Read Yimchungru Naga Wüh 5 Bible Online

Wüh 5 - Yimchungru Naga bible

Wüh 5

¹ATUNGPUHNÜ Mosa ki tha,

²Israelrü tsührübo apham kihrü, thiyih müyeanrü, tüsho ashemi qiubah müneankhibo binkheampung chingnü yankhita bahpü thiyukhüm jihang.

³Nünü athrürü tüsho aliberü chido binkheampung aleanglim yankhita bahang, jude thsüsho nüsa bolung I lakhi, binkheampung mümünean.

⁴Israelrü tsührübonü ATUNGPUHNÜ Mosa ki thakhi anide arübo binkheampung aleanglim yankhitabah.

⁵Tüsho ATUNGPUHNÜ Mosa ki tha,

⁶Israelrü mihtsürübo ki thaang, Küyimki athrürü yungsho aliberünü ATUNGPUH azhihde neak yihbeakbanü, tüsho mihtsürü ju amülim kambanü,

⁷anihbuhnü ayihbeakkhi neak dünkheak apinü neak alokhibah; tüsho apinü amülim rhimokhi dün shihcham phüngü ching khülang yukbah ashaklobah, tüsho apinü amülim thsübuh kilim jihbah.

⁸Tüsho mihtsürü ju sheabahsho tüsho amülim dün shaklokhi jihpü thsüde api buhtsührü mülasho, api dünthsükhipü lakhi mihnupung kheak ajakbah amükeambuh thsungkheaknü ATUNGPUH kilim jihbah.

⁹Israelrü tsührübonü amüsüh kingaün amükeambuh kilim handarükhi ju api yo thsübah.

¹⁰Tüsho mihtsürü abannü amükeambuh kilim amüsüh kingaün jihkhi ju api yo thsübah.

¹¹ATUNGPUHNÜ Mosa ki tha,

¹²Israelrü mihtsürübo ki thaang, mihtsürü khürü niuberünü chamkhide tsosho tüsho api azhihde thiyuro mülakhi rhimosho,

¹³tüsho mihtsürü khülangnü anihbe kheak müzammüramsho, tüsho ju aniubuh kheaknü ramkhia lasho tüsho anihbe müneana lalashe müngükhitsho, tüsho alibe azhihde thiyumütsan mülasho, yungsho anihbe mutholoa lasho;

¹⁴mükthsükhi me api kheak akihbah nihbe zangrü müneanbe aniube kheak mükthsüde kamsho; yungsho mükthsükhi me api kheak akihbah anihbe mümüneanean she aniube kheak mükthsüde kamsho;

¹⁵apinü aniube ju amükeambuh kilim bedarübah. Apinü alibe dünkheak kingaün barli hi khahngak 1 kingaün handarübeah; apinü ju ching oliv müdangke tüsho arhümthüneabe muyuk, tümütüsho ha mükthsükhi dünkheak hi kingaün, amülim rhimokhi lümkhitloshihkhi kingaün ah.

¹⁶Tüsho amükeambuhnü alibe phünide bedarübah, tüsho ATUNGPUH miki zhipshihbah.

¹⁷Amükeambuhnü ke amüsüh alo phüh ching yukbah, tüsho kingaünpung sadam kheaknü asungthulung lubah ke ching yukbah.

¹⁸Tüsho amükeambuhnü alibe ku lokhijihbah ATUNGPUH miki zhipshihbah, tüsho alümkhitbe kingaün anihbe khah ching yukjihbah, ju mükthsükhi dünkheak hi kingaün. Tüsho amükeambuhnü akhah ching muthrumünean handarübe ke akhüh shuhbah.

¹⁹Tüsho amükeambuhnü thiyuchihchimde athakhi ha alibenü alokhishihbah, “ Mihtsürü khürünü nü kheak munungsho, tüsho nü yamkhünbuh bukkhüp lachoki mümüsühkhi ching mütsokheasho, ha muthrumünean handarübe ke akhüh chingnü zuzu labah.

²⁰Tüshe nü yamkhünbuh bukkhüp lachoki tsokhia lasho, tüsho nü niubuh kheak hobah püpürü thrürü kheak nungkhinü nü zangrü müneana lasho,”

²¹amükeambuhnü alibe muthrumüneankhi thiyuchihchim jihde athabah, “ATUNGPUHNÜ nü pho dütsüpshihchoki tüsho nü buk bümshihchoki, ATUNGPUHNÜ nü muthrumüneanshang tüsho nü mihtsürü bolung thiyuchihchim khülang thsüshang;

²²tüsho ha muthrumüneanbe ke nü buk ching yüzahbah bümshang tüsho nü pho dütsüpshang.” Tüsho alibenü athabah. “ Amen, jude thsüshang.”

²³Tüsho amükeambuhnü muthrumüneankhi ju hüm ching thrütyukbah, tüsho ke akhüh ching nütde amüsühbah;

²⁴tüsho apinü muthrumünean handarübe ke akhüh ju alibe yungshihbah, ke akhüh ju apang ching yüzahbah tüsho khühde athsünüshihbah.

²⁵Tüsho amükeambuhnü mükthsükhi hi kingaün alibe khah chingnü alubah, tüsho hi kingaün ju kingaün sadam kheak handarübahle ATUNGPUH miki müleamde kingaünbah;

²⁶tüsho amükeambuhnü lümkhitde alapü shihcham thsüde hi kingaün ju müyikhüh lubah, tüsho kingaün sadam kheak takbah tüsho anükhüh labah alibenü ke ju ayungshihbah.

²⁷Tüsho küyimki apinü alibe ke yungshihbanü, mürangkhüh anihbe zangrü müneana lasho tüsho niubuhrü kheak azhihde thiyuro mülaa lasho, muthrumünean handarübe ke ju apang ching yüzahbah tüsho khühde thsünüshihbah, anihbe pho dütsüpbah, tüsho buk bümbah, tüsho alibe ju anihbe mihtsürü bolung muthrumüneankhi labah.

²⁸Tüshe alibe ju azangrü mümüneana lasho tüsho müsüh-a lasho anihbe zuzu kambah tüsho tsührü labah.

²⁹Ha mükthsükhi dünkheak yakzan, küyimki aniubenü aniubuh bukkhüp lachoki tsophülapbanü tüsho anihbe zangrü müneanbanü,

³⁰yungsho küyimki athrüpü kheak mükthsükhi me arübahle aniube kheak mükthsübanü alibe ju ATUNGPUH miki zhipshihbah, tüsho amükeambuhnü anihbe kheak ha yakzan yande arhimobah.

³¹Athrüpü amülim chingnü zuzu kambah, tüshe alibe a anihbe münean hanbah.