wutuang, tüsho inü Israelrübo kilim jihkhi lo kheahang.

¹³Tüsho küyimki nünü ju ngübanü, nü khiung Aron nangde nü she nihbuh mihtsürü lung yübah.

¹⁴Tümüde Zin sunglo kebo ching botonü azhihde wusuchoki, nüke chidonü arü mük ki I yukhüm amüsüh de ahuhpü I yu mani.” ( Meriba ju Zin sunglo ching Kadesh Kenü ah.)

¹⁵Tüsho Mosanü ATUNGPUH ki tha,

¹⁶“ATUNGPUH , mihtsürü mebo kurungkheak Thrünpuhnü, boto kurungkheak mihtsürü khülang thiyia,

¹⁷arü müngüh wukhiukla azahla de, tüsho bekhitla beyukla de thsüshang; junangde ATUNGPUH mihtsürübo ju namfimihnu aneakrü mülakhi nangde mülabah.”

¹⁸Tüsho ATUNGPUHNÜ Mosa ki tha, “Nun tsührü Jihusua, me lakhi mihtsürü nünü bedarübah nü khah api kheak nimang;

¹⁹api amükeambuh Eleazar tüsho boto miki zhipshihbah, arü mük kinü rhimo nimkihjang.

²⁰Tüsho Israelrü mihtsürü boto alalanü api yu anipü thsüde nünü api kheak nü yukhüm khürü jihang.

²¹Api amükeambuh Eleazar miki zhipbah anihbuh thsungkheak Urim mahkhapkhi yande ATUNGPUH ki keokhishihbah; Eleazar yukhüm hode api tüsho Israel mihtsürü boto wukhiukbah tüsho azahbah.”

²²Jumonü ATUNGPUHNÜ athakhi nangde Mosanü rhimo. Apinü Jihusua bebahle amükeambuh Eleazar tüsho boto alala miki zhipshih.

²³Tüsho ATUNGPUHNÜ thiyukhüm jihkhi nangde Mosanü Jihusua ku kheak akhah nimbah rhimo jih.