Read Yimchungru Naga Wüh 3 Bible Online

Wüh 3 - Yimchungru Naga bible

Wüh 3

¹Ha Sinai Müzüng kheak ATUNGPUHNÜ Mosa ki asukkhi kim ching Aron le Mosa ane lünbo ah.

²Tüsho harü ha Aron tsührübo: Nadab adüjibuh, tüsho Abihu, Eleazar, tüsho Ithamar;

³arübo ju müdangkenü mujujih tüsho amükeamrü thsüshihpü müsühkhit.

⁴Tüshe Nadab le Abihu ane Sinai sunglo ching ATUNGPUH kilim mümüsühkhi mo jihkhi hode ATUNGPUH miki sheabah tüsho ane tsührü mülade alakheah. Jumonü Eleazar le Ithamar anenü ane abuh Aron rhangdung lachoki amükeamrü thsüde tankih.

⁵Tüsho ATUNGPUHNÜ Mosa ki tha:

⁶Levirü trükbo phünide bebah arang, tüsho arübo amükeambuh Aron ki bede yünü zhipshang, tüsho arünü api tankihbah.

⁷Arübonü api tüsho amukhungrü alala thsungkheak ashorupung khimyam miki rhimo rhimobah;

⁸arübo ashorupung khimyam kukruk alala kurungkheak akheahrü thsübah, tüsho arüngyam ching tankihchoki Israelrü thsungkheak rhimo thsübah.

⁹Nünü Levirübo ju Aron le atsührübo kilim jihbah; arübo ju Israelrü bolungnü api kilim shuhmülanga jihkhi lah.

¹⁰Jumonü nünü Aron le atsührübo rhimo ching yüzahshang, tüsho arünü arü amükeam rhimo thsübah; tüshe püpürü shepünü phünide arübanü api asheshihbah.

¹¹ATUNGPUHNÜ Mosa ki tha:

¹²Kheahang, Israelrü tsührü bolung ching akhuh zübekhi lupü dün inü Levirübo ludo. Levirübo I yo thsübah,

¹³tümüde akhuh zübekhi ju I yo; inü Ijip lomi ching akhuh zübekhi laksahchoki, mihtsürü yungsho shiwüh thsüthsü akhuh zübekhi I thsungkheaknü inü Israel ching müsühkhit; arübo I yo thsübah. I ATUNGPUH ah.

¹⁴Sinai sunglo ching ATUNGPUHNÜ Mosa ki tha:

¹⁵Levirübo arü jipürü tüsho guk yande kheang; nünü athrürü aban khinu khülangnü akumung kheang.

¹⁶Jumonü ATUNGPUHNÜ thiyukhüm jihkhi anide Mosanü arübo khe.

¹⁷Harü ha Levi tsührübo: Gershon, Kohath, tüsho Merari.

¹⁸Tüsho harübo Gershon tsührübo tüsho arü guk mung: Libni tüsho Shimei.

¹⁹Kohath tsührübo tüsho arü guk mung: Amram, Izhar, Hebron, tüsho Uzziel.

²⁰Merari tsührübo tüsho arü guk mung: Mali tüsho Mushi. Harübo ha Levirü guk yamkhünbo ah.

²¹Gershon kheaknü Libnirü tüsho Shimeirü yamkhün arü; harübo Gershon yamkhünbo ah.

²²Athrürü khinu khülangnü akumung khekhi 7500.

²³Gershonrü yamkhünbo ju arüngyam dunglim aniyüzahlim thrip binpü thsakham.

²⁴Tüsho Gershon buhtsührü ching abebuh ju Lael tsührü Eliasaph lakheah.

²⁵Gershon tsührübonü ashorupung khimyam ching rhimopü ju, arüngyam, khimyam tüsho amilim yihdobe tüsho ashorupung khimyam ripit zhindobe khim,

²⁶kidokhi limro zhindobe khim, arüngyam le kingaün sadam mühide alakhi kidokhi limro zhindobe khim, liubo tüsho ju lung rhimobebo.

