Read Yimchungru Naga Wüh 4 Bible Online

Wüh 4 - Yimchungru Naga bible

Wüh 4

²Kohath tsührü Levirü bolung, buhtsüh tüsho gukbo chingnü wühkheang,

³kam 30nü akumung tüsho kam 50 khiungde, ashorupung khimyam tankihpü ching yüzahkhukpü thsüde kheang.

⁴Ha Kohath tsührübonü ashorupung khimyam ching rhimobebo ah: khide amüsüh kukrukbo kümbah.

⁵Küyimki binkheampung akhinbanü Aron le atsührübonü ayüzahbah tüsho azhinkhi khim yihkhibah tangzüng sangdan phudobah.

⁶Tüsho arünü ju kheak shihküp lüpkihbah, aku kheak biyi khim yihkihbah, tüsho ashuhbe sangkhrihbo yukbah.

⁷Arünü ATUNGPUH kilim jihkhi yikhap zopung dükhüm kheak biyi khim phukihbah tüsho ju kheak phüh-thulung, athüneabe yukkhi phurusük, kingaünbe phurusük, tüsho ayungbe kingaün thsungkheaknü keluhbo de azobah. Tüsho ju kheak yikhap judü lang akihshihbeah.

⁸Arünü ju alala kheak khim amürüm phukihbah, mihnu küp lüpkihbah, tüsho ashuhbe sangkhrihbo yukbah.

⁹Arünü biyi khimnü tsünpung dubopung, tsünpungbo, mokhih müjipbebo, phurubeakbo, tüsho oliv müdangke yukpungbo phudobah.

¹⁰Arünü ju dümdobah, tüsho pungphurubo shihküpnü muhiukhi ching yukbah ashuhbe sangkhrih kheak zobah.

¹¹Jushu arünü suna kingaün sadam kheak biyi khimnü aphudobah, ju kheak shihküp lüpkihbah, tüsho ashuhbe sangkhrih yukbah.

¹²Arünü arüngyam ching yo pungphuru alala lubah biyi khim ching dümbah amikheak shihküpnü alüpkihbah, tüsho ashuhbe sangkhrih kheak zobah.

¹³Tüsho arünü kingaün sadam kheak yo awah wua bahbah khim mürümmuchu ju kheak phukihbah;

¹⁴tüsho arünü ju kheak kingaün sadam yo pungphuru alala, mophuru, shihkhoyang, alo-thsukbe, müsühmüra-phurubo yukbah; tüsho arünü ju kheak shihküp lüpkihbah ashuhbe sangkhrihbo yukbah.

¹⁵Tüshe küyimki Aron le atsührübonü kingaün sadam tüsho zowupungbo ju aphudokhambanü, arü binkheampung akhinchoki, Kohath tsührübonü arübah jurübo hanbah, tüshe arübonü amüsüh kukrukbo muqiu, jude yungsho arübo ashebah. Harü kukrukbo ha ashorupung khimyam ching yo Kohath tsührübonü ahanbebo ah.

¹⁶Amükeambuh Aron tsührü Eleazarnü arhimobebo ju arüngyam abümnü tüsho tsünpungbo thsungkheak moke, rhümthüneabe, nimung aban hi kingaünpü, amujube müdangke tüsho arüngyam ching ATUNGPUH kilim müsühkhitkhi kukrukbo.

¹⁷ATUNGPUHNÜ Mosa tüsho Aron ki tha,

¹⁸Kohath guk trükbo Levirü lungnü düsheabahshih;

¹⁹tüshe arü ki tsüde rhimoang, junangde arü rhangdung labah tüsho khide amüsüh kukrukbo ki phünide arüchoki müshe: Aron tüsho atsührübonü yüzahang tüsho arü aban rhimo jihang,

²⁰tüshe arünü anükhüh kheak lang she amüsüh kukrukbo kheahpü müyüzah, jude yungsho arü ashebah.

²¹ATUNGPUHNÜ Mosa ki tha,

²²Gershon tsührübo wühkhe arü buhtsüh tüsho arü guk yande luang;

²³kam 30nü kam 50 khiungde nünü arübo ashorupung khimyam ching tankihpü yüzahkhukpü thsüde mung kheang.

