Read Yimchungru Naga Wüh 30 Bible Online

Wüh 30 - Yimchungru Naga bible

Wüh 30

¹Mosanü Israel mihtsürü trükbo kurungkheak azothsürübo dünkheaknü tha, Ha ATUNGPUHNÜ thiyukhüm jihkhi ah:

²Mihtsürü khülangnü ATUNGPUH ki thiyuchihchimsho, yungsho tangzüngachihde thiyuchihchimsho, apinü nihbuh yu müthsümünim; apinü amün chingnü athakhi yande lüpdükhi rhimobeah.

³Küyimki aliberü khülangnü ATUNGPUH ki thiyuchihchimbanü, tüsho anihbe anünü kim ching abuh yam ching lade tangzüngachihkhinü rhüka lasho,

⁴tüsho anihbenü thiyuchihchimde tangzüngachihkhi abuhnü sobahle tümü müthasho anihbenü thiyuchihchimkhi nangde alala rhimobah.

⁵Tüshe abuhnü ju sobah yanlosho anihbenü thiyuchihchimde tangzüngkhibo mürhimo; tüsho ATUNGPUHNÜ anihbe neak bahjihbah, tümütüsho abuhnü anihbe mümülüjih.

⁶Tüsho anihbenü thiyuchihchimkhi yungsho münnü tangzüngachihkhinü rhüka lakhi kim ching, niubuhrü khülang yam ching rhangsho,

⁷tüsho aniubuhnü ju sobahle tümü müthasho, anihbenü thiyuchihchimkhi yungsho tangzüngachihkhi nangde arhimobah.

⁸Tüshe aniubuhnü ju sobahle mümülüsho, anihbenü thiyuchihchimde tangzüngachihkhi ju mürhimo tüsho ATUNGPUHNÜ anihbe neak bahjihbah.

⁹Tüshe khimoberü yungsho bah-a tsoshihkhi liberü khülangnü thiyuchihchimsho junü anihbe rhüka labah.

¹⁰Aliberü khülang aniubuh yam ching lachoki thiyuchihchimde tangzüngachihkhinü rhüka lasho,

¹¹tüsho aniubuhnü ju sobah mümülüde tümü müthasho, anihbenü thiyuchihchimkhi tüsho tangzüngachihkhibo alala rhimobah.

¹²Tüshe aniubuhnü jurü sobah yanlosho anihbenü amün chingnü thiyuchihchimkhi tüsho tangzüngachihkhibo mürhimo. Aniubuhnü jurü akeangkeang kamshihdo, tüsho ATUNGPUHNÜ anihbe neak bahjihbah.

¹³Nihbe thsünüpü thsüde alibenü thiyuchihchimsho yungsho tangzüngachih-a lasho, aniubuhnü ju thsülangpü yungsho akeangkeang kamshihpü kuklah.

¹⁴Tüshe aniubuhnü sobah ju dünkheak nimung aban tümü müthasho, anihbenü thiyuchihchimkhi yungsho zangrü rhüklode tangzüngachihkhi mulongjihdo; apinü jurü leangkhido, tümütüsho apinü ju sobah anihbe kheak tümü mütha.

¹⁵Tüshe apinü jurü sobahle akeangkeang kamshihsho, apinü anihbe neak hanbah.

¹⁶Harü ha aniubuh le aniube dünkheak tüsho abuh le atsührübe abuh yam ching anünü kim thsungkheak ATUNGPUHNÜ Mosa kilim thiyukhüm jihkhi yakzanbo lah.