²⁷Kohath kheaknü Aramrü, Izharrü, Hebronrü, tüsho Uzzielrü gukbo arü; harübo ha Kohath gukbo.

²⁸Athrürübo khinu khülangnü akumung khekhi ju 8600nü arüngyam rhimo thsüde la.

²⁹Kohathrü guk arüngyam düjinglim binpü thsakham,

³⁰tüsho Kohathrü jipürü guk kurungkheak limbebuh ju Uzziel tsührü Elizaphan.

³¹Arü rhimobo ju tangzüng sangdan, dükhüm, tsünpung dubopung, kingaün sadambo, arüngyam ching amükeamrübonü ahorikhi pungphurubo, azhindobe khim tüsho jurü lung rhimobebo.

³²Levirü limberü kurungkheak akubeatobuh ju amükeambuh Aron tsührü Eleazar, tüsho arüngyam kümrü kurungkheak kheahpü lakheah.

³³Merari kheaknü Mali tüsho Mushirü yamkhün arü; harübo Merari gukbo.

³⁴Tüsho athrürübo khinu khülangnü akumung khekhi 6200.

³⁵Merari guk kurungkheak limbebuh ju Abihail tsührü Zuriel; arübo arüngyam dukulim binpü thsakham.

³⁶Tüsho Merari tsührübo kilim rhimo jihkhibo ju kingaünpung kümlokhibo, amükhaplobebo, dungjingbo, kukruk müchinmürabebo tüsho ju lung rhimobebo,

³⁷tüsho kidokhi mühide dungjingbo, jurü müchinkhibo, ashungdung tüsho liubo.

³⁸Ashorupung khimyam müngüh aniakhiuk thrip binpü thsakhamkhi ju, Mosa, Aron, tüsho atsührübonü Israelrü tsührübo thsungkheak arüngyam ching rhimo; tüshe püpürü shepü phünide arübanü asheshihpü lakheah.

³⁹Levirübo arü guk ayannü athrürü khinu khülangnü akumung ATUNGPUHNÜ thiyukhüm jihkhi yande Mosa le Aron anenü akhekhi ju 22,000.

⁴⁰ATUNGPUHNÜ Mosa ki tha, Israelrü tsührü bolung ching athrürü adüjirü khinu khülangnü akumung arü mungnü khede thrütang.

⁴¹Tüsho nünü I thsungkheaknü Israelrü tsührübo adüjirü tüsho arü akam-shiwüh akhuh adrekhibo müthri Levirübo tüsho arü akamshiwüh akhuh adrekhibo luang, I ATUNGPUH ah.

⁴²Jumonü ATUNGPUHNÜ thiyukhüm jihkhi nangde Mosanü Israelrü tsührü adüjirübo mung khe.

⁴³Tüsho akhuh zübekhi athrürü khinu khülangnü akumung khekhi ju 22,273.

⁴⁴Tüsho ATUNGPUHNÜ Mosa ki tha,

⁴⁵Israelrü tsührübo adüjirü tüsho arü akam-shiwühbo müthri Levirü tüsho arü akam-shiwühbo luang. Levirübo ju I yo thsübah: I ATUNGPUH ah.

⁴⁶Tümüde Israelrü akhuh zübekhibo Levirü kheaknü alü 273 lah, tsührübo alü nünü rhokhitloa alubeah.

⁴⁷Nünü mihbüm khülang kheaknü shotoyinchi nak 5 luang; nünü ju arüngyam ching lakhi gera 20nü shekel 1 khekhi yande luang.

⁴⁸Tüsho nünü alü dün rhokhitkhi sho ju Aron le atsührübo kilim jihang.

⁴⁹Jumonü Mosanü Levirünü rhokhitbah alü kheaknü alukhi sho ju lu.

⁵⁰Israelrü tsührü adüjirübo kheak apinü arüngyam ching lakhi shekel ayannü alukhi sho ju 1365.

⁵¹Tüsho ATUNGPUHNÜ thiyukhüm jihkhi nangde arhokhitkhi sho ju Mosanü Aron le atsührübo kilim jih.