²⁴Gershon gukbo thsungkheaknü tankihpü tüsho hahmülangbo:

²⁵arüngyam aleanglim tüsho alunglim phudobe, ju ku kheak shihküp kihbah, ayüzah limro phudobe khim,

²⁶arüngyam tüsho kingaün sadam mühide kidokhi phudobe khimbo, ayüzah limro zhindokhi, amukhung ching ahorikhi shungliu tüsho sanglungbo Gershonrünü harü kukrukbonü yihnüpü lakhibo alala rhimobah.

²⁷Aron tüsho atsührübonü Gershonrünü tankihbe rhimo athrünkhi jihbah. Tüsho arünü arhimobebo nünü arü kilim rhimobo jihbeah.

²⁸Ha Gershon gukbo thsungkheaknü ashorupung khimyam ching tankihbe rhimobo ah. Tüsho arü rhimobo ju amükeambuh Aron tsührü Ithamar khah ching labah.

²⁹Merari tsührübo thsungkheaknü, nünü arübo guk tüsho buhtsüh yande kheang.

³⁰Kam 30nü kam 50 khiungde, sherübo ashorupung khimyam tankihpü ching yüzahchonü arübo kheang.

³¹Tüsho arübo arüngyam ching tankihbe rhimobo ju: akümsang, sangkhrihbo, dungjingbo, müchinmürabebo,

³²thüyam dükeak yo dungjingbo tüsho müchinmürabebo, ashungdungbo, liubo, ju lung sanglungbo tüsho arünü arhimobebo kukruk; tüsho nünü mihbüm abande mungjimungji hanshihbeah.

³³Ha Merari gukbonü arüngyam ching tankihbe rhimo: arünü amükeambuh Aron tsührü Ithamarnü khuhlangahuhkhi yande arhimobah.

³⁴Jumonü Mosa, Aron, tüsho boto limberübonü Kohath guk tüsho buhtsüh yande khe.

³⁵Arübo kam 30nü kam 50 khiungde ashorupung khimyam tankihpü ching yüzah;

³⁶tüsho gukbo yande akhekhi ju 2750.

³⁷Ha Kohathrü yamkhünbo, ashorupung khimyam ching tankihrü tüsho Mosa hode ATUNGPUHNÜ ajihkhi yuzüng yande Mosa tüsho Aron anenü akhekhi ah.

³⁸Gershon gukbo tüsho buhtsüh yande akhekhi,

³⁹kam 30nü 50 khiungde, ashorupung khimyam tankihpü ching yüzahrü —

⁴⁰arü guk tüsho buhtsüh yande akhekhi ju 2630.

⁴¹Ha Gershon gukbo, ashorupung khimyam ching tankihrü tüsho Mosa hode ATUNGPUHNÜ ajihkhi yuzüng yande Mosa tüsho Aron anenü akhekhi ah.

⁴²Merari gukbo arü buhtsüh yande akhekhi,

⁴³kam 30nü 50 khiungde, ashorupung khimyam tankihpü ching yüzahrü —

⁴⁴arü guk yande akhekhi ju 3200.

⁴⁵Ha Merari gukbo, ashorupung khimyam ching tankihrü tüsho Mosa hode ATUNGPUHNÜ ajihkhi yuzüng yande Mosa tüsho Aron anenü akhekhi ah.

⁴⁶Mosa, Aron tüsho Israelrü limberübonü Levirü arü guk tüsho buhtsüh yande akhekhi,

⁴⁷kam 30nü 50 khiungde, ashorupung khimyam tankihpü rhimo ching yüzahkhukrü tüsho hahmülang hankhukrü,

⁴⁸arübo wühkhe alalanü 8580.

⁴⁹ATUNGPUHNÜ Mosa kilim thiyukhüm jihkhi yande arübo mihbüm abannü nihbuh tankihpü rhimo yungsho ahanpü jih; ha ruk apinü arübo wühkhe.