Read Yimchungru Naga Wüh 35 Bible Online

Wüh 35 - Yimchungru Naga bible

Wüh 35

¹ATUNGPUHNÜ Mosa ki Jirikho hobah Jordan yean Moab dükhün chingnü tha,

²“ Israel mihtsürübo ki nihbuh yamrüplurüp ching yo Levirü kilim arü lapung kiuto jihshihpü thiyukhüm jihang tüsho arü kilim rukhüh-lo thsüshihpü kiuto mühide jihang.

³Arübonü arü lapü thsüde kiutobo labah; tüsho arü moshi, akam-shiwüh tüsho arü shiwüh alala thsungkheak rimlopung ngübah.

⁴Nüsanü Levirü kilim rukhüh-lo thsüpü jihkhi ju kiuto chipi aleanglim mühide limthrip 450 labeah.

⁵Tüsho nüsanü kiuto aleanglim akepü ju, aniakhiuklim, düjinglim, aniyüzahlim tüsho dukulim abande limthrip 900 labeah tüsho kiuto ju aphulung ching labah. Ha arü kiuto thsungkheaknü rimlopung thsübah.

⁶Kheakü nüsanü Levirü kilim jihkhi kiutobo chingnü tsoyukpung kiuto thuruk zoang, ju ching mihtsürü laksahrü tsoyukde ayübah. Tüsho ju ching nüsanü kiuto 42 yukajakang.

⁷Junangde nüsanü Levirü kilim jihpü kiuto ju 48 labah; harü nüsanü arü rimlopung bede ajihbah.

⁸Tüsho nüsanü ajihpü lakhi kiutobo ju Israel mihtsürübo lo chingnü ajihbeah; trük ato chingnü ahihdo jihang tüsho anini chingnü nükde jihang; nihbuh yamrüplurüp lakhi thülünnü Levirü kilim kiutobo jihang.”

⁹Tüsho ATUNGPUHNÜ Mosa ki tha,

¹⁰Israel mihtsürübo ki thaang, Küyimki nüsa Jordan hode Kanan lo ching yüzahbanü,

¹¹nüsanü tsoyukpung kiutobo mokhitang, ju ching mihtsürü laksahrü tsoyukde ayübah.

¹²Jurübo nüsa royimrü kheaknü tsoyukpung labah, junangde mihtsürü laksahrü boto miki mahkhappung ching müzhipchokia müshe.

¹³Tüsho nüsanü ajihkhi kiutobo chingnü, kiuto thuruk ju tsoyukpung kiutobo thsübah.

¹⁴Nüsanü Kiuto mahsam Jordan thrip, tüsho mahsam Kanan lo ching tsoyukpung kiuto thsüpü jihang.

¹⁵Harü kiuto thuruk ju Israel mihtsürü, khiungkerü tüsho arü lung tsorua alarübo thsungkheak tsoyukpung kiuto thsübah, junangde khürünü müranglimnü mihtsürü laksahsho ju ching tsoyukde ayübah.

¹⁶Tüshe mihtsürü khülangnü yinchitsonü khürü laksahsho, api mihtsürü laksahrü ah; api ju dükde asheshihbah.

¹⁷Tüsho mihtsürü khülangnü khürü lungnü kingsahsho, api mihtsürü laksahrü ah; api dükde asheshihbah.

¹⁸Yungsho mihtsürü khülangnü sangdüdam shuhbah khürü laksahsho, api mihtsürü laksahrü ah; api dükde asheshihbah.

¹⁹Ashebuh buhtsührünü mihtsürü laksahbuh ju asheshihbah; küyimki apinü ju buh shorubanü apinü asheshihbah.

²⁰Mihtsürü khülangnü khürü kheak mükheahnede nima adansahshihsho yungsho bindobah api kheak tümükhühnü kingsho,

²¹yungsho mükthsüde khah zhimpungbah yümsahsho, api mihtsürü laksahrü kamdo tüsho api asheshihbah. Ashebuh buhtsührünü api küyimki shorubanü asheshihbah.

²²Tüshe apinü thraneande mülade khürü zukleangnü nimmülünsho yungsho müranglimnü api kheak tümükhühnü kingsho,

²³yungsho müngüde lung jipa bahbah api kingsahsho, kheaküa api anihbuh riri yung tüsho api thsümünimpü mülüm,

²⁴jumonü botonü mihtsürü laksahrü le ashebuh buhtsührü dükeak harü yakzan yande mahkhapjihbeah.

²⁵Jumonü botonü mihtsürü laksahbuh ju ashebuh buhtsührü khah chingnü bekhitbah api tsoyukde ayüpung kiuto ching alode ayüshihbah, tüsho amüsüh müdangkenü amüsühkhitbuh achangbe amükeambuh müshe khiungde api ju ching labah.

²⁶Tüshe mihtsürü laksahbuhnü api tsoyukpung kiuto chingnü aleanglim wukhiuksho,

²⁷tüsho ashebuh buhtsührünü api tsoyukpung kiuto aleanglim ngübah laksahsho, ju laksahkhi amülim müla,

²⁸tümütüsho api ju achangbe amükeambuh müshe khiungde nihbuh tsoyukpung kiuto ching labeah. Tüshe achangbe amükeambuh sheabah dunglim mihtsürü laksahbuh ju nihbuh lapung lo ching yülopü kuklah.

²⁹Kheakü harübo ha nüsa lünbo ching lapung abande lünnü mahkhapkhi yakzan labah.

³⁰Shepünü mihtsürü laksahbanü, thiyumütsan jihrübo hode mihtsürü laksahbuh ju asheshihbah; tüshe thiyumütsan jihrü khülang hodü langa she müsheshih.

³¹Tahle mihtsürü laksahrü sheshihpü dünkheak nünü amo lude dürhokhit, tüshe api dükde asheshihbah.

³²Tüsho nünü mihtsürü khülang nihbuh tsoyukpung kiuto ching alode yübah amükeambuh müshe khiungde alapü larü kheaknü amo lude dürhokhit.

³³Jumonü nüsanü nüsa lapung lomi dümünean; tümüde thiyihnü alo müneanchoh, tüsho ju lo ching bukkhi thiyih ju mümüsühkhitkhuk, tüshe mihtsürü laksahbah thiyihnü lang müsühkhitkhukbah.

³⁴Jumonü nüsa lapung lo küpü ching I lanü ju dümünean; tümüde I ATUNGPUH Israel mihtsürü lung lah.