Read Yimchungru Naga Mika 2 Bible Online

Mika 2 - Yimchungru Naga bible

Mika 2

¹Sherünü arü yapkiu kheaknü mihbukmuyuk tüsho amütsü rhimo lümkhi thsüchonü ayokhe! Küyimki yinkhibanü, arünü ju asahchoh, tümütüsho ju arü wu ching lah.

²Arünü thulubo lunechoh, tüsho jurübo jangkhichoh; thüyambo she lude tsochoh; arünü thüyam putungrü tüsho thüyam, mihtsürü tüsho arü yamrüplurüp junochoh.

³Jumonü ATUNGPUHNÜ ha thachoh: kheakü nüsanü nüsa hungbo manguhkhukpü ha yamkhün azhihde inü amütsü lümkhi asahchoh; tüsho nüsanü korakde mütsah, tümüde ha amütsü kim khülang labah.

⁴Ju nimung arünü nüsa azhihde korak-khün thsübah, tüsho khühde tüzhokhinü mulong rozhakbah, tüsho athabah, “ Isa shahde thsümünimdo; ATUNGPUHNÜ I mihtsürü lakhit hande tsodo; künangde apinü ju I kheaknü luakhinkhea! Isa ramrü kilim apinü isa lubo chama jihdo.”

⁵Jumonü ATUNGPUH borü bolung ching alo chamnaka lupü nüsa she mülade alabah.

⁶“Düthsangyuthsangra” arünü hade thsangyuthsangrachoh — “ Khürünü hadürü thsangyuthsangra müthsübeah; mihmüthsüm mülakhinü isa müyanphuh.”

⁷Ha athabea de, O Jakob yamkhün? ATUNGPUH arümkheamkhi kheama la de? Harübo api rhimobo a de? Lungkide atsahrü ki I yubonü atsü mürhimo de?

⁸Tüshe nüsanü thiriri nangde I mihtsürü azhihde wusudo; nüsanü thirithsüpü tümü mülümde atsahrü kheaknü shulünkhim züngkhia ludo.

⁹I mihtsürü liberübo arü yambo atsü chingnü yankhitdo; arü tsührü athunu chingnü nüsanü lünnü I müretah lude tsodo.

¹⁰Asürang tüsho yüang; tümüde ha sühakhim dangpung yung, tümütüsho mümüsühkhinü ha khitode thsümünima lah.

¹¹Khürünü akeangyu thade arüsho, “ Inü nüsa ki suhdahkhi yukhu tüsho ayungbe dünkheak müchitbah,” api ju ha mihtsürü thsungkheak wukihrü lakhi labah!

¹²Inü tsükjide nüsa alala bemukhungbah, O Jakob, inü Israel arhang larü bemukhungbah; inü arübo rimlopung ching namfimihnu boto nangde, ayam ching bemukhungbah; ju mihtsürünü mide akambah.

¹³Shepünü lakashungchonü arü müngüh yübah; arünü lakashungbah tüsho chipiripit hode junü awukhiukbah. Arü kiulongthsüpuh arü müngüh yübah, ATUNGPUHNÜ arü limbebah.