Read Yimchungru Naga Mika 1 Bible Online

Mika 1 - Yimchungru Naga bible

Mika 1

¹Juda kiulongthsürübo Jotham, Ahaz tüsho Hezekia nimungbo ching apinü Samaria tüsho Jirusalem dünkheak ngükhi Moreshethrü Mika ki arükhi ATUNGPUH yu.

²Soang, nüsa mihtsürü alala; aniang, O alomi, tüsho ju ching lakhi alala; tüsho Atungpuh THRÜNPUH ju api amüsüh arüngyam chingnü nüsa azhihkhi thiyumütsan labah.

³Tümüde kheahang, ATUNGPUH ju api lapung chingnü arüchoh, tüsho akibahle alomi achang dangpungbo kheak jungbah.

⁴Judüki mo phünide thürip lakhi nangde, kebonü awung zünkheamkhi nangde api khüp müzüngbo niubah tüsho jindükhünbo zhibeakbah.

⁵Ha alala Jakobnü alakmihkhi thsungkheaknü tüsho Israel yamkhün neakbo thsungkheaknü ah. Jakobnü alakmihkhi ju tümü a? Ha Samaria yung de? Tüsho achang dangpung tümü a? Ha Jirusalem yung de?

⁶Jumonü inü Samaria ju mükeak ching kurungaso yangpü dangpung amujung kamshihbah. Inü anihbe lungbo jindükhün ching zünde yükishihbah, tüsho anihbe khimtanbo lahkhitjihbah.

⁷Anihbe mejakbo alala adütre kamde kingnakbah, anihbe arüngyam mihkhah-mulokhi alala monü atakbah tüsho anihbe sangthsübo alala thsümünimbah; tümüde anihbenü müzammüramkhi mihkhahnü jurü hanmukhung, tüsho müzammüramkhi mihkhah nangde jurübo ahorilobah.

⁸Ha thsungkheak I tüzhobah tüsho mitripbah; inü I jing keangkeang tüsho bünkeang yübah; inü shirungbo nangde tüzhobah, tüsho lothsuktopübo nangde mulong rozhakbah.

⁹Tümüde anihbe mü müthsüngube lah. Ha Juda ching arüdo; ha I mihtsürü, Jirusalem chipiripit khiungdo.

¹⁰Ha Gath ching dütha, judü lang midütrip; Beth-ophra ching nüsabonü asungthulung ching awuhang.

¹¹Shaphir ching larübo, bünkeang tüsho achih ngüde nüsa limro ching yüang; Zaanan ching larübo mikhuh ching marü; Eth-ezel mulong rozhakchoh tüsho atsunglobe nüsa kheaknü alubah.

¹²Tümüde Maroth ching larübonü arung thsungkheak mulong dukde aleanglah, tütüshe thsümütsü ATUNGPUH kilimnü Jirusalem chipiripit ching akido.

¹³Nüsa Lakish ching larübo, khorabo ju khora-lolungbe kheak chingkihang; ha Zion kilim neak atankih lakheah, tümüde nüsa kheak Israelnü alakmihkhibo ngükhit.

¹⁴Jumonü nüsanü Moresheth-gath kilim achamachih thsambahbo jihang; Akzib yamkhün ju Israel kiulongthsürübo kilim mülapmüjikhi labah.

¹⁵Maresha ching larübo, inü kheaküshe nüsa kheak akuk ngükhi hande arübah; Israel müretahkhi Adullam ching arübah.

¹⁶Nüsanü asühkhi tsührübo thsungkheak tüzhode kuyü hütang; nüsanü müleangtopü nangde rakrak hütang tümüde arübo nüsa kheaknü ramtso ching yüdo.