Read Yimchungru Naga Wüh 36 Bible Online

Wüh 36 - Yimchungru Naga bible

Wüh 36

¹Kheakü Josep tsührü yamkhünbo chingnü, Manase kheak yo, Makir tsührü Gilead guk buhtsüh azothsürübonü Mosa tüsho limberü, Israel mihtsürü gukbo ching azothsürübo ki arübah tha,

²Israel mihtsürü kilim azan thsüde alo yamrüplurüp jihshihpü ATUNGPUHNÜ isa tungpuh Mosa ki thiyukhüm jih, tüsho isa khiungmungrü Zelophehadnü atsührü aliberübo kilim yamrüplurüp jihshihpü ATUNGPUHNÜ isa tungpuh kilim thiyukhüm jih.

³Kheakü arübo Israel mihtsürü trük püpürü tsührü kheak rhanga lasho, arü yamrüplurüp ju isa bebuhrü yamrüplurüp chingnü ayihkhitbah, tüsho ju anihbe rhangkhi buhtsüh yamrüplurüp ching hanyukbah; junangde isa ki mülüjihkhi yamrüplurüp chingnü chamkhia lubah atsobah.

⁴Tüsho küyimki Israel mihtsürü thsungkheaknü Jubilee arübanü, arü yamrüplurüp ju arü küpü ching rhangkheanü ju trük ching hanyukbah; junangde arü yamrüplurüp ju isa bebuhrü trük yamrüplurüp chingnü hande ayübah.

⁵Tüsho ATUNGPUHNÜ athakhi nangde Mosanü Israel mihtsürübo ki thiyukhüm jih, “ Josep tsührübo trüknü tümü thachonü ju dükdü ah.

⁶Ha Zelophehad tsührübebo dünkheak ATUNGPUHNÜ ajihkhi yukhüm. Arünü amulongkhi ching rhangshang, tüshe arünü arü bebuhrü trük ching lang arhangbeah.

⁷Jumonü Israelrünü yamrüplurüp trük le trük ching mümüthriachih, tümüde Israel mihtsürü abannü nihbuh bebuhrü trük yamrüplurüp zobah.

⁸Tüsho Israelrü mihtsürü trük ching tsührü aliberü sherünü yamrüplurüp lulanü mihbüm abannü nihbe bebuhrü trükrü guk niuberü thsübeah, junangde Israel mihtsürü abannü nihbuh bebuhrü yamrüplurüp labah.

⁹Ha ruk yamrüplurüp ju trük khülang chingnü püpü lim mümüthri, tüshe Israelrü trük abannü nihbuh yamrüplurüp zobah.”

¹⁰ATUNGPUHNÜ Mosa ki thiyukhüm jihkhi nangde, Zelophehad tsührübebonü rhimo;

¹¹tümüde Zelophehad tsührübebo Mahla, Tirza, Hogla, Milka tüsho Noa arünü nihbe bebuhrü keoniorü tsührübo ki rhanga lakheah.

¹²Arübo Josep tsührü Manase trük yamkhün ching rhangkheah, tüsho arü yamrüplurüp ju nihbe bebuhrü trük ching lang la.

¹³Harü ha Jirikho hobah Jordan ki, Moab dükhün ching ATUNGPUHNÜ Mosa hode Israel mihtsürü kilim jihkhi yukhüm tüsho yakzanbo ah.