Read Yimchungru Naga Wüh 32 Bible Online

Wüh 32 - Yimchungru Naga bible

Wüh 32

¹Kheakü Reuben tüsho Gad tsührübo akam-shiwüh hihdakde alakheah; tüsho küyimki arünü Jazer tüsho Gilead lomi ngükhea, ju lomi ju shiwüh akampü tsüde alakhea,

²Gad tüsho Reuben tsührübonü amükeambuh Eleazar tüsho boto limberübo ki arübah tha,

³“ Ataroth, Dibon, Jazer, Nimra, Heshbon, Eleale, Sebam, Nebo, tüsho Beon,

⁴lomibo ATUNGPUHNÜ Israel boto müngüh kukkhi; ha shiwüh akampung lo ah, tüsho nü yamlarübo akam-shiwühbo lah.”

⁵Jumonü arünü tha, “Nü mük ki isa muzhode ngüsho, ha lo nü yamlarübo kilim nihbuh kukruk thsüpü jihang, tüsho isa Jordan hode bebah düyü.”

⁶Tüsho Mosanü Gad le Reuben tsührübo ki tha, “Nüsa keoniorübo thirithsü ching yüchoki nüsa ha ching binba de?

⁷Kheakü tümüde nüsanü Israel mihtsürübo ATUNGPUHNÜ arü kilim jihkhi lomi ching yüpü mulong ninishihcho?

⁸Nüsa buhrübo inü alomi kheahshihpü Kadesh-barnea ching yüshihchoki hanangde arhimokheah.

⁹Tümüde küyimki arü Eshkol jindükhün ching wutubah alo ju angükhea, arünü Israel mihtsürübo mulong ninishih, junangde arünü ATUNGPUHNÜ ajihkhi lomi ching müyü.

¹⁰Jumonü ATUNGPUHNÜ ju nimung abukakhiuk tüsho thiyuchihchimde tha,

¹¹‘ Tsükjide Ijip chingnü aturü, kam mukunü akumung shenü she inü Abraham, Isak, tüsho Jakob ki thiyuchihchimkhi lo müngü, tümütüsho arü mulong athrünkhinü I müyan.

¹²Kenizrü Jephunne tsührü Kaleb, tüsho Nun tsührü Jihusua anenü lang mulong athrünkhinü ATUNGPUH yu anido.’

¹³Jumonü ATUNGPUHNÜ Israelrü kheak bukakhiuk, tüsho apinü arü sunglo ching ATUNGPUH miki amünean rhimorü lünbo muhokham khiungde kam yirü sunglo ching rümde tsahshih.

¹⁴Tüsho kheahang! Nüsanü nüsa buhrübo müthride, lün aso aneak mihtsürübonü Israelrü kheak ATUNGPUH buk alü akhiukshihpü lah.

¹⁵Tümüde nüsanü api dunglim müyande rholosho, kheaküshe apinü sunglo ching arü bahjihbah, tüsho nüsanü harü mihtsürü thsümünimjihbah.”

¹⁶Tüsho arünü api phünide arübah tha, “ Isanü ha ching akam-shiwühbo yam tüsho azürübo thsungkheak chipi ayünde kiuto thsanü,

¹⁷tüshe isa she tsungthsüh thsakhambahle arü lapung bekhiungde marüyi khiungde Israel mihtsürü lung keochihde ayübah; tüsho judüchoki isa tsührübo le aliberübo ha lomi mihtsürü kheaknü ajikkhukpü thsüde chipi ayünkhi kiutobo ching labah.

¹⁸Israel mihtsürübo mihbüm aban yamrüplurüp müngüyi khiungde isanü thüyam lim alode marü.

¹⁹Tümüde isanü Jordan thripkhüh lim tüsho ju hobah arü lung yamrüplurüp mulu, tümütüsho ha Jordan aniakhiuklim isa yamrüplurüp lah.”

