Read Yimchungru Naga Mika 3 Bible Online

Mika 3 - Yimchungru Naga bible

Mika 3

¹Tüsho inü tha: Aniang, nüsa Jakob akuthsürübo tüsho Israel yamkhün yakzanshuhrübo! Nüsanü thiyuro mümükheahbea de? —

²nüsa sherünü atsü thraneancho tüsho amütsü muzhocho, sherünü I mihtsürü küp tüsho arü robo kheaknü shihtsü khukkhicho;

³sherünü I mihtsürü shih tsühcho, arü küp khukkhicho, arü robo adütre kamde yihnakcho, tüsho dubo le phühto ching lakhi shih nangde khapthünakcho.

⁴Judüki arünü ATUNGPUH ki zhibah, tüshe apinü arü ki malojih; ju kim ching apinü amiro arü kheaknü ajikbah, tümütüsho arünü mihbukmuyukde rhimodo.

⁵ATUNGPUHNÜ I mihtsürü bephülaprü wukihrübo dünkheak ha thachoh, sherünü tümükhüh atsühpü lachoki “Mungtsü” zhicho, tüshe sherünü arü mün ching tümü muyukjihnü arü azhihde thirithsü thakhitjihchoh.

⁶Jumonü michih mülade nüsa azhing labah tüsho akhiuka huhkhi mülade nüsa ki mitingbah. Wukihrübo kheak ani yüzahbah tüsho arü kurungkheak nimung amürak labah;

⁷angürübo mungchihbah, tüsho müchitrü achih ngübah; arü alalanü arü münküp muhiudobah, tümüde Thrünpuh kilimnü alojihkhi müla.

⁸Tüshe I thsungkheak a, Jakob ki apinü alakmihkhi tüsho Israel ki api neak thapü, I kheak wu, ATUNGPUH me, thiyuro tüsho sühmühnü mide lah.

⁹Ha aniang, nüsa Jakob yamkhün limberübo tüsho Israel yamkhün yakzanshuhrübo, sherünü thiyuro thraneancho tüsho alim alala bephülapcho,

¹⁰sherünü thiyih bukkhinü Zion thsücho tüsho amülimnü Jirusalem thsücho!

¹¹Yakzanshuhrübonü buknim dün mahkhapchoh, amükeamrübonü adün mo thsangyuchoh, wukihrübonü sho mo müchitchoh; tütüshe arünü ATUNGPUH kheak angükihchoh tüsho thachoh, “Tsükjide ATUNGPUH isa lung lah! Isa kheak athsümünim marü.”

¹²Jumonü nüsa dünkheaknü thulu nangde Zion wochakbah; Jirusalem ju athsümünim mujung kambah, tüsho arüngyam wung ju murung kambah.