²⁰Mosanü arü ki tha, “Nüsanü ha rhimosho, tüsho tsungthsüh thsakhambah ATUNGPUH müngüh yüsho,

²¹tüsho keochihrü alala Jordan hode yübah ATUNGPUH müngüh api riri amikinü yankhita mübahyi khiungde,

²²tüsho ATUNGPUH miki alo ju yankhisho, jushu nüsabo nihbuh yam lim alode arübah ATUNGPUH tüsho Israelrü miki alim thsübah; tüsho ATUNGPUH miki ha nüsa lapung lo thsübah.

²³Tüshe nüsanü jude müthsüsho, mütsanang, nüsanü ATUNGPUH azhihde neak yihbeakdo; tüsho nüsa neaknü nüsa yimkhitbah de mütsanang.

²⁴Nüsa tsührübo thsungkheak kiutobo tüsho namfimihnubo thsungkheak thüyam thsakhamang, tüsho nüsanü mün chingnü akhiukkhi nangde rhimoang.”

²⁵Tüsho Gad le Reuben tsührübonü Mosa ki tha, “ Isa tungpuhnü thiyukhüm jihkhi yande isa nü yamlarübonü arhimobah.

²⁶Isa tsührübo, niuberübo, mihnubo tüsho akam-shiwühbo alala Gilead kiutobo ching labah;

²⁷tüshe nü yamlarü thirithsürübo a, isa tungpuhnü athakhi nangde ATUNGPUH müngüh thsühnuk hanbah keochihpü yübah.”

²⁸Jumonü Mosanü arü thsungkheak amükeambuh Eleazar Nun tsührü Jihusua tüsho Israel mihtsürü trükbo ching guk kurungkheak azothsürübo ki thiyukhüm jih.

²⁹Tüsho Mosanü arü ki tha, “ Gad tüsho Reuben tsührübonü nüsa lung Jordan hode, keochihrü ATUNGPUH miki yübahle nüsa müngüh alo yankhisho, nüsanü arü kilim arü lapung lo thsüshihpü Gilead lomi jihang.

³⁰Tüshe arünü nüsa lung tsungthsüh thsübah hode müyüsho, nüsa lung Kanan ching arü lapung lo ngübah.”

³¹Tüsho Gad le Reuben tsührübonü tha, “ATUNGPUHNÜ nü yamlarübo ki thakhi nangde, isanü arhimobah.

³²Isanü ATUNGPUH miki tsungthsüh thsakhambah Kanan lo ching yübah, tüshe yamrüplurüp a ha Jordan thrippeang labah.”

³³Jumonü Mosanü Gad le Reuben tsührübo, tüsho Josep tsührü Manase trük chamkhüh kilim, Amor kiulongthsüpuh Sihon kiulongthsü, Bashan kiulongthsüpuh Og kiulongthsü, alo tüsho kiutobo, tüsho ju mühi lomi ching lakhi kiutobo jih.

³⁴Tüsho Gad tsührübonü athsükhibo ju Dibon, Ataroth, Aroer,

³⁵Atroth, Shophan, Jazer, Jogbeha,

³⁶tüsho chipi ayünkhi kiutobo Beth, Nimra le Beth Haran, tüsho arü shiwüh akampung yam thsü.

³⁷Tüsho Reuben tsührübonü athsükhi ju Heshbon, Eleale tüsho Kiriathaim,

³⁸kheaküshe Nebo le Baal Meon (harü mungbo müthrikheah) tüsho Sibma tüsho arünü athsükhi kiutobo mung ji.

³⁹Tüsho Manase tsührü Makir guknü Gilead ching yübah ju lu, tüsho ju ching larü Amorrü yankhitabah.

⁴⁰Jumonü Mosanü Manase tsührü Makir guk kilim Gilead jih tüsho arü ju ching la.

⁴¹Kheaküshe Manase tsührü Jair nü kiuto aninibo lu tüsho jurü ki Havoth Jair de ji.

⁴²Tüsho Nobanü yübahle Kenath tüsho kiulongbo lu, tüsho api mung yande Noba de ji.